Böozie

Charte vo Böozie

Böozie (noigriech. Viotía Βοιωτία, altgr. Transkripzioon Boiōtia), isch d Landschaft, wo dr griechisch Volksstamm vo de Boioter (Böotier) gläbt het. Dr Naame chunnt vo de Wäide für Rinder (altgriech. bous βべーたοおみくろんῦς ‚Rind‘) benannte, wo s in dr Antike dört gee het.

Vo 1833 bis 1943 isch Böozie e Däil vo dr Prefektur Attika-Böozie gsi, vo 1899 bis 1909 und schliesslig vo 1943 aa e äigeständigi Prefektur, vo 1986 aa in dr griechische Verwaltigsregion Middelgriecheland. 1974 het mä e baar Gmäinde an dr Küste in d Prefektur Euböa usgliideret. Mit dr Verwaltigsreform vo 2010 si d Kompetänze vo dr Prefektur an d Region Middelgriecheland übergange und an d Gmäinde, wo d Zaal von ene dur s Zämmeleege vo Gmäinde stark verchliineret worde isch. S Gebiet vo dr Prefektur existiert witer as Regionalbezirk Böozie (gr. Periferiaki Enotita Viotias), und schiggt elf Abgordneti in dr middelgriechisch Regionalroot, het aber sust käi politischi Bedütig mee.

Topografii

Böozie gränzt im Weste an Phokis, im Süde an dr korinthisch Golf, im Oste an dr Kithairon und im Norde an s opuntische Lokris. Dr Sund vo Euböa isch lang die natürligi Ostgränze gsi. S Gebiet isch im Norde hüügelig, im Süde gebirgig, drzwüsche lit en ebes Diefland. Die wichtigste Ort in dr Antike si Thebe und Haliartos gsi, Orchomenos, Thespiai (Thespiae) und Plataiai (Platää). Hütigi Hauptort si Thiva (s modärne Thebe) und Livadia. Böozie isch immer e binneländischs Agrarland gsi, au wenn s an siner Küste natürligi Hääfe gee het. Historischi und archeologischi bedütig häi au Akraiphia, Aulis, Eutresis, Gla, Leuktra, Siphai, Tanagra und Thisbe.

Litratuur

• Eugen Oberhummer, Friedrich Cauer: Boiotia (1). In: Paulys Realencyclopädie der classischen Altertumswissenschaft (RE). Band III,1, Stuttgart 1897, Sp. 637–663.
• Angela Kühr: Als Kadmos nach Boiotien kam. Polis und Ethnos im Spiegel thebanischer Gründungsmythen (Hermes. Einzelschrift Band 98), Stuttgart, Franz Steiner Verlag 2006, ISBN 978-3-515-08984-5.
• Robert J. Buck: A History of Boeotia, The University of Alberta Press, Edmonton, Alberta, Kanada 1979, ISBN 0-88864-051-X.

Weblingg

 Commons: Böotien – Sammlig vo Multimediadateie

• Historischi und archeologischi Informazioone über s antike Böozie

Fuessnoote

Dä Artikel basiert uff ere fräie Übersetzig vum Artikel „Böotien“ vu de dütsche Wikipedia. E Liste vu de Autore un Versione isch do z finde.