Grüen 80
| Dialäkt: Baaseldütsch |
Grüen 80 isch dr Naame vo dr 2. Schwizerische Usstellig für Garte- und Landschaftsbau 1980 in dr Brügliger Ebeni in dr Gmäind Münchestäi gsi. D Dramhaltstell häisst zwar offiziell «Nöiji Wält» und s Gländ «Park im Grüene», d Lüt bruche aber immer no d Bezäichnig «Grüen 80». Dr Park isch rund um d Uur für s Publikum offe.
Mit em ÖV chunnt mä zum Park über d Dram- und Bushaltstelle «Nöiji Wält» und vo dört diräkt in d Grüen 80. Über d S-Bahn-Haltstell «Baasel Dreispitz» oder d Dramhaltstell «St. Jakob» chunnt mä zum Botanische Garte näbedraa.
D Gartebauusstellig Grüen 80
[ändere | Quälltäxt bearbeite]
Am 12. April 1980 isch d Ustellig vom Bundesbresidänt Georges-André Chevallaz eröffnet worde und si isch bis zum 12. Oktober gange. D Usstellig het öbbe 60 Millioone Franke kostet und d Usstelligsflechi isch 46 Hektaare grooss gsi. Mä het 13'000 Böim und Strüüch aapflanzt. Äins vo de Woorzäiche isch dr «Dino» gsi, e groosse Saurier us Beton, wo bis Aafang 2005 erhalte bliiben isch. Denn isch er aber z alt gsi und mä het s nüme welle riskiere, ass er wurd iistürze. Dorum isch dr Dino, wo ursprünglig nume für d Duur vo dr Grüen-80-Usstellig blaant gsi isch, abgrisse worde.
En anders Woorzäiche vo dr Usstellig isch e Durm mit ere Ussichtsblattform, wo sich dräit het und wo wien e Lift uufe- und aabegfaare worden isch. Dä stoot hüte im Europa-Park as d Attrakzioon Euro-Tower. En anderi Attrakzioon isch d Monorail, wo die verschiidene Däil vom Parks mitenand verbunde. Si isch wider abbaut worde, wo d Ustellig ume gsi isch.
Die groossi rotbruuni Blastik us Iise, «Amboss», vom Bernhard Luginbühl stoot in dr Nööchi vom Seeufer und isch e Blickfang und Rutschbaan für d Chinder.
Mee as drei Milione Bsuecher si in d Grüen 80 choo. Äini vo deene isch d Königin Elisabeth II. gsi.
Dr spööteri Färnseamoderator bim Schwizer Färnsee, dr Kurt Aeschbacher, isch bi dr Grüen 80 Vizediräkter gsi.
Noochberschaft
[ändere | Quälltäxt bearbeite]Grad näb em hütige Park isch dr Botanisch Garte Brüglige, won e Däil vo dr Grüen 80 gsi isch und vo dr Stadt Baasel underhalte wird. Er umfasst en Änglische Garte, e Chrütersammlig und e Rhododendron-Sammlig. Usserdäm befindet sich dört au die permanänti Kutschen-Usstellig vom Historische Museum Baasel.
D Migros und dr Park im Grüene
[ändere | Quälltäxt bearbeite]D Migros Baasel het s noch dr Garteschau 1980 uf sich gnoo, sich wäärend 100 Joor um s Gländ z kümmere. Bis jetzt het si 36 Millioone Franke drfüür usgee. In dr Grüen 80 git s meereri Weijer, Waldstück, Freiflechene, Skulptuure, Grill-Standort und zwäi Restorant.
D Dinosaurier-Usstellig 2005
[ändere | Quälltäxt bearbeite]
Im Joor 2005 het en Ustellig stattgfunde, wo us mee as eme Dotzed lääbensgroossi und realistischi Plastiksaurier bestande het; dr Seismosaurus – wo no vil gröösser isch as dr alti Beton-Dino – söll no lengeri Zit blibe stoo. Mee as 700'000 Lüt häi die Dino-Usstellig bsuecht, under ene e Hufe Schuelchinder.
In dr Nacht uf e 21. Mai 2005 häi Wandaale d Usstelligsobjekt stark beschädiget und dr Velociraptor isch spurloos verschwunde. D Migros het gsäit, ass dr Sachschade öbbe 250'000 Franke hooch gsi sig.
Weblingg
[ändere | Quälltäxt bearbeite]Koordinate: 47° 31′ 49″ N, 7° 36′ 56″ O; CH1903: 613324 / 264409
|
Dä Artikel basiert uff ere fräie Übersetzig vum Artikel „Grün_80“ vu de dütsche Wikipedia. E Liste vu de Autore un Versione isch do z finde. |