عايدي (سلالة د لكلب)

	عايدي
	لعيشة
لمودة د لعيشة	10 a
	خصايصو
لعلو	52 سم و 62 سم

لمقال مقطوع من شجرة، ما كايدي ليه تا شي مقال أخر، زيد ليان ديالو ف مقالات خرين.

مقالة ؤلا فقرة ناقصينها عيون لكلام.
لمعلومات لّي ف هاد لمقالة ؤلا هاد لفقرة ناقصين ف توتيق، خاصّ يتزادو فيها عيون لكلام باش تكون موتوقة. شوف هنا كيفاش تزيد لعيون.
ماتّخلعش! هاد لميصاج مديور باش تشوفو لفرقة ديال الصيانة و لمراجعة د لمقالات، و ماكيعنيش بلي درتي شي غلط!

عايدي ولا آيدي ولا كلب الأطلس، هي سلالة د لكلاب مأصلة ف جبال الأطلس ف لمغريب. هاد لكلب كايتخدم كا عساس د لكسيبة، كايحامي على لقطيع د لحوالا و لماعز. هاد السلالة ف لغالب كاتتلقى ف لأطلس لمتوسط ب لآخص ف لمنطاقة د إفران. هاد السلالة عندها السطونضار تحت لجاميعة الدولية ل علم لكلاب. لعايدي معلم ف الصيادة و عندو حاسة شم مزيانة. ف لمغريب، ديما كايخدموه معا السلوݣي لمغريبي ف الصيادة، اللخر كايتبع لفريسة لي لعايدي قلعها ب الشمان.

التاريخ د السلالة

على حساب لهضرة، لعايدي تأصل ف جبال لأطلس، و من بعد تتاجر بيه ولا تسافر بيه من عند الرحالا ل جبال لبيغيني ف فرانسا، فين كايتشاف بلي هو الجد لأصلي لي طورو منو السلالة د لكلب الجبلي لپيريني. هاد لهضرة محط د النيقاش مابين لمختصين ف لكلاب.

السكان لأصليين د جبال لأطلس ف لمغريب وصفو لعايدي:

"ماكاين حتى شي كلب د لحوالا ف لأطلس، لعايدي لي كايعيش ف جبالنا عمرو ما عس على لكسيبة بحال السلالات د لكلاب لوروپية. كلب لعايدي ف لعادة كايدافع على لخيام و الديور د ماليه و ف نفس لوقت كايحامي على لكسيبة من لمفتارسات لي تقدر تدير الضر".

لمطلوب من د لعايدي معا لحوالا كان ديما هو لحماية ديالها من الديب ليفريقي و لمفتارسات لخرى ب تخدام الشمان ديالو لمجهد كا نضام د لالارم لولاني باش يديطيكطي لمفتارسات لي قربو قبل ما يآطاكيو لكسيبة. غير هو لعايدي مامعروفش عليه السرعة مي هي سلالة آجيل، و ف لغالب هاد لمفتارسات كايلقاو كيفاش يهربو، غير باش يرجعو مرة خرى و يهجمو على لكسيبة. هادي هي السبة اللولانية علاش لعايدي د دابا ديما كايقرنوه ب سلوݣي لي معروف ب السرعة، هادشي لي صنع كومبو قتال ب نجاح كبير ف الصيادة.

لعايدي ماخداش نفس لقدر من لحب من عند الناس بحال السلوݣي، لي كايتعتابر نبيل، غير هو، موؤخرا هاد السلالة بدات كاتاخد شوية د لهتيمام ف لمغريب. ف لوقيتة لي لعايدي كايتخدم ف لأساس كا كلب د لخدمة؛ ولا كاياخد شعبية كا كلب د الدار ف لبلايص لمدينية ف لمغريب. ملي كاتدريسيه ب شكل مݣاد، لعايدي يقدر يتآضاپطا مزيان ف لبلايص لمدينية و يقدر يولي كلب د الرفقة ناضي.

