Remoucaire
Un remoucaire es un naviri relativament pichon, mai fòrça poderós e manejable. Es destinat a guidar, tirar ò possar lei gròs naviris qu'intran e que sortisson dei pòrts. De remoucaires especiaus, pus poderós, son utilizats per tirar de plataformas petrolieras ò de naviris en dificultat en plena mar.
Istòria
[modificar | Modificar lo còdi]
L'aparicion dau remoucaire es liada a aquela de la maquina de vapor. Per exemple, lo 21 de decembre de 1736, Jonathan Hulls depausèt un brevet per un naviri de vapor destinat a ajudar lei manòbras dei vaissèus dins lei pòrts e dins lei ribieras ò en l'abséncia de vent. La propulsion èra assegurada per un motor Newcomen. Pasmens, lo projècte foguèt jamai realizat e lo premier remoucaire foguèt construch en 1802 per William Symington. Èra un pichon naviri principalament destinat a mostrar l'interès dau motor de vapor. D'una longor de 15 m, foguèt capable de tirar doas gabarras lòng d'un canau en despiech d'un vent contrari. Après aqueu succès, lo concèpte de remoucaire s'impausèt pauc a cha pauc dins lei país desvolopats.
Lei foncions dei remoucaires
[modificar | Modificar lo còdi]Lei remoucaires modèrnes son de naviris especializats dins un pretzfach donat car lei missions fisadas ai remoucaires modèrnes son fòrça divèrsas. Lo servici portuari es la mission pus frequenta. Consistís a ajudar lei naviris durant leis operacions d'intrada e de sortida dau pòrt e, sovent, d'acostament. Son ansin de naviris pichons de 25 a 35 m de longor, mai dotats de motors fòrça poderós (1,5 a 4 MW) equipats de propulsors orientables. Aquò permet ai remoucaires portuaris de tirar ò de possar de naviris pesants dins d'espacis reduchs.
Lo remoucatge de gabarras marchandas es l'autra mission importanta dei remoucaires. Aquò permet d'avitalhar de zònas maritimas isoladas ò de tirar de cargaments importants dins lei ribieras. Aquelei pretzfachs son menats per de remoucaires fòrça diferents car dèvon s'adaptar de condicions de navegacion particularas. Dins lo domeni maritim, lei remoucaires costiers son de naviris de 15 a 40 m que tènon una poissança motritz de 750 a 3 000 kW. Dins lei fluvis, lei remoucaires dèvon s'adaptar a de prefondors limitadas a de passatges de pònt qu'impausan sei condicions per l'autor maximala dei naviris.
Enfin, lei remoucaires de sauvament en plena mar son de naviris pichons e mejans (fins a 50 m) equipats de motors d'una poissança considerabla (5 a 15 MW). Son destinats a la recuperacion de naviris en destressa. Pòdon tanben èsser utilizats per lo remorcatge de cargas pesantas coma de plataformas petrolieras. En certanei zònas reglementadas, per exemple la lòna de Venècia, lei naviris dèvon egalament èsser escortats per de remoucaires.
Annèxas
[modificar | Modificar lo còdi]Liames intèrnes
[modificar | Modificar lo còdi]Bibliografia
[modificar | Modificar lo còdi]- (en) M. J. Gaston, The Tug Book, Haynes Publishing, 2002, 242 p.