Ida asal tu Buku 1 Johannes

== 1 Johannes ᯐᯬᯂᯉ᯲ᯉᯘᯩ᯲ 1 ==
1:1 Na adong sian mulana, na hubege hami, na niida ni matanami, na hupanotnoti hami, jala na jinama ni tangannami, taringot tu hata hangoluan i. ᯉ ᯀᯑᯰᯬ ᯘᯪᯀᯉ᯲ ᯔᯮᯞᯉ ᯉ ᯂᯮᯅᯩᯎᯩ ᯂᯔᯪ ᯉ ᯉᯪᯤᯑ ᯉᯪ ᯔᯖᯉᯔᯪ ᯉ ᯂᯮᯇᯉᯖᯬ᯲ᯉᯬᯖᯪ ᯂᯔᯪ ᯐᯞ ᯉ ᯐᯪᯉᯔ ᯉᯪ ᯖᯝᯉ᯲ᯉᯔᯪ ᯖᯒᯪᯝᯖᯬ᯲ ᯖᯮ ᯂᯖ ᯂᯝᯬᯞᯮᯀᯉ᯲ ᯤ

1:2 Naung gabe patar do hangoluan i, nunga huida hami, gabe huhatindangkon jala hubaritahon hami tu hamu hangoluan na salelenglelengna i, naung adong hian di adopan ni Ama i, gabe dipapatar tu hami. ᯉᯀᯮᯰ ᯎᯅᯩ ᯇᯖᯒ᯲ ᯑᯬ ᯂᯝᯬᯞᯮᯀᯉ᯲ ᯤ ᯉᯮᯝ ᯂᯮᯤᯑ ᯂᯔᯪ ᯎᯅᯩ ᯂᯮᯂᯖᯉᯪ᯲ᯑᯰᯄ᯦ᯉᯬ᯲ ᯐᯞ ᯂᯮᯅᯒᯪᯖᯂᯉᯬ᯲ ᯐᯔᯪ ᯖᯮ ᯂᯔᯮ ᯂᯝᯬᯞᯮᯀᯉ᯲ ᯉ ᯘᯞᯩᯞᯰᯩᯞᯩᯞᯰᯩᯉ ᯤ ᯉᯀᯮᯰ ᯀᯑᯰᯬ ᯂᯪᯀᯉ᯲ ᯑᯪ ᯀᯑᯬᯇᯉ᯲ ᯉᯪ ᯀᯔ ᯤ ᯎᯅᯩ ᯑᯪᯇᯇᯖᯒ᯲ ᯖᯮ ᯂᯔᯪ

1:3 Na huida jala hubege hami, i do binaritahon nang tu hamu, asa marparsaoran nang hamu rap dohot hami. Tu Ama i dohot tu Anakna Jesus Kristus do parsaoranta i. ᯉ ᯂᯮᯤᯑ ᯐᯞ ᯂᯮᯅᯩᯎᯩ ᯂᯔᯪ ᯤ ᯑᯬ ᯅᯪᯉᯒᯪᯖᯂᯉᯬ᯲ ᯉᯰ ᯖᯮ ᯂᯔᯮ ᯀᯘ ᯔᯒ᯲ᯇᯒ᯲ᯘᯀᯬᯒᯉ᯲ ᯉᯰ ᯂᯔᯮ ᯎᯇ᯲ ᯑᯬᯂᯖᯬ᯲ ᯂᯔᯪ ᯖᯮ ᯀᯔ ᯤ ᯑᯬᯂᯖᯬ᯲ ᯖᯮ ᯀᯉᯄ᯦᯲ᯉ ᯐᯩᯘᯘᯮ᯲ ᯄ᯦᯲ᯒᯘᯪ᯲ᯖᯘᯮ᯲ ᯑᯬ ᯇᯒ᯲ᯘᯀᯬᯒᯉ᯲ᯖ ᯤ

