British Rail
| British Rail | |
 | |
| Tipe | Staatsonderneming |
|---|---|
| Gestig | 1948 |
| Hoofkantoor | Londen, Engeland, .svg){kind=small} Verenigde Koninkryk
|
| Gebied bedien | Groot-Brittanje |
| Industrie | Spoor- en seevervoer |
| Moedermaatskappy | British Transport Commission (1948–1962), British Railways Board (1962–2001) |
| Ontbind | 2000 |
British Railways (BR), wat vanaf 1965 as British Rail bekend gestaan het, was tussen 1948 en 1997 die grootste spoorwegmaatskappy in Groot-Brittanje. BR is met die nasionalisering van die vier groot Britse spoorwegondernemings (Big Four) as 'n staatsonderneming gevorm en het tot sy geleidelike privatisering tussen 1994 en 1997 spoorvervoerdienste op nasionale vlak gelewer. BR was oorspronklik slegs 'n handelsmerk van die Britse Vervoerkommissie (British Transport Commission, BTC) se Spoorwegraad (Railway Executive). In 1962 het dit as British Railways Board 'n onafhanklike geïnkorporeerde maatskappy geword.
Tydens die proses van nasionalisering is die nasionale spoorwegnet ingrypend verander. So is stoomlokomotiewe in die jare tot 1968 volledig deur elektriese en dieselaangedrewe lokomotiewe vervang, behalwe vir 'n smalspoorroete wat as toeristeaantreklikheid voortbestaan het. Passasierdienste het vragvervoer as die belangrikste bron van inkomste vervang, terwyl 'n derde van die spoorwegnetwerk volgens Dr Richard Beeching se herontwikkelingsprogram vir die Britse spoorwegbedryf in die 1960's gesluit is.
British Rail se dubbelpylkenmerk is uit twee met mekaar verbonde rigtingpyle gevorm wat die twee reisrigtings op 'n dubbelspoor aandui. Dit het vervolgens die bynaam "die pyl van besluiteloosheid" gekry. Dit word in Groot-Brittanje steeds algemeen op straatborde gebruik om spoorwegstasies aan te dui en – as deel van die Vereniging van Spoorwegondernemings (Association of Train Operating Companies) se gemeenskaplik bestuurde National Rail-handelsmerk – op treinkaartjies afgedruk.