Cem Özdemir

Dialäkt: Undermarkgreflerisch

Cem Özdemir (2016)

Dr Cem Özdemir (* 21. Dezämber 1965 z Bad Urach) isch e dytsche Bolitiker (Bindnis 90/Di Griene un syt em 8. Dezämber 2021 Bundesminischter fir Ernehrig un Landwirtschaft im Kabinett Scholz.

Är isch vu 2008 bis 2018 ein vu zwei Bundesvorsitzende vu dr Bartej gsii.

Läbe un Beruef

Dr Özdemir isch dr Suhn vun ere dirkische Gaschtarbeiterfamilie; är het 1983 di dytsch Staatsburgerschaft aagnuu. No dr Mittlere Ryyfi het er e Uusbildig zum Erzieher gmacht. Derno het er d Fachhochschuelryyfi gmacht un e Sozialpädagogik-Studium an dr „Evangelische Fachhochschuel fir Sozialwäse Reitlenge“ (hite Evangelischi Hochschuel Ludwigsburg) aagfange, wun er as Diplom-Sozialpädagog (FH) abgschlosse het. Syt 1987 het dr Özdemir as Erzieher un freje Schurnalischt gschafft. Dr Özdemir isch Muslim un mit dr Schurnalischti Pia Castro ghyrote, wu vu Argentinie stammt. Är het mit ihre ne Dochter un e Suhn.

2003 isch dr Özdemir Transatlantic Fellow vum German Marshall Fund of the United States gsi. In däre Zyt het er u. a. Brownbag-Läsige ghalte an der University of Madison im US-Bundesstaat Wisconsin zue dr Roll vu dr Dirkej z Europa.

Bardej

Dr Cem Özdemir bi dr Vorstellig vu syym Buech "Die Türkei" z Frankfurt/Main im Oktober 2008

Dr Özdemir isch syter anne 1981 Mitglid vu dr Griene. Är het syyni politisch Heimet im Griene-Chreisverband Ludwigsburg. Vu 1989 bis 1994 isch er im Griene-Landesvorstand vu Bade-Wirttebärg gsi. Anne 1992 het er zue dr Mitgrinder ghert vu Immi-Grün – Bündnis der neuen InländerInnen.

Am 2. Juni 2008 het dr Özdemir syy Kandidatur fir dr Bundesvorsitz vu syyre Bardej aagchindet. Gegekandidat vum Özdemir fir d Wahl, wu im Novämber aagsetzt gsi isch, isch dr Volker Ratzmann gsi, dr Griene-Fraktionsschef im Abgordnetehuus vu Berlin, wu aber us private Grind syy Kandidatur am 4. Septämber 2008 ufgee het.

Im Vorfäld vu dr Wahl zum Bundesvorsitzende het sich dr Özdemir uf em Landesbartejdag vu dr Griene Bade-Wirttebärg um e uussichtsryyche Lischteplatz fir d Bundesdagswahl 2009 beworbe. Är isch doderby in zwo Kampfkandidature syyne bartejintärne Gegekandidate unterläge. Dr Özdemir het aber einewäg an syyre Kandidatur fir dr Bartejvorsitz feschtghebt.

Syt em 15. Novämber 2008 isch dr Özdemir - näbe dr widergwählte Claudia Roth - eine vu zwei Bundesvorsitzende vu dr Bardej. Är isch mit 79,2 Prozänt vu dr Delegiertestimme gwehlt wore..

Bi dr Bundesdagswahl 2009 isch dr Özdemir as Diräktkandidat aadrätte fir dr Bundesdagswahlkreis Stuegert I. Är het aber gege dr CDU-Kandidat Stefan Kaufmann verlore un isch dodermit ohni Bundesdagsmandat blibe.

Anne 2010 isch dr Özdemir mit 88,5 Prozänt im Amt vum Bundesvorsitzende bstetigt wore, 2012 mit 83,29 Prozent.

Noch em ender schlächte Abschnyde bi dr Bundesdagswahl 2013 isch dr gsamt Bundesvorstand vu dr Bardej zruckdrätte. Dr Özdemir het derno aagchindet, ass er wider fir s Amt vum Bardejvorsitzdene kandiere wett. Am 19. Oktober 2013 isch er mit 71,4 Prozänt vu dr Deligiertestimme widergwehlt wore, näbe dr Simone Peter.

Aafangs Jänner 2018 het dr Özdemir aagchindet, ass er nimi fir dr Vorsitz kandidiert. Zue sym Noofolger isch dr Robert Habeck gwehlt wore.

Abgordnete

Bundesdagsabgordneter

Vu 1994 bis 2002 isch dr Özdemir Mitglid vum Dytsche Bundesdag gsi. Är isch dodermit dr erscht Bundesdagsabgordnete mit ere dirkische Härchumft gsi. Syt 1998 isch er innepolitische Sprächer vu dr Bundesdagsfraktion Bündnis 90/Die Grünen gsi.

Des Amt het er am 26. Juli 2002 nidergleit, wu Vereffetlichunge iber e ginschtige Privatkredit vum PR-Berater Moritz Hunzinger un d uuzuelässig Verwändig vu dienschtlig erworbene Bonus-Myyle Ufsäh gregt hän. Är het au syy Ruckzug us em Bundesdag bekannt gee. D Kandidatur fir d Bundesdagswahl 2002 het er nimmi chenne zruckzie, aber no syyre Widerwahl het er s Bundesdagsmandat nit aagnuu.

