Kaiserstuhl
Die Kaiserstuhl is 'n geïsoleerde bergreeks van vulkaniese oorsprong wat op 'n hoogte van 557 meter bo seevlak soos 'n eiland uit die Borynvlakte in die suidweste van die Duitse deelstaat Baden-Württemberg verrys.
Geografie
[wysig | wysig bron]Die Kaiserstuhl lê in die distrik Breisgau-Hochschwarzwald van die gebied Suid-Baden, noordwes van Freiburg im Breisgau en oos van die Ryn. Dit verrys teen 'n gemiddelde hoogte van 355 meter bo die Bo-Rynse vlakte. Die bergreeks bereik 'n maksimale lengte van sowat 16 kilometer en is maksimaal 12,5 kilometer wyd. Drie klein stede en agttien dorpe is in die gebied geleë.
Die hoogste bergpieke is die Totenkopf (557 meter), die Eichelspitze (520 meter) en die Katharinaberg (492 meter). Die natuurbewaringsgebied Badberg lê in die hartland van die Kaiserstuhl, tussen die dorpe Schelingen, Oberbergen en Alt-Vogtsburg, is 'n belangrike habitat vir baie seldsame plante en bied vanuit se wandelpaaie verruklike uitsigte oor die Swartwoud, die Rynvlakte en die Franse Vogese-bergreeks.
Etimologie
[wysig | wysig bron]Die bergreeks het sy naam, wat letterlik "stoel van die keiser" beteken, vermoedelik aan koning Otto III te danke, wat in die dorp Sasbach by die Kaiserstuhl in 994 - net twee jaar voor sy kroning as keiser van die Heilige Romeinse Ryk - 'n sittingsdag gehou het.
Geologie
[wysig | wysig bron]Die Kaiserstuhl word in geologiese opsig deur 'n baie heterogene struktuur gekenmerk. Die westelike gedeelte het as gevolg van vulkanisme ontstaan, terwyl die oostelike gebied deel uitmaak van die voorgebergte met sy lae van kalkgesteentes.
Die uiters vrugbare plaaslike lössbodem bied geleentheid vir intensiewe landbou.
Klimaat
[wysig | wysig bron]
Die Kaiserstuhl is die warmste gebied in Duitsland en word plek-plek selfs deur 'n Mediterreense klimaat gekenmerk. Die bergreeks verskil met sy baie warm en droë weerstoestande sterk van sy omgewing, veral omdat dit in die reënskadu van die Vogese lê en ook onder die klimatiese invloed van die Boergondiese Poort kom. Die Kaiserstuhl se klimaat vergelyk dus met droë gebiede langs die Middellandse See.
Die gemiddelde jaarlikse temperatuur is 9,9 °C, en daar is jaarliks tussen vyftig en sestig baie warm somerdae en sestig tot sewentig winterdae met temperature benede vriespunt. Die gemiddelde jaarlikse temperatuurskommeling van 18,5 °C is een van die hoogstes in Duitsland. Die gemiddelde jaarlikse reënval is 600 tot 700 millimeter, en die bergreeks het jaarliks 1 720 sonskynure.
Vanweë die kombinasie van vulkaniese lössbodem, wat tot 'n diepte van sowat dertig meter strek, met 'n warm klimaat is die Kaiserstuhl uiters geskik vir wyn- en vrugtebou.
Flora en fauna
[wysig | wysig bron]
Die Kaiserstuhl se klimaat verklaar die voorkoms van baie plante- en dierspesies wat gewoonlik net aan die warmer gebiede van die suidelike Europa inheems is. Die Kaiserstuhl staan bekend vir sy groot verskeidenheid orgidee, waarvan sowat dertig spesies geregistreer is. Tussen die wingerde groei wilde druiwehiasinte (Muscari neglectum) en teen die hellings is swaardlelies volop. Hierdie en ander xerofiete, plante wat eintlik net aan die warmer streke van Suid-Europa inheems is, is oorblyfsels van 'n warm tydperk, wat op 'n Ystydperk gevolg het. Ná die einde van die warm tydperk, wat ook in die Kaiserstuhl tot duidelik hoër temperature gelei het, kon hierdie spesies nog slegs in hierdie gebied oorleef.
Ekonomie
[wysig | wysig bron]Die Kaiserstuhl en sy omgewing is gebiede van intensiewe wynbou, en die plaaslike wyne het al wêreldfaam. Die wingerde is in die besit van wynboukoöperasies, privaat wyngoedere of privaateienaars. Die eerste wingerde in die gebied is deur die Romeine aangelê. Vandag beslaan die wyngerde 'n oppervlak van meer as 4 000 hektaar, en die Kaiserstuhl lewer sowat 'n derde van die wynproduksie in die gebied Baden.
'n Ander belangrike landbouproduk van die gebied is aspersie, wat net soos wyn voordeel uit die plaaslike klimaattoestande trek. Die jaarlikse opbrengs in die Kaiserstuhl en sy omgewing beloop 250 000 ton.
Emigrasie
[wysig | wysig bron]Emigrante uit die Kaiserstuhl-gebied het in 1843 die Venezolaanse kolonie Colonia Tovar gestig.
