Blu-ray-skyf
![](https://upload.wikimedia.org/wikipedia/commons/thumb/1/14/Blu-ray_Disc.svg/220px-Blu-ray_Disc.svg.png)
![](https://upload.wikimedia.org/wikipedia/commons/thumb/c/cb/Blu-Ray_High_Fidelity_Pure_Audio.svg/220px-Blu-Ray_High_Fidelity_Pure_Audio.svg.png)
![](https://upload.wikimedia.org/wikipedia/commons/thumb/d/dd/IFA_2005_Panasonic_BDP_100_Blu-ray_Disc_Player_%28by_HDTVTotalDOTcom%29.jpg/220px-IFA_2005_Panasonic_BDP_100_Blu-ray_Disc_Player_%28by_HDTVTotalDOTcom%29.jpg)
Die Blu-ray-skyf (afkorting: BD, van Engels Blu-ray disc, letterlik "Bloustraalskyf") is 'n standaard vir hoë-resolusie-DVD-rolprente. 'n Oorspronklik mededingende formaat, High-Definition-DVD, is onder meer deur Toshiba bemark, maar intussen gestaak. In Maart 2016 is 'n nuwe formaat - Ultra HD Blu-ray - op die mark ingevoer wat video-inhoud met 4K-resolusie en hoë dinamiese omvang (HDR) kan stoor en weergee.
Blu-ray-tegnologie en -spelers is gemik op die verbruikersmark, terwyl professionele gebruikers twee variante ter beskikking sal hê - die Professional Disc for Data (PDD), wat as stoormedium vir gewone gegewens dien, en die Professional Disc for Broadcast (PDB), wat as medium vir die uitsaaibedryf ontwikkel is.
Die tegniese besonderhede van die Blu-ray-skyf is op 19 Februarie 2002 deur die nege stigterslede van die Blu-ray Group vasgelê; naas Matsushita, Pioneer, Philips, Sony, Thomson, LG Electronics, Hitachi, Sharp en Samsung het ook Dell, Hewlett-Packard, Apple en meer as 150 ander ondernemings by die vereniging aangesluit. Die Blu-ray Forum dien as organisatoriese raamwerk van die groep.
Blu-ray-spelers en -sagteware
[wysig | wysig bron]![](https://upload.wikimedia.org/wikipedia/commons/thumb/6/62/Blu-ray_regions_with_key.png/220px-Blu-ray_regions_with_key.png)
Die eerste Blu-ray-spelers en -skywe het in 2006 op die Europese markte verskyn. Met pryse van meer as 1 000 € vir spelers en 30 € vir rolprente het die nuwe formaat aanvanklik 'n luukseproduk vir video-entoesiaste gebly. Sagteware-pryse in Noord-Amerika het egter reeds in laat 2006 tot omtrent 20 VSA-$ gedaal, en in September 2009 het die markprys vir intreevlak-spelers tot minder as $150 of €150 gedaal. Omstreeks 2014 word Blu-ray-spelers as produkte vir die massamark vervaardig en aangebied, met pryse vanaf €50 vir intreevlak-spelers en tegniese verbeteringe soos driedimensionale weergawe in meer gesofistikeerde spelers.
Enkele vervaardigers soos Denon, Marantz, Pioneer, Oppo (produksie word in die lente van 2018 gestaak) en Cambridge Audio bied sogenaamde universele spelers vir klankentoesiaste aan wat van hoëtrou-kpmponente voorsien word om naas Blu-ray ook oudiofiele klankformate soos Super Audio CD en DVD-Oudio asook gewone CD weer te gee. Panasonic het in 2009 die eerste draagbare Blu-ray-speler ingevoer.