Crocodilia
Crocodilia es un ordina de retiles xasante, semiacual, e grande. Los ia apare 95 milion anios ante aora en la periodo cretasica. Con la avias, los es la sola survivores conoseda de la arcosauria. Los sembla lezardos ma es grande, forte, e durante. Los ave tipal becos longa e plata, codas alga plata, e oios, oreas, e narinas a la alta de la testa. Los nada bon e pote move sur tera en du modos - pasea alta e basa - e spesies plu peti es an capas de galopa. Sua pel es spesa e covreda en scamas no supraponeda. Los ave dentes cono cavilin e un morde potiosa. Sua cor ave cuatro cameras e, simil a avias, los ave un sistem de flue de aira de un dirije par anelos en la pulmones, ma, como otra retiles, los es ectotermos, pd los ave sangue fria.
Crocodilias es trovada prima en teras basa en la tropicos, ma aligatores abita ance en la SUA sude-este e la Rio Yangtze en Xina. Jeneral, los es carnivores, e la spesies variosa come pexes, crustaseos, moluscos, avias, e mamales. Los es tipal solitar e teritorial, an si los pote coopera en come. Cuando cortea, la mases dominante atenta monopoli la femas disponable. La femas pone sua ovos en bucos o en montones e, no como la plu de otra retiles, los cura per sua enfantes.
Alga spesies de crocodilias ia ataca umanas. La cuantia la plu grande de atacas es de la crocodil de la Rio Nilo. Umanas es la menasa la plu grande a poplas de crocodilias par sua ativias como xasa e destrui de abitada, ma la eleva de crocodilias ia redui multe la comersia nonlegal en peles savaje. Depintas e scultas de crocodilias ia apare en cultures umana tra la mundo a min de Egipte antica. La nota la plu vea de la fable ce crocodiles plora per sua vitimes ia es en la sentenio 9; plu tarda, lo ia es sperdeda par John Mandeville en 1400 e alora par William Shakespeare en la sentenio 16.
Tasonomia[edita | edita la fonte]
- Familia Crocodilido — 3 jeneras, 14 spesies.
- Familia Aligatorido — 4 jeneras, 8 spesies.
- Aligator
- Paleosuco (caimanes nano e con fronte lisa)
- Caiman
- Melanosuco (caiman negra)
- Familia Gavialido — 2 jeneras, 2 spesies.