1:4 Umbahen na husurathon hami hata on tu hamu, asa gok halalas ni rohamuna. ᯀᯔᯮ᯲ᯅᯂᯉᯩ᯲ ᯉ ᯂᯮᯘᯮᯒᯖ᯲ᯂᯉᯬ᯲ ᯂᯔᯪ ᯂᯖ ᯀᯉᯬ᯲ ᯖᯮ ᯂᯔᯮ ᯀᯘ ᯎᯄ᯦ᯬ᯲ ᯂᯞᯞᯘ᯲ ᯉᯪ ᯒᯬᯂᯔᯮᯉ

1:5 On do barita, na hubege hami sian Ibana gabe binaritahon tu hamu: Panondang do Debata; ndang adong di bagasan Ibana manang aha na holom. ᯀᯉᯬ᯲ ᯑᯬ ᯅᯒᯪᯖ ᯉ ᯂᯮᯅᯩᯎᯩ ᯂᯔᯪ ᯘᯪᯀᯉ᯲ ᯤᯅᯉ ᯎᯅᯩ ᯅᯪᯉᯒᯪᯖᯂᯉᯬ᯲ ᯖᯮ ᯂᯔᯮ ᯇᯉᯉᯬ᯲ᯑᯰ ᯑᯬ ᯑᯩᯅᯖ ᯉ᯲ᯑᯰ ᯀᯑᯰᯬ ᯑᯪ ᯅᯎᯘᯉ᯲ ᯤᯅᯉ ᯔᯉᯰ ᯀᯂ ᯉ ᯂᯬᯞᯔᯬ᯲

1:6 Molo tadok, naung saor hita tu Ibana, huhut taulahon na holom, pargabus do hita, ndang siula hasintongan hita. ᯔᯬᯞᯬ ᯖᯑᯄ᯦ᯬ᯲ ᯉᯀᯮᯰ ᯘᯀᯒᯬ᯲ ᯂᯪᯖ ᯖᯮ ᯤᯅᯉ ᯂᯮᯂᯖᯮ᯲ ᯖᯥᯞᯂᯉᯬ᯲ ᯉ ᯂᯬᯞᯔᯬ᯲ ᯇᯒ᯲ᯎᯅᯘᯮ᯲ ᯑᯬ ᯂᯪᯖ ᯉ᯲ᯑᯰ ᯘᯪᯥᯞ ᯂᯘᯉᯪ᯲ᯖᯬᯝᯉ᯲ ᯂᯪᯖ

1:7 Alai molo taparangehon hatiuron, songon Ibana na di bagasan na tiur, saor do hita sama hita, jala dipaias mudar ni Jesus, Anakna i, do hita sian nasa dosa. ᯀᯞᯤ ᯔᯬᯞᯬ ᯖᯇᯒᯝᯩᯂᯉᯬ᯲ ᯂᯖᯪᯥᯒᯉᯬ᯲ ᯘᯬᯝᯉᯬ᯲ ᯤᯅᯉ ᯉ ᯑᯪ ᯅᯎᯘᯉ᯲ ᯉ ᯖᯪᯀᯒᯮ᯲ ᯘᯀᯒᯬ᯲ ᯑᯬ ᯂᯪᯖ ᯘᯔ ᯂᯪᯖ ᯐᯞ ᯑᯪᯇᯞᯘ᯲ ᯔᯮᯑᯒ᯲ ᯉᯪ ᯐᯩᯘᯘᯮ᯲ ᯀᯉᯄ᯦᯲ᯉ ᯤ ᯑᯬ ᯂᯪᯖ ᯘᯪᯀᯉ᯲ ᯉᯘ ᯑᯬᯘ

1:8 Molo tadok, na so adong dosanta, tapaotooto do dirinta, jala ndang di bagasan hita hasintongan i. ᯔᯬᯞᯬ ᯖᯑᯄ᯦ᯬ᯲ ᯉ ᯘᯬ ᯀᯑᯰᯬ ᯑᯬᯘᯉ᯲ᯖ ᯖᯇᯀᯬᯖᯬᯀᯬᯖᯬ ᯑᯬ ᯑᯪᯒᯉᯪ᯲ᯖ ᯐᯞ ᯉ᯲ᯑᯰ ᯑᯪ ᯅᯎᯘᯉ᯲ ᯂᯪᯖ ᯂᯘᯉᯪ᯲ᯖᯬᯑᯔ᯲ ᯤ

