Raymond Ackerman

Raymond Ackerman (10 Maart 1931 - 6 September 2023) was die stigter van die Pick n Pay-supermarkketting en een van Suid-Afrika se suksesvolste kleinhandelaars. Hy het een van die mees sprekende voorbeelde van geslaagde entrepreneurskap in Suid-Afrika geword. Ackerman se doel was altyd gemeenskapsbetrokkenheid, diens aan die samelewing en die nastrewing van familiewaardes en daarna eers die winsmotief.

Raymond Ackerman
Gebore	Raymond David Ackerman 10 Maart 1931
Sterf	6 September 2023 (op 92)
Nasionaliteit	Suid-Afrika
Beroep	Handelaar
Bekend vir	Stigter van die Pick n Pay
Eggenoot	Wendy
Kinders	Suzanne, Kathryn, Jonathan en Gareth

Opleiding

Raymond David Ackerman is op 10 Maart 1931 gebore. Net na die Eerste Wêreldoorlog stig sy pa Gus met enkele vennote die winkelgroep Ackermans. In 1940 word die firma verkoop aan Greatermans. Nadat hy die B.Com.-graad aan die Universiteit van Kaapstad behaal het, begin Raymond op 20-jarige ouderdom by die firma Ackermans te werk. Kort daarna is hy verplaas na die hoofkantoor van Greatermans in Johannesburg.

Die winkels

In die vroeë 1950's ontstaan daar selfbedieningswinkels in Suid-Afrika. Greatermans stig gevolglik sy Checkers-voedselkettingwinkels met Raymond Ackerman aan die hoof. Op slegs 35-jarige ouderdom is hy die hoofbestuurder van 85 Checkers-winkels. Weens meningsverskille met sy baie ouer kollegas word hy in 1966 as direkteur ontslaan. Dit word sedertdien beskou as een van die grootste flaters wat ooit in die Suid-Afrikaanse sakewêreld begaan is. Raymond Ackerman was daarna werkloos. Met sy spaargeld, geld geleen van vriende en die bank koop hy vier winkels met 'n personeel van 175 van Jack Goldin in Kaapstad wat handeldryf onder die naam Pick 'n Pay.

Onder Ackerman se leiding groei Pick 'n Pay tot Afrika se grootste supermarkketting. Die firma het in 2006 'n omset van R60 miljard behaal. Die hele ketting bestaan uit ongeveer 800 supermarkte, hipermarkte en konsessiewinkels. In totaal het die hele groep 'n personeelkorps van meer as 70 000 versprei oor die hele Afrika en Australië.

Sy gesin

Pick 'n Pay is 'n sakereus wat as 'n familiebedryf bestuur word. Sy vrou Wendy en hul vier kinders, Suzanne, Kathryn, Jonathan en Gareth, werk almal by Pick 'n Pay of die liefdadigheidsprojekte. Op 21 Oktober 2009 het Gareth Ackerman sy pa se pligte oorgeneem en op 1 Maart 2010 tree Raymond as voorsitter af en neem Gareth ook daardie amp oor.

Verbruikersregte en gemeenskapsbetrokkenheid

Ackerman beywer hom voortdurend vir die regte van die verbruiker. Hy stry met Anton Rupert oor goedkoper sigarette en met die regering oor die broodprys. Sy grootste geveg was met die owerhede om die prys van petrol te dereguleer, maar dit was onsuksesvol. Om pryse laag te hou, voer sy firma handelsmerklose produkte in. Die Ackerman-gesin se ondersteuning van die Rooi Kruis-kinderhospitaal dateer al terug tot 1956 toe Gus Ackerman al by 'n fondsinsameling vir die hospitaal betrokke was. In 2006 het die Ackermans 'n bedrag van R4 miljoen aan die hospitaal geskenk. Pick 'n Pay was baie nou betrokke by Kaapstad se bod om die Olimpiese Spele van 2004 na Suid-Afrika te lok. Op 14 Februarie 2005 is die Raymond Ackerman Akademie vir die Ontwikkeling van Entrepreneurskap aan die Universiteit van Kaapstad geopen. Die doel daarmee is die ontwikkeling van sakevaardighede, die opleiding van toekomstige bestuurders en veral toekomstige leiers in Suid-Afrika.

Vererings

Die Rhodes-universiteit het in 1986 'n eredoktorsgraad in die regte aan hom toegeken. Sy alma mater, die Universiteit van Kaapstad, vereer hom in 2001 met 'n eredoktorsgraad in die handelswetenskappe. Daar is in 'n opname bepaal dat hy deur Suid-Afrikaners gesien word as een van die 100 mense wat die grootste invloed in die 20ste eeu op die land gehad het. In 2004 is 'n ranglys opgestel van belangrike Suid-Afrikaners. Hy was die 79ste. In November 2004 was hy in 'n opname deur die Financial Times die enigste Suid-Afrikaner onder die wêreld se 100 grootste sakeleiers. In Suid-Afrika en die wêreld se sakekringe word hy in dieselfde asem genoem as Harry Oppenheimer en Anton Rupert.

Boeke

Raymond Ackerman het drie boeke gepubliseer oor sy ervaringe en met advies aan jong entrepreneurs.

• Ackerman, Raymond: Hearing Grasshoppers Jump. The story of Raymond Ackerman as told to Denise Pritchard. Kaapstad: David Philip, 2004. ISBN 0-86486-662-3
• Ackerman, Raymond: The Four Legs of the Table. Raymond Ackerman's simple, straight-forward formula for success as told to Denise Pritchard. Kaapstad: David Philip, 2005. ISBN 0-86486-617-8
• Ackerman, Raymond: A Spat to Catch a Mackerel. Key Principles to build your business. Kaapstad: Jonathan Ball, 2010. ISBN 978-1-86842-369-9

Bibliografie

• Gerber, Amelda: Entrepreneurs kry nuwe leerskool. Raymond Ackerman verskaf geld om sentrum by sakeskool te vestig. Die Burger, 15 Februarie 2005.
• Die Burger, 9 Maart 2006
• La Vita, Murray: Mister A. moet nou groet. Die Burger, 12 Maart 2010.