Árbol

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Un caixico en Dinamarca.

Árbols nevatos en o Fornigal.

Un árbol (d'o latín < ARBORE) ye una planta que puet creixer dica mas de cinco metros d'altaria gracias a una estructura que forma un tronco, y eventualment ramificacions ditas ramas y brancas. Os árbols son plantas perennes que por un regular viven muitos anyos. En o sentito botanico, os árbols son plantas con fusta. A fusta, conoixita tamién como xilema secundario, se produce por una capa de celulas, o cambium vascular, situata baixo a crosta.

A formación d'a fusta ye un proceso repetitivo que superposa una nueva capa dencima d'as anteriors. O resultato a sobén ye visible en forma d'aniellos de creiximiento. Os solos grupos que contienen plantas con fusta, y por tanto árbols en o sentito estricto d'o termin, son as chimnospermas y as anchiospermas dicotiledonias. Os árbols presentan una mayor lonchevidat que atros tipos de plantas. Bellas especies d'árbols (como as secuoyas) pueden blincar d'os 100 m d'altaria, y gosan vivir mils de anyos.

Os primers árbols apareixen en a Tierra fa bels 370 millons d'anyos, en o periodo Devonián, y yeran os antipasaus d'as coniferas actuals. O desembolique en altaria y a ramificación d'as brancas permiten a los árbols augmentar a suya capacidat d'espleitación d'o espacio aerio. A distribución d'as fuellas a diferents rans permite a l'árbol augmentar a superficie d'intercambio ta la fotosintesi. A suya gran capacidat fotosintetica fa que os árbols chuguen un papel important en os ciclos ecolochicos terrestres, gracias a la suya capacidat d'almadazenamiento de carbonio, o suyo rol en o ciclo de l'augua, y a formación d'os ecosistemas complexos que son as selvas, fuent y refuchios d'a biodiversidat.

Os árbols tamién representan una fuent considerable de recursos ta la especie humana, tanto de materials (prencipalment fusta) como de provisions (particularment fruitos), entre atros. Ocupan un puesto real y simbolico important en cuasi totas as culturas d'o mundo.

Bibliografia

• (en) Pakenham, Thomas . Remarkable Trees of the World. (2002). ISBN 0-297-84300-1
• (en) Pakenham, Thomas. Meetings with Remarkable Trees.(1996). ISBN 0-297-83255-7
• (en) Colin Tudge. The Secret Life of Trees. How They Live and Why They Matter. Allen Lane. Londres (2005). ISBN 0-7139-9698-6.

Se veiga tamién

• Árbol de Sobrarbe.
• Árbols sagratos.

Vinclos externos

• (ca) Arbols monumentals.
• (de) Información sobre os arbols.

• Datos: Q10884
• Multimedia: Trees / Q10884