1:9 Molo tatopoti angka dosanta, haposan do Ibana jala bonar, manesa dosanta jala paiashon hita sian nasa hageduhon. ᯔᯬᯞᯬ ᯖᯖᯬᯇᯬᯖᯪ ᯀᯰᯄ᯦ ᯑᯬᯘᯉ᯲ᯖ ᯂᯇᯬᯘᯉ᯲ ᯑᯬ ᯤᯅᯉ ᯐᯞ ᯅᯬᯉᯒ᯲ ᯔᯉᯩᯘ ᯑᯬᯘᯉ᯲ᯖ ᯐᯞ ᯇᯤᯀᯘ᯲ᯂᯉᯬ᯲ ᯂᯪᯖ ᯘᯪᯀᯉ᯲ ᯉᯘ ᯂᯎᯩᯑᯮᯂᯉᯬ᯲

1:10 Molo tadok, na so mardosa hita, pargabus do Ibana tabahen, jala ndang di bagasan hita anggo hatana.ᯔᯬᯞᯬ ᯖᯑᯄ᯦ᯬ᯲ ᯉ ᯘᯬ ᯔᯒ᯲ᯑᯪᯘ ᯂᯪᯖ ᯇᯒ᯲ᯎᯅᯘᯮ᯲ ᯑᯬ ᯤᯅᯉ ᯖᯅᯂᯉᯩ᯲ ᯐᯞ ᯉ᯲ᯑᯰ ᯑᯪ ᯅᯎᯘᯉ᯲ ᯂᯪᯖ ᯀᯰᯎᯬ ᯂᯖᯉ

== 1 Johannes ᯐᯬᯂᯉ᯲ᯉᯘᯩ᯲ 2 ==
2:1 Ale angka anaha, umbahen husurat on tu hamu, asa unang mardosa hamu. Molo tung adong na mardosa, adong do pangondianta tu Ama i, i ma Jesus Kristus, partigor i. ᯀᯞᯩ ᯀᯰᯄ᯦ ᯀᯉᯂ ᯀᯔᯮ᯲ᯅᯂᯉᯩ᯲ ᯂᯮᯘᯮᯒᯖ᯲ ᯀᯉᯬ᯲ ᯖᯮ ᯂᯔᯮ ᯀᯘ ᯥᯉᯰ ᯔᯒ᯲ᯑᯬᯘ ᯂᯔᯮ ᯔᯬᯞᯬ ᯖᯮᯰ ᯀᯑᯨᯬ ᯉ ᯔᯒ᯲ᯑᯬᯘ ᯀᯑᯨᯬ ᯑᯬ ᯇᯝᯉᯬ᯲ᯑᯪᯀᯉ᯲ᯖ ᯖᯮ ᯀᯔ ᯤ ᯤ ᯔ ᯐᯩᯘᯘᯮ᯲ ᯄ᯦᯲ᯒᯘᯪ᯲ᯖᯘᯮ᯲ ᯇᯒ᯲ᯖᯪᯎᯒᯬ᯲ ᯤ

2:2 Ibana do pardengganan pasaehon angka dosanta; alai ndada holan dosanta, tung dohot do dosa ni sandok portibi on. ᯤᯅᯉ ᯑᯬ ᯇᯒ᯲ᯑᯰᯩᯎᯉᯉ᯲ ᯇᯘᯀᯩᯂᯉᯬ᯲ ᯀᯰᯄ᯦ ᯑᯬᯘᯉ᯲ᯖ ᯀᯞᯤ ᯉ᯲ᯑᯑ ᯂᯬᯞᯉ᯲ ᯑᯬᯘᯉ᯲ᯖ ᯖᯮᯰ ᯑᯬᯂᯖᯬ᯲ ᯑᯬ ᯑᯬᯘ ᯉᯪ ᯘᯉ᯲ᯑᯄ᯦ᯬ᯲ ᯇᯒᯬ᯲ᯖᯪᯅᯪ ᯀᯉᯬ᯲

