Peppa Pig
C'l artìcul chè 'l è scrit in
Miranduléś |
![](https://upload.wikimedia.org/wikipedia/commons/thumb/8/84/PeppaPigAldridge2009.jpg/370px-PeppaPigAldridge2009.jpg)
Peppa Pig (Pèpa la Gugiōla) 'l è 'n cartòṅ animâ britànic dirét e prudót par Astley Baker Davies. 'L è distribuî in tut al mónd in sènt-utànta paéś e 'l è stâ pinsâ p'r un pùblic ad putèṅ. Tut gl'epiśòdi i èṅ lung sinc minùt.
La prima stagiòṅ l'è dal 2004 ma pò, par via dal sucès grand ch'al gh'à abû, i aṅ cuntinuâ incóra faghénd atri tri stagiòṅ, tuti cun sinquànta-dū puntàdi. In Itâglia i èṅ traśmìs p'r i canài Rai YoYo e Disney Junior.
Descrisiòṅ
Al cartòṅ animâ al cònta la vita dla prutagunìsta Peppa Pig, na nimàla śóvna, dla sò famìja e di sò amìg, tut bèsti cuma lē ma minga di nimàł a part la sò famìja ch'l'è fata da sò màdar (Mama Rója), da sò pàdar (Papà Ninét) e da sò fradèl pìcul (George Ninèṅ). Tut i persunàǵ i s cumpórtan cuma di óm (i gh'aṅ di vistî adòs, i guìd'n al màchini, i vìv'n in dal cà) ma anc cuma dal bèsti. Par dir-'n una, la famìja dla Peppa Pig la taca da spés a dascórar faghénd prima di grugnî o la s dasténd vluntéra in dal puci pîni ad śmalta parchè i gh càtan gust.
I nóm di persunàǵ i tàcan sèmpar cun la létra ch'a gh'è a 'l inìsi di nóm dal bèsti in Ingléś ch'i èṅ:
- Peppa Pig (Pig → Busgàt);
- Rebecca, Richard, Rosy e Robby (Rabbit → Cunèṅ);
- Suzy (Sheep → Pégura);
- Danny (Dog → Caṅ);
- Zoe, Zuzu e Zaza (Zebra → Śébra);
- Candy (Cat → Gat);
- Pedro (Pony → Pòny);
- Emily (Elephant → Elefànt);
- Delfine e Didier (Donkey → Àśan);
- Freddy (Fox → Vólp);
- Kylie (Kangaroo → Cangûr);
- Wendy (wolf → Lóv);
- Belinda (Bear → Órs);
- Simon (Squirrel → Scujàtul);
- Gabriella (Goat → Cavra);