Rueca
![](https://upload.wikimedia.org/wikipedia/commons/thumb/7/71/Reine_Berthe_et_les_fileueses%2C_1888.jpg/250px-Reine_Berthe_et_les_fileueses%2C_1888.jpg)
A rueca[1] (u filosa[2] en aragonés ribagorzano) ye un traste pa filar manualment fibras textils. A rueca formaba parella con o fuso, destinau a ateserar o filo que resultaba de a filada en a cantidat d'una «fusada».
Ista ferramienta consiste en un tocho, cheneralment de canya, rematau por una cabeza an s'enrolla os brins de fibra que se quiere filar, cutio-cutio en baixando por l'asta. A l'acción d'enrollar os brins arredol d'a rueca en a Val de Chistau se le diz «rocar» u «arrocar»[3] os brins, y una vez que i son, en Agüero se diz que as fibras son «rocadas».[4]
As formas más primitivas de ruecas no yeran si que un palo rematau en forqueta, lo que permitiba punchar l'estrimo y luego d'ir fendo trena (anque no guaire preta) con os brins de a fibra que se quiere rocar, baixín-baixiando por arredol de l'asta. Atras veces se ligaba os brins con cordels no guaire pretos, pos en qualsiquier caso lo que se busca ye sacar-ne dimpués a fibra con os didos d'una sola mano, de regular a izquierda.
Emplego
![](https://upload.wikimedia.org/wikipedia/commons/thumb/1/1c/Wirtel01.png/200px-Wirtel01.png)
En filar, a rueca s'agafaba por debaixo d'o brazo menos dominant, refirmando la cabo d'abaixo de l'asta en a cintura d'a ropa u d'o mandil, se decantaba abant, y con o brazo preto contra las costiellas y a mano d'ixe mesmo brazo por debaixo d'an pendeba las fibras, s'iba sacando poquet-a-poquet os brinetz con as puntas d'os didos y se principiaba a «torcer», fendo que pillasen l'apariencia d'un filo por primer vez. Pa aduyar-se a que os brins se pegasen y estasen de millor agafar se podeban ensalivar, lo que dió lugar a la chanza siguient:
y llegando t'arriba mojo o guisopo.[5]
Alavetz, con a mano dominant se feba pasar l'estrimo d'o filo por una osqueta que teneba o fuso en a rodeta y se tiraba a chirar pendiu d'o propio filo, que se teneba agafau con os didos. Asinas, pendiu y chirando a-escape, ye como o fuso le imprimiba la torcedura a o filo. Ixa acción se deciba «torcer» o filo.[3] De a traza que tenese o filador u filadera torcendo dependeba la calidat de trama con que remataba o filo.
Sobre o boche d'o fuso por debaixo d'a rueca, que bella vez tocaba o suelo y tringolaba, i hai tamién bella devineta como a siguient:
Un galán le está bailando
y a'l son de castanyuelas
as tripas le va sacando.[5]
Contexto cultural
![](https://upload.wikimedia.org/wikipedia/commons/thumb/6/6f/Bartolom%C3%A9_Esteban_Murillo_%281617-1682%29_-_An_Old_Woman_Holding_a_Distaff_and_Spindle_-_732120_-_National_Trust.jpg/220px-Bartolom%C3%A9_Esteban_Murillo_%281617-1682%29_-_An_Old_Woman_Holding_a_Distaff_and_Spindle_-_732120_-_National_Trust.jpg)
A filada, que más d'antes la feban quasi nomás que as mullers, yera la segunda fayena que más tiempo les costaba dimpués de lo relacionau con a casa.[6] Filar con rueca y fuso yera una fayena larga y delicada, y pasaba a-sobén que as mullers de casas ricas de l'Alto Aragón no la quereban fer y les n'encomendaban a las pobres, por eixemplo a truca d'atros recursos que aquellas no podesen tener.
Atras veces yeran as mullers pobres que se trobaba minguadas as que s'ofreceban a filar pa otri. Con que as viudas u ancianas solas podeban fer truca de filar una cantidat por o treballo fisico más propio d'os hombres, como labrar, que no se podeba fer en casa suya.
Tamién pasaba que a valor que se sacaba d'os filos que a trancos y barrancos se filaba yera poco, con que tendeba a considerar-se que valeba millor fer atras cosas si se podeba.
Se veiga tamién
Referencias
- ↑ (es) Brian Mott El habla de Gistaín, Instituto de Estudios Altoaragoneses, 1989, ISBN 84-86856-15-9, p.124
- ↑ (es) Fernando Romanos Hernando: Aragonés ribagorzano d’Estadilla dende a obra de Cleto Torrodellas y Pablo Recio, p.24
- ↑ 3,0 3,1 MONESMA, Eugenio (director). La lana en el Pirineo. Proceso textil tradicional de la lana. (documental).
- ↑ MONESMA, Eugenio (director). El lino. Cultivo, recolección y elaboración tradicional de prendas. (documental).
- ↑ 5,0 5,1 DIESTE, José Damián. Adivinanzas del Alto Aragón. Xordica, 2009. ISBN 978-84-96457-40-9. P. 14.
- ↑ VIOLANT SIMORRA, Ramon. El Pirineo Español. Vida, usos, costumbres, creencias y tradiciones de una cultura milenaria que desaparece (2º Ed.). Barcelona. Editorial Alta Fulla, 1989. ISBN 84-86556-87-2