Ganymedes var konungssonur frá Tróju og var allra manna fríðastur. Júpíter sendi því örn sinn til að ræna honum og færa hann guðunum á Ólympos þar sem hann ásamt Hebu skyldi skenkja þeim ódáinsvín. Veturinn 1802-4 pantaði Irina Vorontsov, rússnesk greifafrú, fimm höggmyndir hjá Thorvaldsen og skyldi efni þeirra vera úr grísku goðafræðinni, m.a. úr sögunni um Ganymedes. Í fyrri gerð myndarinnar af Ganymedes stóð örninn við vinstri fót hans, en í seinni gerðum úr marmara eins og þeim sem eru í Thorvaldsensafni (keypt þangað 1920 frá Englandi) og í Listasafni Íslands er erninum sleppt. Það eintak sem er í eigu Listasafns Íslands stóð ófullgert í vinnustofu Thorvaldsens þegar hann lést, en síðar var lokið við að höggva myndina í marmara fyrir safn hans. Árið 1922 var verkið selt Johan Hansen aðalræðismanni sem gaf það íslenska ríkinu árið 1927. (B.J. Bertel Thorvaldsen 1770-1844. Sýning á Kjarvalsstöðum í Reykjavík. 1982).