Georges Danton
![](https://upload.wikimedia.org/wikipedia/commons/thumb/c/c6/Danton_001.jpg/220px-Danton_001.jpg)
Dr Georges Jacques Danton (* 26. Oktober 1759 z Arcis-sur-Aube, Département Aube; † 5. April 1794 z Paris) isch ein vo de Füehrer vo de undere Volksschichte in der Französische Revolution und dr Leiter vom erste Wohlfahrtsusschuss (bis 10. Juli 1793) gsi. Er isch berüehmt gsi für siis Talent Rede z halte.
Läbe
[ändere | Quälltäxt bearbeite]Dr Danton isch us ere chliinbürgerliche Familie cho. Noch em Studium bi de Oratorianer isch er Schriiber bim Prokurator vo Paris worde. Vo 1785 aa het er im Conseil du Roi gschafft, isch 1787 Rächtsawalt worde und isch bis 1791 dört bliibe. Er isch Mitgliid vo dr Pariser Chammere gsi und dört im Dezember 1791 au no stellverträtende Staatsawalt worde.
Mit em Camille Desmoulins und em Jean Paul Marat het er 1790 dr Klub vo radikale Demokrate wo als Cordeliers bekannt worde isch, gründet. Au bi de Jakobiner isch er Mitgliid gsi. Zsämme mit mit em Marat und em Antoine de Saint-Just het er die agfüehrt.
Danton het noch dr Flucht vom König as engagierte Verdräter vo der Republik massgäblig an ere Versammlig uf em Marsfeld deil gnoh, wo am 17. Juli 1791 in ere Underschriftesammlig dr Sturz vom Louis XVI. und d Iifüehrig vo der Republik gforderet het. Me nimmt a, ass er mit siiner Propaganda e wäsentligi Rolle bim Sturm uf d Tuilerie und dr Inhaftierig vo der königliche Familie am 10. August 1792 gespiilt het. Im gliiche Johr het er dr Poste vom Justizminister übernoh. D Septembermord vom Johr 1792 het er duldet. Churz druf het er siis Ministeramt niidergleit.
Für zum d Girondeste z stürze het er sich mit dr Bärgpartei verbündet und het so als Mitgliid vom Konvent am 10. März 1793 d Iirichtig vom ene usserordentlige Gerichtshof, em spötere Revolutionstribunal, erreicht. Churz druf isch er aber moderater worde in siiner politische Usrichtig und het dr Club des Cordeliers verlo. Mit em Camille Desmoulins het er vo denn aa zu de Indulgänte ghört.
![](https://upload.wikimedia.org/wikipedia/commons/thumb/5/54/Statue_of_Danton_by_Edmond_Desca_in_Tarbes_%2801%29.jpg/220px-Statue_of_Danton_by_Edmond_Desca_in_Tarbes_%2801%29.jpg)
Won er sich noch dr Verteidigung vo der Revolution gege d Find vo Usse 1794 im Erste Koalitionschrieg für en Ändi vo dr Terreur iigsetzt het, het en dr Robespierre gstürzt. Denn het er brobiert, mit em findlige Usland Friidensverhandligen ufznäh und het druf si Mitgliidschaft im Wohlfahrtsusschuss verlore. Won em öbber dr Root ge het, ins Usland z flüchte, het er die berüehmte Wort gsait: „Nimmt me denn s Vaterland an de Schuehsohle mit?“
Am 30. März 1794 isch dr Danton verhaftet worde, noch eme churze Prozäss vo em Wohlfahrtsusschuss isch er as e vermeintlige Revolutionsgegner verurteilt und am 5. April mit 13 vo siine Ahänger (Dantoniste) guillotiniert worde.
Dr Danton isch agäblig e Mitglied von ere Pariser Freimuurerloge gsi. In dr freimuurerische Briefliteratur vom 18. Johrhundert wird er as „Brueder“ bezeichnet.
Wirkig
[ändere | Quälltäxt bearbeite]Siis Schicksal isch dr Gegestand vom Georg Büchner siim Drama Dantons Tod und s Thema vo mehrere Verfilmige (under anderem Danton us em Johr 1983 mit em Gérard Depardieu in dr Hauptrolle).
Literatur
[ändere | Quälltäxt bearbeite]- Barthou, Louis: Danton. Paris, 1932
- Bluche, Frédéric: Danton. Paris, 1984
- Christophe, Robert: Danton. Paris, 1964
- Hampson, Norman: Danton. Oxford, 1988, ISBN 0-631-16116-3
- Madelin, Louis: Danton. Paris, 1948
- Pfister, Kurt: Danton. München, 1947
- Wendel, Hermann: Danton: Revolutionär und Staatsmann. München, 1988, ISBN 3-453-02618-7
Weblingg
[ändere | Quälltäxt bearbeite]![](https://upload.wikimedia.org/wikipedia/commons/thumb/4/4a/Commons-logo.svg/12px-Commons-logo.svg.png)
![]() |
Dä Artikel basiert uff ere fräie Übersetzig vum Artikel „Georges_Danton“ vu de dütsche Wikipedia. E Liste vu de Autore un Versione isch do z finde. |