2:3 Sian on do taboto, naung tatanda Ibana: Molo taradoti angka patikna. ᯘᯪᯀᯉ᯲ ᯀᯉᯬ᯲ ᯑᯬ ᯖᯅᯬᯖᯬ ᯉᯀᯮᯰ ᯖᯖᯉ᯲ᯑ ᯤᯅᯉ ᯔᯬᯞᯬ ᯖᯒᯑᯬᯖᯪ ᯀᯰᯄ᯦ ᯇᯖᯄ᯦ᯪ᯲ᯉ

2:4 Na mandok: Hutanda do Ibana; alai ndang diradoti patikna, pargabus do i, ndang adong hasintongan di bagasan ibana. ᯉ ᯔᯉ᯲ᯑᯄ᯦ᯬ᯲ ᯂᯮᯖᯉ᯲ᯑ ᯑᯬ ᯤᯅᯉ ᯀᯞᯤ ᯉ᯲ᯑᯰ ᯑᯪᯒᯑᯬᯖᯪ ᯇᯖᯄ᯦ᯪ᯲ ᯉ ᯇᯒ᯲ᯎᯅᯘᯮ᯲ ᯑᯬ ᯤ ᯉ᯲ᯑᯰ ᯀᯑᯰᯬ ᯂᯘᯉᯪ᯲ᯖᯬᯝᯉ᯲ ᯑᯪ ᯅᯎᯘᯉ᯲ ᯤᯅᯉ

2:5 Alai na mangaradoti hatana, naung tutu ma gok haholongon ni roha ni Debata di bagasan ibana. Sian i ma taboto, hita di bagasan ibana. ᯀᯞᯤ ᯉ ᯔᯝᯒᯑᯬᯖᯪ ᯂᯖᯉ ᯉᯀᯰ ᯖᯮᯖᯮ ᯔ ᯎᯄ᯦ᯬ᯲ ᯂᯂᯬᯞᯬᯝᯉᯬ᯲ ᯉᯪ ᯒᯬᯂ ᯉᯪ ᯑᯩᯅᯖ ᯑᯪ ᯅᯎᯘᯉ᯲ ᯤᯅᯉ ᯘᯪᯀᯉ᯲ ᯤ ᯔ ᯖᯅᯬᯖᯬ ᯂᯪᯖ ᯑᯪ ᯅᯎᯘᯉ᯲ ᯤᯅᯉ

2:6 Na mandok, mian di bagasan Ibana, ingkon diparangehon ma songon Ibana. ᯉ ᯔᯉ᯲ᯑᯂᯬ᯲ ᯔᯪᯀᯉ᯲ ᯑᯪ ᯅᯎᯘᯉ᯲ ᯤᯅᯉ ᯀᯰᯪᯄ᯦ᯉᯬ᯲ ᯑᯪᯇᯒᯝᯩᯂᯉᯬ᯲ ᯔ ᯘᯬᯝᯉᯬ᯲ ᯤᯅᯉ

2:7 Ale dongan, na hinaholongan, ndada patik na imbaru na husurat tu hamu, patik naung leleng do, na di hamu sian mulana. Patik naung leleng, i do hata na binegemuna i. ᯀᯞᯩ ᯑᯬᯝᯉ᯲ ᯉ ᯂᯪᯉᯂᯬᯞᯬᯝᯉ᯲ ᯉ᯲ᯑᯑ ᯇᯖᯄ᯦ᯪ᯲ ᯉ ᯀᯔᯪ᯲ᯅᯒᯮ ᯉ ᯂᯮᯘᯮᯒᯖ᯲ ᯖᯮ ᯂᯔᯮ ᯇᯖᯄ᯦ᯪ᯲  ᯉᯀᯮᯰ ᯞᯩᯞᯰᯩ ᯑᯬ ᯉ ᯑᯪ ᯂᯔᯮ. ᯘᯪᯀᯉ᯲ ᯔᯮᯞᯉ

