Vlag van Fidji
![]() |
|
Gebruik | Burgerlike- en Staatsvlag ![]() |
---|---|
Verhouding | 1:2 |
Goedgekeur | 10 Oktober 1970[1] |
Ontwerp | ’n Blou Britse vaandel met die eiland se wapenskild op die wapperkant. |
Die nasionale vlag van Fidji is op 10 Oktober 1970 in gebruik geneem. Die vlag vertoon ’n ligblou blou Britse vaandel met die wapen van die eiland op die wapperkant.
Simboliek
[wysig | wysig bron]Die ligblou agtergrond stel die Stille Oseaan, wat ’n belangrike rol in die lewe van die eilandbewoners vervul in terme van die vissery- en toerismebedrywe, voor. Die Unievlag reflekteer die land se bande met die Verenigde Koninkryk. Die skild is afgelei van die land se wapenskild wat aanvanklik in 1908 deur ’n Koninklike Bevel aan die eiland toegestaan is. Dit is ’n wit skild met rooi kruis en ’n rooi hoof (boonste derde van die skild). Die beelde in die skild verteenwoordig die landbouaktiwiteite op die eiland en die historiese verbintenisse met die Verenigde Koninkryk. Bo in die skild hou ’n Britse leeu ’n kokosneut in sy kloue. Links bo, onder die rooi hoof, is suikerriet, regs bo is ’n palmboom, links onder is ’n vredesduif en regs onder is ’n tros piesangs.
Geskiedenis
[wysig | wysig bron]Die huidige vlag is soortgelyk aan die koloniale vaandel voor onafhanklikheid. Die grootste verskille is dat die koloniale vaandel ’n donkerder blou gebruik het en die volledige wapen vertoon het, in plaas van slegs die wapenskild. Hoewel sommige reformiste die Unievlag verwyder wil hê (hulle sien dit as ’n koloniale embleem) is daar andere wat dit wil behou ter wille van die historiese verband. Die vlae van ander onafhanklike lande soos Australië, Nieu-Seeland en Tuvalu het die Unievlag in hul onderskeie vlae behou.
![Volle wapen van Fidji](https://upload.wikimedia.org/wikipedia/commons/thumb/c/c7/Coat_of_arms_of_Fiji.svg/150px-Coat_of_arms_of_Fiji.svg.png)
’n Paar invloedryke Fidjiane het ook al gevra vir die terugkeer van die volle wapen op die vlag. Op 20 November 2005 het Fidji se Opperraad van Stamhoofde gevra dat die twee krygers wat die skild ondersteun het, weer op die vlag geplaas word saam met die miniatuur kano en die nasionale leuse, Rerevaka na kalou ka doka na tui (“Vrees God en eer die Koningin”) — simbole wat op die oorspronklike vlag van die Koninkryk Viti, die eerste verenigde Fidjiaanse staat wat in 1871 onder leierskap van Seru Epenisa Cakobau geskep is, verskyn het.
Volgens Asesela Sadole, Algemene Sekretaris van die Opperraad van Stamhoofde, is “die wapen betekenisvol omdat dit die woord van God bevat, omdat die twee krygers daar is en so ook die Fidjiaanse kano. Ek is van mening dat die raadslede verkies dat die volle wapen by die Fidjiaanse vlag ingesluit word.”
Voor Britse regering in 1874 het die regering van Fidji ’n nasionale vlag aanvaar met twee vertikale bane in wit en blou en ’n rooi skild in die middel waarop ’n wit duif verskyn het.[2] Die gebruik van hierdie vlag is gestaak toe die koloniale era begin het en Fidji se onafhanklikheid prysgegee is. Fidji was van 1874 tot 1970 ’n Britse kolonie.
Voorstel vir ’n nuwe vlag
[wysig | wysig bron]Die Eerste Minister, Kommodoor Frank Bainimarama, het in sy nuwejaarsdagtoespraak van 2013 aangekondig dat die vlag verander sou word om “die gevoel van nasionale vernuwing te weerspieël, om ’n nuwe Fidjiaanse identiteit te versterk en nuwe vertroue te stel om ’n Fidjiaan op die globale verhoog te wees”. Die verandering in die vlag sal gepaard gaan met die aanvaarding van ’n nuwe grondwet, soos voorgeneem deur Fidji se militêre leier (wat in 2006 deur ’n staatsgreep aan bewind gekom het) wat ’n “een mens, een stem”, nie-rassige en sekulêre dekomrasie onder militêre toesig wou vestig. ’n Paar weke vantevore is die afdruk van die Britse koningin van die republiek se geldeenheid verwyder.[3]
Op 3 Februarie 2015 het die Eerste Minister gesê dat die Fidjiaanse vlag verander gaan word.[4] ’n Nasionale vlagontwerpkompetisie sal gehou word met die doel om op 11 Oktober 2015, op die 45ste viering van onafhanklikheid, ’n nuwe vlag te kan hys.[5] Op 17 Augustus 2016 het Eerste Minister Bainimarama egter in die openbaar aangekondig dat die regering die planne om die vlag te verander, laat vaar. Hy lees 'n verklaring wat lui: "Terwyl ek persoonlik oortuig is dat ons sommige van die koloniale simbole van die vlag moet vervang met 'n werklik inheemse uitdrukking van ons hede en ons toekoms, het die regering sedert Februarie duidelik geword dat die vlag nie verander sal word in die afsienbare toekoms nie." [6] Die gewildheid van die vlag is versterk deurdat die land sy eerste Olimpiese goue medalje ooit onder sy vaandel tydens die 2016 Olimpiese Somerspele gewen het. Die besluit om die huidige vlag te behou, is deur opposisiepartye verwelkom.
Ander vlae
[wysig | wysig bron]-
Burgerlike vaandel van Fidji
-
Regeringsvaandel van Fidji
-
Vlootvaandel van Fidji
-
Vlag van die Fidjiaanse Burgerlike Lugvaart
-
Standaard van die President van Fidji
Soortgelyke vlae
[wysig | wysig bron]2015 Voorstelle
[wysig | wysig bron]
Verwysings
[wysig | wysig bron]- ↑ "Fidji" (in Engels). Flags of the World. Geargiveer vanaf die oorspronklike op 21 November 2000. Besoek op 15 Mei 2019.
- ↑ (en) Smith, Whitney "Vlag van Fidji". Encyclopædia Britannica. URL besoek op 15 Mei 2019.
- ↑ "Unievlag kan van Fidjiaanse vlag verwyder word". The Australian (in Engels). News Limited. AAP. 2 Januarie 2013. Geargiveer vanaf die oorspronklike op 1 November 2014.
- ↑ "Fidji gaan vlag verander, vervang koloniale simbole" (in Engels). Australiese Uitsaaikorporasie. 4 Februarie 2015. Geargiveer vanaf die oorspronklike op 19 November 2017. Besoek op 15 Mei 2019.
- ↑ "Fidji gaan Union Jack van vlag verwyder" (html) (in Engels). RTE News. 3 Februarie 2015. Geargiveer vanaf die oorspronklike op 9 Oktober 2019. Besoek op 15 Mei 2019.
- ↑ "Fiji PM says flag won't be changed" (in Engels). Radio New Zealand International. 18 Augustus 2016. Geargiveer vanaf die oorspronklike op 28 Maart 2019. Besoek op 18 Augustus 2016.
Eksterne skakels
[wysig | wysig bron]![]() |
Wikimedia Commons bevat media in verband met Vlae van Fidji. |
- (en) Fidji by Flags of the World.
- (en) "Flag of Fiji". Encyclopædia Britannica. Besoek op 15 Mei 2019.