Teatro Malibran

S Teatro Malibran, früener s Teatro San Giovanni Grisostomo (hüte mäistens: Crisostomo) isch en Operehuus im Stadtdäil Cannaregio z Venedig. Es befindet sich öbbe fufzig Meter östlig vo dr Chille San Giovanni Crisostomo. Es isch bekannt, wil s usserordentlig bedütend für d Opere im 17. und 18. Joorhundert gsi isch. S Theater isch riich verziert gsi und het Loosche uf fümf Etaasche und e groosses Barderr ghaa. Hüte git s uf de Site käini Loosche me und hinde het s zwäi Räng.

Gschicht

S Teatro Malibran isch vom Tommaso Bezzi für d Familie Grimani entworfe worde und isch wäärend em Karneval im Joor 1678 mit ere Vorstellig vom Vespasiano vom Carlo Pallavicino iigweiht worde. S Theater het denn die grössti Büüni in ganz Venedig ghaa und isch für sini usserordentlig ufwändige Inszenierige und sini guete Sänger bekannt gsi, wie zum Bischbil d Margherita Durastanti, wo doo as Primadonna vo 1709 bis 1712 gschafft het. D Blüetezit vom Theater isch mit Komponiste wie em Carlo Francesco Pollarolo, Alessandro Scarlatti und Georg Friedrich Händel verbunde. Au dr Kastrat Farinelli isch uf dr Büüni vo däm Huus gstande.

In de 1730er Joor het s si Rang as äins vo de füerende Theater z Venedig verloore, so wie s de mäiste Theater in dr Middi vom 18. Joorhundert an Bedütig verloore häi. Im Joor 1737, wo dr Carlo Goldoni für s Theater verantwortlig gsi isch, het er sini Theaterstück und anderi Schauspiil doo lo uffüere. Im Joor 1755 het d Familie Grimani e nöis und chliiners Theater ufdoo, s San Benedetto, und s San Giovanni Grisostomo het no mee vo siner Bedütig iibüesst.

Noch dr franzöösische Bsetzig vo Venedig 1797 isch daas Theater äins vo de wenige gsi, wo nit zuedoo worde si. Im Joor 1819 het s dr Giovanni Gallo kauft. 1834 het er s restauriert, und 1837 het s dr Naame Teatro Malibran überchoo, zu Eere vo sinere Mezeenin, dr berüemte spanische Mezzosopranistin Maria Malibran. Im Joor 1849 si d Ööstriicher zrugg uf Venedig choo, und häi alli Theater usser sällem zuedoo.

1919 isch s Theater noch meerere Joor widereröffnet worde und isch in dr erste Helfti vom 20. Jorhundert e Zentrum für Opere und Operette gsi und isch au as Kinosaal brucht worde. Im Joor 1992 het d Stadt Venedig s Theater kauft, restauriert und erwiteret.

1996 het s im Teatro La Fenice brennt und d Restaurierig vom Teatro Malibran isch schnäll voraadriibe worde. 2001 isch s wider eröffnet worde. Sit denn spiilt s Ansambel vom Teatro La Fenice doo. Dr Marcello Viotti, dr ersti musikalischi Läiter noch dr Widereröffnig, het blaant im Huus e Barock-Repertuar und Mozart-Opere lo uffüere.^[1]

45.43916712.337222Koordinate: 45° 26′ 21″ N, 12° 20′ 14″ O

Litratuur

Artikel "Venice", in: The New Grove Dictionary of Opera, 1998, Vol. 4, 913ff.

Fuessnoote

↑ Derek Weber: Opernhaus auf historischem Boden – Wiedereröffnung des Teatro Malibran in Venedig, NZZ, 12. Oktober 2001.

Weblingg

Dä Artikel basiert uff ere fräie Übersetzig vum Artikel „Teatro_Malibran“ vu de dütsche Wikipedia. E Liste vu de Autore un Versione isch do z finde.

[1] Derek Weber: Opernhaus auf historischem Boden – Wiedereröffnung des Teatro Malibran in Venedig, NZZ, 12. Oktober 2001.

[1]