Oganesón

L'ununoctio, tamién conoixito como eka-radón ye o nombre temporal dato por a IUPAC a o elemento transactinido con o numero atomico 118 y o simbolo temporal Uuo. En a tabla periodica d'os elementos, ye un elemento d'o bloque p y o zaguero d'o periodo 7. L'ununoctio ye actualment l'unico miembro sintetico d'o grupo 18. Tien o numero atomico y a masa atomica mas grans de totz os elementos conoixitos.

L'atomo radioactivo d'ununoctio ye muit inestable y, dende 2002, nomás s'han sintetizato tres atomos (posiblement quatre) d'o suyo isotopo ²⁹⁴Uuo.Encara que nomás s'ha feito una determinación experimental muit escasa d'as suyas propiedatz y os posibles compuestos que forma, os calculos teoricos han ufierto muitas predicions, encluyindo-ne-ie bellas de muit inesperatas. Por eixemplo, encara que l'ununoctio ye un miembro d'o grupo 18, probablement no ye un gas noble, como lo son totz os atros elements d'iste grupo. D'antis mas se creyeba que yera un gas pero actualment se predice que ye un solido en condicions normals.