2:8 Tong do na imbaru patik na husurat tu hamu, sintong do i di bagasan Ibana dohot di bagasan hamu, ai na salpu ma na holom; nunga marsinondang nuaeng Panondang na sintong i. ᯖᯰᯬ ᯑᯬ ᯉ ᯀᯔᯪ᯲ᯅᯒᯮ ᯇᯖᯄᯪ᯲ ᯉ ᯂᯮᯘᯮᯒᯖ᯲ ᯖᯮ ᯂᯔᯮ ᯘᯉᯪ᯲ᯖᯰᯬ ᯑᯬ ᯤ ᯑᯪ ᯅᯎᯘᯉ᯲ ᯤᯅᯉ ᯑᯬᯂᯖᯬ᯲ ᯑᯪ ᯅᯎᯘᯉ᯲ ᯂᯔᯮ ᯀᯤ ᯉ ᯘᯞ᯲ᯇᯮ ᯔ ᯉ ᯂᯬᯞᯔᯬ᯲ ᯉᯮᯝ ᯔᯒ᯲ᯘᯪᯉᯉᯬ᯲ᯑᯰ ᯉᯮᯀᯀᯰᯩ ᯇᯉᯉᯬ᯲ᯑᯰ ᯉ ᯘᯉᯪ᯲ᯖᯰᯬ ᯤ

2:9 Halak na mandok di bagasan na tiur i ibana, huhut dihosomi donganna: Na tongtong dope mian i di bagasan na holom. ᯂᯞᯄ᯲ ᯉ ᯔᯉ᯲ᯑᯄ᯦ᯬ᯲ ᯑᯪ ᯅᯎᯘᯉ᯲ ᯉ ᯖᯪᯀᯒᯮ᯲ ᯤ ᯤᯅᯉ ᯂᯮᯂᯖᯮ᯲ ᯑᯪᯂᯬᯘᯬᯔᯪ ᯑᯬᯝᯉ᯲ᯉ ᯉ ᯖᯰᯬᯖᯰᯬ ᯑᯬᯇᯩ ᯔᯪᯀᯉ᯲ ᯤ ᯑᯪ ᯅᯎᯘᯉ᯲ ᯉ ᯂᯬᯞᯔᯬ᯲

2:10 Na holong roha di donganna, i do na mian di bagasan na tiur; ndang pargasipan ibana. ᯉ ᯂᯬᯞᯰᯬ ᯒᯬᯂ ᯑᯪ ᯑᯬᯝᯉ᯲ᯉ ᯤ ᯑᯬ ᯉ ᯔᯪᯀᯉ᯲ ᯑᯪ ᯅᯎᯘᯉ᯲ ᯉ ᯖᯪᯀᯒᯮ᯲ ᯉ᯲ᯑᯰ ᯇᯒ᯲ᯎᯘᯪᯇᯉ᯲ ᯤᯅᯉ

2:11 Alai na manghosomi donganna, di bagasan na holom do i; di bagasan na holom do dalanna. Ndang diboto, manang tudia ibana laho, ai dipapitung na holom i do matana. ᯀᯞᯤ ᯉ ᯔᯰᯂᯬᯘᯬᯔᯪ ᯑᯬᯝᯉ᯲ᯉ ᯑᯪ ᯅᯎᯘᯉ᯲ ᯉ ᯂᯬᯞᯔᯬ᯲ ᯑᯬ ᯤ ᯑᯪ ᯅᯎᯘᯉ᯲ ᯉ ᯂᯬᯞᯔᯬ᯲ ᯑᯬ ᯑᯞᯉ᯲ᯉ ᯉ᯲ᯑᯰ ᯑᯪᯅᯬᯖᯬ ᯔᯉᯰ ᯖᯮᯑᯪᯀ ᯤᯅᯉ ᯞᯂᯬ ᯀᯤ ᯑᯪᯇᯇᯪᯖᯮᯰ ᯉ ᯂᯬᯞᯔᯬ᯲ ᯤ ᯑᯬ ᯔᯖᯉ

2:12 Hubahen surat tu hamu, angka anak, dibahen naung sesa dosamuna, ala ni Goarna i. ᯂᯮᯅᯂᯉᯩ᯲ ᯘᯮᯒᯖ᯲ ᯖᯮ ᯂᯔᯮ ᯀᯰᯄ᯦ ᯀᯉᯄ᯦᯲ ᯑᯪᯅᯂᯉᯩ᯲ ᯉᯀᯮᯰ ᯘᯩᯘ ᯑᯬᯘᯔᯮᯉ ᯀᯞ ᯉᯪ ᯎᯬᯀᯒ᯲ᯉ ᯤ

