Umike
Umiken | |
---|---|
![]() | |
Basisdatä | |
Staat: | Schwiiz |
Kanton: | Aargau (AG) |
Bezirk: | Brugg |
Gmeind | Brugg |
PLZ | 5222 |
Koordinate: | 656676 / 259402 |
Höchi: | 357 m ü. M. |
Flächi: | 0,8 km² |
Iiwohner: | 1069 (31. Dez. 2009)[1] |
Charte | |
![]() |
Umike isch es Dorf, e ehemoligi Gmeind und hütt en Ortsdeil vo dr Stadt Brugg im Aargau.
Geografii
[ändere | Quälltäxt bearbeite]Umike lyt uf dr lingge Syte vo dr Aare am Jurasüdfuess. Es isch amene Saddel vo dr Landschaft zwüsche de Höger vom Bözbrg und em Bruggerbärg. Durs Dorf goot d Kantonsstrooss vo Brugg übere Bözbrg is Frickdaal und uf Basel. Bi Umike stygt d Ysebaanlinie vom Boge uff em grosse Viadukt über d Aare em Bärg no gäge Weschte zum Bözbrgdunnel.
-
vorn isch s Dorf Umike, hindedra d Stadt Brugg (ane 1958)
Gschicht
[ändere | Quälltäxt bearbeite]Umike oder besser gseit d Dorfchile, wo vor dr Refermazion s Patrozinium vom heilige Mauritius gha het, isch ane 1254 s erschte Mol imene Dokumänt erwäänt. Zu dr refermierte Chilegmeind Umike ghöre au Rinike und Vilnachere. S Pfarrhuus isch us dr Middi vom 18. Joorhundert. I dr Chile isch e schöne Bildzyklus vom Chünschtler Felix Hoffmann (1911–1975) z gseh. D Glasmoolerei vo de drüü Pfäischter zeige dr Jesaia, s Oobemohl und d Uuferstehig.
Ane 1827 het s Dorf Umike scho e chlyne Deil vo sym Bann dr Stadt Brugg abträtte; das isch d Parzälle mit dr Müli oben a dr Aare gsi.
D Gmeind Umike isch uf Afang 2010 zu dr Stadt Brugg cho. I dr Abstimmig vom 27. Juni 2008 hend d Umiker d Gmeindfusion aagnoo und am 28. Septämber 2008 dä Entscheid nomol, und zwar mit em Adeil vo Jo-Stimme vo 86 Prozänt, bestätiget.
Wappe
[ändere | Quälltäxt bearbeite]S Wappe vo Umike mit eme Löi und eme Chleeblatt isch ane 1947 vo dr Gmeindversamlig nach eme nöje Entwurf aagnoo worde. S eltere, vierdeilte Wappe isch us sächs verschidene Elemänt zämegsetzt gsi; es isch uf dr Brunnesüüle vom alte Dorfbrunne no erhalte.
Bevölkerig
[ändere | Quälltäxt bearbeite]Johr | 1764 | 1831 | 1850 | 1900 | 1950 | 1990 | 2000 | 2009 |
Iiwohner | 143 | 218 | 216 | 234 | 467 | 855 | 1041 | 1054 |
Weblink
[ändere | Quälltäxt bearbeite]![](https://upload.wikimedia.org/wikipedia/commons/thumb/4/4a/Commons-logo.svg/12px-Commons-logo.svg.png)
- Felix Müller: Umike. In: Historisches Lexikon vo dr Schwiiz.
Fuessnoote
[ändere | Quälltäxt bearbeite]- ↑ Bilanz der ständigen Wohnbevölkerung nach Bezirken und Gemeinden uf bfs.admin.ch (Bundesamt för Statistik)