Andries Buys
![](https://upload.wikimedia.org/wikipedia/af/thumb/4/42/Andries_Buys.jpg/200px-Andries_Buys.jpg)
Andries Johannes Buys (Burgersdorp, 24 Februarie 1893 – onbekend) was ’n prokureur en plaaslike leier in die Nasionale Party.
Buys se ouers was Barend Rudolph en Levina Susanna Lasya Kruger. Die stamvader, Barend Buys, het in 1716 na die Kaap die Goeie Hoop gekom in diens van die Verenigde Oos-Indiese Kompanjie. A.J. Buys se vader het in die Tweede Vryheidsoorlog as Kaapse Rebel geveg en onder meer te Stormberg geveg. Hy was ’n dienaar in die Gereformeerde kerk Aliwal-Noord.
Andries Buys het aan die Gereformeerde Christelike Skool op Burgersdorp skoolgegaan en later aan die hoërskool op Aliwal-Noord, waarheen sy broer Stephanus in 1912 verhuis het. Sy wetseksamen het hy by N.E. Smuts & kie afgelê en is in 1917 toegelaat. In dieselfde jaar het hy in diens getree van G.P. Steyn op Willowmore. In 1919 het hy op Steytlerville (in vennootskap met Steyn) ’n onderneming begin en dit in 1921 oorgeneem. Hy het van 1919 af aktief aan die Nasionale Party deelgeneem en was onder meer sekretaris van die dorpstak en die distriksbestuur, ’n amp wat hy jare lank beklee het.
Buys is in September 1919 op Zastron in die Oranje-Vrystaat met Elizabeth Magaritha van der Walt getroud. Drie kinders is uit die huwelik gebore.
Bron
[wysig | wysig bron]- (af) (en) Reitz, Hjalmar en Oost, Harm (reds.), Goodman, I.M. (samesteller). 1931. Die Nasionale Boek. 'n Geskiedenis van die ontstaan en groei van die Nasionale Party van Suid-Afrika en wat dit bereik het, tesaam met belangwekkende Artiekels in verband daarmee. Johannesburg: Nasionale Boek Maatskappy, 1931.