2:13 Hubahen surat tu hamu, angka ama, ala ditanda hamu Ibana, na sian mulana i; hubahen surat tu hamu, angka dolidoli, ala naung ditaluhon hamu parjahat i; hubahen surat tu hamu, angka anak, ala ditanda hamu Ama i. ᯂᯮᯅᯂᯉᯩ᯲ ᯘᯮᯒᯖ᯲ ᯖᯮ ᯂᯔᯮ ᯀᯰᯄ᯦ ᯀᯔ ᯀᯞ ᯑᯪᯖᯉ᯲ᯑ ᯂᯔᯮ ᯤᯅᯉ ᯉ ᯘᯪᯀᯉ᯲ ᯔᯮᯞᯉ ᯤ ᯂᯮᯅᯂᯉᯩ᯲ ᯘᯮᯒᯖ᯲ ᯖᯮ ᯂᯔᯮ ᯀᯰᯄ᯦ ᯑᯬᯞᯪᯑᯬᯞᯪ ᯀᯞ ᯉᯀᯮᯰ ᯑᯪᯖᯞᯮᯂᯉᯬ᯲ ᯂᯔᯮ ᯇᯒ᯲ᯐᯂᯖ᯲ ᯤ ᯂᯮᯅᯂᯉᯩ᯲ ᯘᯮᯒᯖ᯲ ᯖᯮ ᯂᯔᯮ ᯀᯰᯄ᯦ ᯀᯉᯄ᯦᯲ ᯀᯞ ᯑᯪᯖᯉ᯲ᯑ ᯂᯔᯮ ᯀᯔ ᯤ

2:14 Nunga hubahen surat tu hamu, angka ama, ala naung ditanda hamu Ibana, na sian mulana i; nunga hubahen surat tu hamu, angka dolidoli, ala margogo hamu, jala ala mian hata ni Debata di bagasan hamu, jala ala naung ditaluhon hamu parjahat i.ᯉᯮᯝ ᯂᯮᯅᯂᯉᯩ᯲ ᯘᯮᯒᯖ᯲ ᯖᯮ ᯂᯔᯮ ᯀᯰᯂ᯦ ᯀᯔ ᯀᯞ ᯉᯀᯮᯰ ᯑᯪᯖᯉ᯲ᯑ ᯂᯔᯮ ᯤᯅᯉ ᯉ ᯘᯪᯀᯉ᯲ ᯔᯮᯞᯉ ᯤ ᯉᯮᯝ ᯂᯮᯅᯂᯉᯩ᯲ ᯘᯮᯒᯖ᯲ ᯖᯮ ᯂᯔᯮ ᯀᯰᯄ᯦ ᯑᯬᯞᯪᯑᯬᯞᯪ ᯀᯞ ᯔᯒ᯲ᯎᯬᯎᯬ ᯂᯔᯮ ᯐᯞ ᯀᯞ ᯔᯪᯀᯉ᯲ ᯂᯖ ᯉᯪ ᯑᯩᯅᯖ ᯑᯪ ᯅᯎᯘᯉ᯲ ᯂᯔᯮ ᯐᯞ ᯀᯞ ᯉᯀᯮᯰ ᯑᯪᯖᯞᯮᯂᯉᯬ᯲ ᯂᯔᯮ ᯇᯒ᯲ᯐᯂᯖ᯲ ᯤ

2:15 Unang ma haholongi hamu portibi on, nang angka na dibagasanna! Anggo dihaholongi halak portibi on, ndang di bagasan ibana holong ni roha ni Ama i. ᯥᯉᯰ ᯔ ᯂᯂᯬᯞᯬᯝᯪ ᯂᯔᯮ ᯇᯒᯬ᯲ᯖᯪᯅᯪ ᯀᯉᯬ᯲ ᯉᯰ ᯀᯰᯄ᯦ ᯉ ᯑᯪ ᯅᯎᯘᯉ᯲ᯉ ᯀᯰᯎᯬ ᯑᯪᯂᯂᯬᯞᯬᯝᯪ ᯂᯞᯄ᯦᯲ ᯇᯒᯬ᯲ᯖᯪᯅᯪ ᯀᯉᯬ᯲ ᯉ᯲ᯑᯰ ᯑᯪ ᯅᯎᯘᯉ᯲ ᯤᯅᯉ ᯂᯬᯞᯰᯬ ᯉᯪ ᯒᯬᯂ ᯉᯪ ᯀᯔ ᯤ

