1 Orait na Jop i bekim tok bilong Bildat olsem, 2 “Olaboi, ating yu hapman tru bilong helpim ol man i no gat strong. 3 Na ating yu hapman bilong givim tingting long ol man i no gat gutpela tingting na save. Mi harim yu autim planti skul i gutpela tru. 4 Spirit bilong husat i bin kirapim tingting bilong yu na helpim yu long autim ol dispela tok?

5-6 “Maski ol man i dai pinis i stap long ples bilong ol aninit long solwara, ol i no inap hait long God. Ol i stap ples klia long ai bilong God, na taim em i lukluk long ol, ol i save pret na guria moa yet. 7 God i bin wokim skai na i putim i stap, na i no gat wanpela samting i holim skai i stap antap. Na tu, God i bin mekim dispela graun i hangamap nating. I no gat wanpela samting i holim graun i stap long ples bilong en. 8 God i save putim wara long ol bikpela klaut bilong en na pasim wara i stap. Dispela wara i hevi tumas, tasol hevi bilong wara i no save brukim ol klaut. 9 God i save mekim ol klaut i kam na haitim sia king bilong en. 10 Na em i bin putim mak i raunim arere bilong solwara olgeta. Na dispela mak em i ples tulait na tudak i save bung long en. 11 Taim God i kros, orait ol maunten na skai i save kirap nogut tru na i guria moa yet. 12 Bipo Rahap, dispela traipela snek masalai bilong solwara, i bin bikhet long God. Tasol long strong na gutpela save bilong em yet, God i bin daunim strong bilong Rahap, na tu em i bin mekim biksi i stap isi. 13 God yet i bin salim strongpela win i kam rausim ol klaut, na skai i lait gen. Na long han bilong em yet, God i bin sutim dispela traipela snek masalai i dai. 14 Dispela olgeta samting God i mekim ol i kamap, na yumi save lukim na pilim long en, em i soim yumi liklik hap tasol bilong bikpela strong bilong God. Na dispela i winim save bilong yumi. Olsem na sapos God i kamapim olgeta strong bilong en long yumi, bai yumi no inap tru long mekim wanpela tok. Nogat tru.”