Ochsenhausen

Ochsenhausen (Duitse uitspraak: ɔksn̩haʊ̯zn̩) is 'n stad in die Biberach-distrik, Baden-Württemberg, Duitsland, geleë in die hartland van Bo-Swabe. Die grootste nabygeleë nedersettings is Biberach en Memmingen. Dit beskik oor 'n bevolking van 8 856 (soos op 31 Desember 2018). Naas sy hoë lewensgehalte en toeristiese waarde (Ochsenhausen word amptelik as herstellingsoord erken) word die stad deur 'n florerende ekonomie gekenmerk. In die plaaslike groot aanleg van Liebherr (Liebherr-Hausgeräte Ochsenhausen GmbH), een van die grootste vervaardigers van koel- en vrieskaste in Duitsland en belangrike rolspeler op die wêreldmark met 'n jaarlikse omset van meer as €10 miljard, vervaardig bykans 2 000 medewerkers jaarliks meer as 800 000 toestelle.

Ochsenhausen is langs 'n argitektoniese en kulturele toerismeroete geleë, die Oberschwäbische Barockstraße of Bo-Swabiese Barokroete wat oor 'n afstand van 500 km tussen Ulm en Friedrichshafen aan die Bomeer (Bodensee) loop. Vanweë die digtheid van eersterangse monumente van barokargitektuur word na die streek ook verwys as die «Hemelryk van Barok». Ochsenhausen se eie barokjuweel is die grootskaalse kloosterkompleks, 'n voormalige Ryksabdy van die Benediktyne-orde.

Geskiedenis

Die Ryksklooster Ochsenhausen (Reichskloster Ochsenhausen, die eerste keer vermeld in 1093) was vir baie eeue 'n selfregerende prinslike abdy binne die Heilige Romeinse Ryk wat deur 'n Ryksprelaat ('n ab wat net aan die keiser ondergeskik en dus «ryksvry» was) regeer is, waarby die oppervlakte van sy omliggende besittings sowat 250 km² beloop het.

In 1803, tydens die verloop van die groot territoriale herstrukturering wat tussen 1802 en 1814 in Duitsland en die aangrensende streek plaasgevind het, was die abdy gesekulariseer en omvorm tot 'n sekulêre prinsdom wat aan Hertog Franz Georg Karl von Metternich verleen is ter vergoeding vir die verlies van sy Ryksvrye (Reichsfreiheit of Reichsunmittelbarkeit (In Afrikaans: Ryksvryheid), was 'n bevoorregte grondwetlike en politieke status wat gewortel was in die Duitse feodale reg; ingevolge waarvan keiserlike landgoedere van die Heilige Romeinse Ryk, soos byvoorbeeld keiserlike stede, prinsbiskop-ryke en sekulêre owerhede, en individue soos die keiserlike ridders; vry verklaar is van die gesag van enige plaaslike heer en onder die direkte ("onmiddellik", in die sin van "sonder 'n tussenganger") gesag van die Heilige Romeinse keiser, en later van die instellings van die Ryk soos die Dieet (Reichstag) en die Rykskamer van Justisie, geplaas is) feodale landgoedere op die linkeroewer van die Ryn, nadat die area deur rewolusionêre Frankryk geannekseer is. In 1806 is die prinsdom by die Koninkryk van Württemberg gevoeg, wat in 1871 deel geword het van die Duitse Keiserryk.

Die abdy bied 'n goeie uitsig oor die stad vanaf sy dominante posisie op 'n heuwel.

Besienswaardighede

Elke jaar vind die Öchsle-Fest plaas. Dit is vernoem na 'n historiese smalspoor treinspoor genaamd Öchsle wat van Ochsenhausen na Biberach geloop het.

• Kirche St. Georg (kerk)
• Krummbach (kunsmatige stroom)
• Rathaus, 1606
• Gasthof zur Post, 1650
• Klosterapotheke, 1736
• Gottesackerkapelle St. Veit, 1679 (kapel)
• Die musiek - en kabaretverhoog Scharfrichterhaus
• Dr.-Hans-Liebherr-Sporthalle, 2010 (gimnasium/sportsaal)

Noemenswaardige mense

• Anton Schranz (1769 - 1839), hoof van die Schranz-familie van kunstenaars wat in Minorca, Malta, Egipte, Athene, Griekeland en Turkye gewerk het.
• Joseph Ersing (1882–1956), politikus (Sentrum Party (Duitsland), CDU), lid van die Reichstag, lid van die Landtag (Württemberg-Baden)
• Josef Hecht (1882–1956), onderwyser en omgewingsbewaarder
• Hans-Karl Riedel (1893–1967), entrepreneur en plaaslike politikus
• Werner Simmling (gebore in 1944), politikus (FDP), lid van die Bundestag 2009-2013
• Hanns-Friedrich Kunz (gebore 1945), sanger en koordirigent
• Gerhard Baur (gebore 1947), bergklimmer en kameraman
• Hans J. Briegel (gebore 1962), teoretiese fisikus
• Matthias Dolderer (gebore 1970), vlieënier (resies)
• Sandro Cortese (gebore 1990), motorfiets renjaer
• Nicole Rolser (gebore 1992), voetbal (sokker) speler

Eksterne skakels

• Wikimedia Commons het meer media in die kategorie Ochsenhausen.
• Webwerf van die stad

Notas

Hierdie artikel is in sy geheel of gedeeltelik vanuit die Engelse Wikipedia vertaal.