Dr Özdemir isch bis dert alliwyl iber d Landeslischt Bade-Wirttebärg in dr Dytsch Bundesdag yyzoge.

Wun em dr Bade-Wirttebärgisch Landesverband vu dr Griene ne uussichtsryyche Lischteplatz versait gha het un är dodermit bi dr Bundesdagswahl 2009 nit iber e Lischteplatz abgsichert gsi isch, isch em dr Yyzug in dr 17. Dytsch Bundesdag nit glunge. Syy Bewärbig um e Diräktmandat im Wahlchreis Stuegert I isch ohni Erfolg blibe.

Am 1. Dezämber 2012 isch dr Özdemir uf dr zwote Blatz vu dr Landeslischt Bade-Wirttebärg fir d Bundesdagswahl 2013 gwehlt wore. Är isch au zum zweite Mol im Bundesdagswahlchreis Stuegert I zue dr Wahl fir s Diräktmandat aadrätte; är isch derno iber d Landeslischt in dr Bundesdag yyzoge.

Europaabgordnete

Vu 2004 bis 2009 isch er Mitglid vum Europäische Parlamänt gsi in dr Fraktion Die Grünen/EFA. Är het em Uusschuss fir uuswärtigi Aaglägeheite aaghert un isch ussepolitische Sprächer vu syyre Fraktion gsi. Är isch au Vize-Presidänt vum nitständige Uusschuss zur behauptete Nutzig vu europäische Staate dur d CIA fir d Bferderig un s rächtswidrig Feschthalte vu Gfangene (CIA-Uusschuss) gsi derzue Mitglid vu dr hochrangige Kontaktgruppe Nordzypern, vu dr interparlamentarische Delegation EU-Dirkei, vu dr Anti-Racism and Diversity Intergroup sowie der Atlantikbrücke. Anne 2007 het er bi dr Grindig vu dr europäische Dänkfabrik European Council on Foreign Relations mitgmacht.

As Europaabgordneter het er im Johr 2007 d Schirmherrschaft iber dr Christopher Street Day Stuegert ibernuu. Är isch e offiziälle Unterstitzer vum Bindnis Freiheit statt Angst fir Dateschutz un gege staatligi Iberwachig.

Dr anatolisch Schwob

Dr Cem Özdemir cha guet Schwäbisch schwätze. Är bezeichnet sich gärn as anatolische Schwob un setzt s Schwäbisch gärn as „fryndligi Provokation“ yy, wänn ihn eber fir e Uusländer haltet.. Fir dr Belchen-Verlag het dr Özdemir anne 2001 e schwäbischi Version vu Romeo un Julia vum Albert Hefele uf Schwäbisch uf CD gsproche.

Vereffetlichunge

Monografie

• Ich bin Inländer. dtv, München 1997, ISBN 3-423-24109-8. (ufzeichnet vum Hans Engels; aktualisierti Neiuusgab 1999)
• Currywurst und Döner. Integration in Deutschland. Lübbe, Bergisch Gladbach 1999, ISBN 3-7857-0946-3. (in Zämmearbet mit em Bernd Knopf un em Jürgen Gottschlich)
• Deutsch oder nicht sein? Integration in der Bundesrepublik Deutschland. Bastei Lübbe, Bergisch Gladbach 2000, ISBN 3-404-60482-2.
• Die Türkei – Politik, Religion, Kultur. Beltz, Weinheim 2008, ISBN 3-407-75343-8.

as Rugeber

• Abenteuer Vorlesen. Ein Wegweiser für Initiativen. Ed. Körber-Stiftung, Hamburg 2002, ISBN 3-89684-036-3.
• Mitten in Deutschland. Deutsch-türkische Erfolgsgeschichten. Herder, Freiburg [u. a.] 2011, ISBN 978-3-451-30469-9. (mit em Wolfgang Schuster)

Bydreg in Sammelbänd

• Die Armee gehört in die Kaserne. Über das Verhältnis von Militär und Politik in der Türkei. In: Lydia Haustein, Joachim Sartorius, Christoph Bertrams (Hrsg.): Modell Türkei?: Ein Land im Spannungsfeld zwischen Religion, Militär und Demokratie, Wallstein Verlag 2006, ISBN 978-3-8353-0067-5, S. 73 ff.
• Griechenland und Türkei. Können Falken Tauben werden? In: Apostolos Katsikaris (Hrsg.): Türkei Europa, Magnus-Verlag, Essen 2006, ISBN 978-3-88400-506-4, S. 58 ff.

Literatur

• Özlem Topçu: "Unser Cem". In: Die Zeit, 23. Oktober 2009.

Weblink

•  Commons: Cem Özdemir – Sammlig vo Multimediadateie
• Internetufftritt vum Cem Özdemir
• Cem Özdemir, Internationales Biographisches Archiv 47/2008 vom 18. November 2008 (ff) Ergänzt um Nachrichten durch MA-Journal bis KW 04/2013, im Munzinger-Archiv (Artikelaafang frei abruefbar)
• Biographie beim Deutschen Bundestag
• Yytrag über Cem Özdemir in dr Abgordnete-Datebank vum Europäische Parlament
• Cem Özdemir uf abgeordnetenwatch.de

Fuessnote

Dä Artikel basiert uff ere fräie Übersetzig vu dere Version vum Artikel „Cem_Özdemir“ vu de dütsche Wikipedia. E Liste vu de Autore un Versione isch do z finde.