Tzentru-Badde de Lòira

Artìculu in LSC

Posidura in Frantza

Bandera

Su Tzentru-Badde de Lòira (in frantzesu Centre-Val de Loire /sɑ̃tʁ badde də lwaʁ/; fintzas a su 17 ghennàrgiu 2015 denominadu Tzentru) est una de sas regiones de Frantza. Est partzida in ses dipartimentos e su cabulogu suo est Orléans. Sas tzitades printzipales de sa regione, in paris cun Orléans, sunt Bourges, Chartres, Châteauroux, Tours e Blois.

Est assentada in sos dipartimentos de: Cher (18), Eure-et-Loir (28), Indre (36), Indre e Lòira (37), Loir-et-Cher (41) e Loiret (45). Sunt inclùidos in sa regione 20 arrondissement, 198 cantones e 1842 comunas.

Su territòriu de sa regione tirat a 39.151 km² e contat unos 2.578.000 bividores. Làcanat cun su de sa Normandia in su norte e a nord-ovest, de Ìsula de Frantza in su nord-estu, de sa Borgogna-Franca Contea in s'estu, de s'Auvèrnia-Ròdanu-Alpes in su sud-estu, de sa Noa Achitània in su sud e in su sud-ovest e de sos Paisos de sa Lòira in s'ovest.

Si tratat de una regione assotziada meda a sa monarchia frantzesa, dae chi in s'annu 1418 sa famìlia reale si fiat installada a sa provìntzia de Touraine. In cunsighèntzia, sos casteddos de Amboise e de Blois ant passadu a èssere residèntzias reales suta sos rennos de Càralu VII, Luisi XII e Frantziscu I. Custu ùrtimu, in prus, aiat fatu fraigare un'àteru casteddu in sa regione, su casteddu de Chambord, pro su fraigu de su cale aiat incarrigadu a Leonardo da Vinci. Cun s'installatzione de sos diferentes res frantzesos in sa regione, fintzas numerosos nòbiles ant detzìdidu de si nche tramudare. De custa manera, unu nùmeru mannu de casteddos sunt istados fraigados a curtzu de sos rios Lòira, Cher e Indre. Intre custos casteddos nòbiles cheret ammentuados sos de Chenonceau e Azay-le-Rideau.