كازوكي طاكاهاشي

	كازوكي طاكاهاشي
	معلومات عامة
زيادة	4 أكتوبر 1961; طوكيو
لموت	4 يوليوز 2022 ↔ 6 يوليوز 2022 (60 عام); حدا ناغو، أوكيناوا
طريقة دلموت	موت عرضي
سباب لموت	غرق
لجنسية	چاپون
لحرفة	مانݣاكا و سيناريست
لّوغات لي كيعرف	جاپونية
	معلومات خرى
لأعمال	يوو ݣي يوو!;
سّيت رّسمي	http://studio-dice.com/
لجوايز	(2015) جائزة إنكبوت;

كازووُ طاكاهاشي (جاپونية: 高橋たかはし一雅かずまさ، Takahashi Kazuo، تولد ف 4 أكتوبر 1961 - توفى ف 4 يوليوز 2022)، معروف فنيا ب سمية كازوكي طاكاهاشي (高橋たかはし和希かずき، Takahashi Kazuki)، كان مانݣاكا جاپوني معروف كا الصانع د لمانݣا يوو ݣي يوو!، لي تنشرات ف شوونين جامپ لسبوعية من 1996 ل 2004. لمانݣا توسعات لفرانشايز لي جامعة واحد اللعبة د التباديل لكارطات، لي خدات الروكور د ݣينيس كا أحسن لعبة تباعت د تباديل لكارطات ف ݣاع لوقات.

لبدية و لكاريير ديالو

لبدية و لعمال اللولا

كازوكي طاكاهاشي تزاد ف 4 أكتوبر 1961 ف طوكيو، الجاپون فين ولا مولوع ب لمانݣا و لآنيمي ف عوام 1980. ف 1990، طاكاهاشي طلق أول عمل كبير ليه، الصقر لمقاتل، لي هي وان شوت (طانكووبون 1) تنشرات ف شوونين جامپ لسبوعية. عام موراه، نشر طينّيشوكو ضانجي بووراي من 1991 ل 1992 لي تجمع ف جوج د الطانكووبونات. طاكاهاشي كايولي حاسم ف هاد لپيريوض ف لكاريير نتاعو، فين عتابر بزاف من لعمال دياولو اللوالا "فلوپات ب معنى لكلمة".

الطليق د يوو ݣي يوو و الشهرة لعالمية

من بعد كتر من 14 لعام ب شهرة إعلامية (ماينسترييم - Mainstream) قليلة، طاكاهاشي عرف كيفاش يصوڤي لكاريير ديالو ب لمانݣا د 1996، يوو ݣي يوو!. لمانݣا تلونصات ف شوونين جامپ لسبوعية و بقات ف التسلسيل حتى ل 2004. السيرية ولات هيت و كملات حتى باعت كتر من 40 مليون كوپي. هادشي ودى ل فتيح د واحد لفرانتشايز لي جمعات بزاف د لآضاپطاسيوات، منها آنيمي شعبي ب نفس السمية و لعبة د تباديل لكارطات. ف ال59 شابيطر اللولا د لمانݣا (طانكووبون 1 حتى ل 7) تصورات ف لقصة لعبة لكارطات لمشهورة السمعة دابا، دويلات لوحوش (ف لأصل سحور & موشعويدين)، هاد اللعبة كانت غير طرف صغير من لكونصيپط لأصلي د السيرية. ف عوض هادشي، لقصاص د لبدية وراو قاعيدة واسعة من اللوعاب، بحال حابة د لايزر، هوكي د الطابلة، معاريك د ليويو، و وحوش الزنزانة د الضاضوس. غير هو، مورا ما بدات شوونين جامپ كاتستقبل برييات مݣوپيين من لفانز كايطلبو باش اللعبة د لكارطات تولي كاتوْرى كتر من اللعاب لخرين، طاكاهاشي سمع الطلب ديالهوم و بدل لهيْت د لمانݣا. ف بلاصة من مانݣا د لمغامرات لمسلسلة مرقعة ب شي لحضات د لخلعة. لمانݣاكا بدل لميكانيزمات د السيرية ب اللعبة د لكارطات لي صاوبها علّاه. يوو ݣي يوو! مملاكة الدوويليستات علمات لبدية د هاد النقطة لمحورية.

التأتيرات و الستيل

طاكاهاشي كبر كايبغي سيرية التعاويد لعيلمي د التصوير لحي أولطرامان و حلم باش يولي شي نهار ديزاينر د وحوش د لكايجوو. هو فهم بلي كايجوو تتقمصو من عند ناس لابسين كوستيمات متقونة، و عليها الرسمات دياولو دمجو واحد لخصايل پراتيك، بحال لوقيتات د الدخلة د لمومتيلين. ف واحد لانطيرڤيو ف جامپ ستايل، طاكاهاشي غايوري بلي بزاف من لوحوش لي رسمها ف يوو ݣي يوو كانو مبازيين على هاد الديزاينات د الطفولة.

الستيل د الرسيم د طاكاهاشي ف لبدية ديالو كان ݣيكيݣا كوميك و تأتر ب لآنيميات التقليدية. شي رساما بحال دروو سترووزن، آلفونس موتشا، و نورمن راكويل كان عندهوم واحد التأتير ف الستيل د الرسيم د طاكاهاشي ف اللخر د لكاريير ديالو. لختيارات ف التويشيات د الرسيم منها، قلام-جي (g-pen)، لوان لمائية، و لفوطر د لماركة كوپيك (Copic)، ف لوقيتة لي تخدمو اللوجيسييلات د الرسيم آضوب فوطوشوپ، و پاينتر مورا التسلسيل د لمانݣا.

حياتو الشخصية

لموت ديالو

كازوكي طاكاهاشي تلقى ميت 4 يوليوز 2022، لكسدة ديالو كانت كاتطفو ف الجناب د الساحل د ناݣو، ف لمقاطعة د أوكيناوا. لقوات اللوكال د لبومبيا لقاو لجتة د طاكاهاشي معا 11:27 د الليل. مورا شي ديكلاراسيوات من شي سواح لوكال. طاكاهاشي بان بلي مات و هو كايحاول يعتق 2 د الناس كانو عايمين.

على حساب واحد الشاهدة ميريكانية من لجيش لميريكاني شافت واحد الراجل و هو كايتپلونجا ل لما فين كانو 2 د لعايمين و هوما كايتقاتلو معا واحد لكوران مجهد. الشاهدة قالت بلي ماشافتوش مزيان حيت كانت بعيدة و لاكين داكشي لي شافتو هو، شعرو لقصير، شورطو لحمر، لباسو لفوقاني كحل، لپالمات و لماسك د لغطيس. الناس لي كانو كايغرقو، بنت د 12 لعام و راجل، تعتقو ف اللخر من راجل الشاهدة لميريكانية و جوج د ل ميطر ناجور. و لاكين ف واحد لوقيتة الشاهدة لميريكانية و لخرين توضر عليهوم مول لپالمات (طاكاهاشي) و مابقاوش كايشوفوه. بعدها ب يوماين، كسدة تلقات كاتفلوطي، لحرس د السواحل الجاپونية إضونتيفياوه كا كازوكي طاكاهاشي.

عيون لكلام