لوصف

لعايدي هو كلب متوسط لحجم حتى ل كبير, لعلو ديالو من 50 سونتيميطر ل ميطرو، و كايوزن من 21 ل 24 كيلو، لقد د عمرهوم ما بين 12 و 15 لعام كا موعدال. عندو فرو سميك و مدوبل لي كايكالي عليه من لبرد و لمفتارسات. راسو غادي ل الدب ب خيشوم مقمقم و بارز، و لبدة من لتحت د ودنيه ل عنقو. عندهوم ودنين نص مطويين و زغب طويل و يقدر يكون مخرس. عندهوم فورما مقدودة، ب عضلات ف الصدر و لفخاد تحت من لفرو السميك ديالهوم، و منين كاترازي لفرو ديالهوم، هاد لعضلات كاتبان مطراسية. لفرو ديال لعايدي كايكون ف بزاف د اللوان بحال لكحل، لبيض، حمراني، قهوي، لحمر لكاشف، و لمخطط ولا كومبو بينات هاد اللوان و لفرو كايكبر كتر ف جيهة لفوق د لفخاد و لقزيبة، هادشي لي كايعطيهوم شكل مشعكك.

لمشاكيل الصحية

لعايدي واحد من أكتر السلالات السليمة ف لعالم، باقي حتى ل دابا مامعروف حتى شي موشكيل صحي ولا مرض خلوقي مقرون ب هاد السلالة.

السلوك و لمجاج د السلالة

لعايدي هو كلب كايحامي ب طبيعتو و سلالة واݣضة لي ديما حاضية مولاها، لحوايج لي موصيينو يحضيها، و لكسيبة من هادي قرون. هاد السلالة معروفة ب لحاراكية الزايدة ديالها، لي ديما كايخصها خدمة باش تكون فرحانة. لحضية الزايدة د لعايدي كاتعني بلي هاد لكلب كايميل باش يكون نبّاح، كايبدا ينبح على أصغر حس. التنوية و قلة التيقة د لعايدي ف لبراني خصها تتخاد ف لبال، حيت يقدر يكون خطير بزاف ضد شي حد براني.

الطبيعة لپروطيكتيڤ و لحدودية د لعايدي تقدر شي مرات تودي لمدابزات معا كلاب خرين يلا كانت لمدابزة على ود الزون. هاد لكلب لي كايخصو دريساج مزير و مسيّس، و دريسور عندو شخصية باش يروديه مزيان. أهم حاجة ف الدريساج د لعايدي هي خصك تخلي الدريساج پوزيتيڤ معاه و ف نفس لوقت تتهلى فيه باش تتجنب لقصوحية د الراس ديالو، حيت هاد السلالة كاتميل باش تكون سلالة حساسة لي غير على بونت كاتولي ماكاتيقش يلا كان مولاها شي واحد قاصح و كايعطيها بزاف د الدرك ف الدريساج. هاد لكلب وفي و كايبغي بزاف، و بيّنو بلي يقدرو يكونو كلاب واعرين ل لفاميلة و ضراف معا لولاد الصغار، ب لخوصوص يلا عرفوهوم و هوما جراوا.

ف الدار كايميلو باش يكون خاملين و مكالميين، وخا هاكداك، هاد السلالة الدكية و لي كايخصها تخدم، محتاجة ل شي تحفيز ديهني باش تهرس لقنطة. عايدي قانط ولا مهمش يقدر دغيا يدير لفوضى و يبدا ينبح فوق لقياس. ف النطاق لأصلي د لعايدي، كايعيش ف الجبال، عليها كايحتاجو ليسپاص و لوسوعية و ماغاديش يكونو أوپسيو مزيانة يلا كانت عندك برطما ولا دار صغيرة. فيرما ولا تيرا واسعة فين يقدرو يجولو غاتكون أحسن موؤل ل لعايدي.

عيون لكلام