2:16 Ai nasa na di portibi on, i ma lomolomo ni roha ni daging, giotgiot ni roha ni mata dohot na manenganengahon sinadongan, ndada sian Ama i anggo i, tung sian portibi on do. ᯀᯤ ᯉᯘ ᯉ ᯑᯪ ᯇᯒᯬ᯲ᯖᯪᯅᯪ ᯀᯉᯬ᯲ ᯤ ᯔ ᯞᯬᯔᯬᯞᯬᯔᯬ ᯉᯪ ᯒᯬᯂ ᯉᯪ ᯑᯎᯰᯪ ᯎᯪᯀᯖᯬ᯲ᯎᯪᯀᯖᯬ᯲ ᯉᯪ ᯒᯬᯂ ᯉᯪ ᯔᯖ ᯑᯬᯂᯖᯬ᯲ ᯉ ᯔᯉᯩᯝᯉᯩᯝᯂᯉᯬ᯲ ᯘᯪᯉᯑᯬᯝᯉ᯲ ᯉ᯲ᯑᯑ ᯘᯪᯀᯉ᯲ ᯀᯔ ᯤ ᯀᯰᯎᯬ ᯤ ᯖᯮᯰ ᯘᯪᯀᯉ᯲ ᯇᯒᯪ᯲ᯖᯪᯅᯪ ᯀᯉᯬ᯲ ᯑᯬ

2:17 Jala na laho salpu do portibi on rap dohot na pinarhagiotna; alai na mian ro di salelenglelengna do na mangulahon lomo ni roha ni Debata. ᯐᯞ ᯉ ᯞᯂᯬ ᯘᯞ᯲ᯇᯮ ᯑᯬ ᯇᯒᯬ᯲ᯖᯪᯅᯪ ᯀᯉᯬ᯲ ᯒᯇ᯲ ᯑᯬᯂᯖᯬ᯲ ᯉ ᯇᯪᯉᯒ᯲ᯂᯎᯪᯀᯖᯬ᯲ᯉ ᯀᯞᯤ ᯉ ᯔᯪᯀᯉ᯲ ᯒᯬ ᯑᯪ ᯘᯞᯩᯞᯰᯩᯞᯩᯞᯰᯩᯉ ᯑᯪ ᯉ ᯔᯝᯮᯞᯂᯉᯬ᯲ ᯞᯬᯔᯬ ᯉᯪ ᯒᯬᯂ ᯉᯪ ᯑᯩᯅᯖ

2:18 Hamu angka anaha, tingki parpudi do nuaeng; jala songon naung binegemuna, na naeng ro Antikristus i; nunga lan gabe Antikristus; sian i do taboto, nuaeng ma tingki parpudi. ᯂᯔᯮ ᯀᯰᯄ᯦ ᯀᯉᯂ ᯖᯰᯪᯄ᯦ᯪ ᯇᯒ᯲ᯇᯮᯑᯪ ᯑᯬ ᯉᯮᯀᯀᯰᯩ ᯐᯞ ᯘᯬᯝᯉᯬ᯲ ᯉᯀᯮᯰ ᯅᯪᯉᯩᯎᯩᯔᯮᯉ ᯉ ᯉᯀᯰᯩ ᯒᯬ ᯀᯉ᯲ᯖᯪᯄ᯦᯲ᯒᯘᯪ᯲ᯖᯘᯮ᯲ ᯤᯘᯪᯀᯉ᯲ ᯤ ᯑᯬ ᯖᯅᯬᯖᯬ ᯉᯮᯀᯀᯰᯩ ᯔ ᯖᯰᯪᯄ᯦ᯪ ᯇᯒ᯲ᯇᯮᯝᯪ

2:19 Sian tongatonganta do nian haroroannasida, alai ndang donganta nasida; ai aut donganta nasida, udur ma nasida dohot hita; alai naeng patar ma nasida, na so donganta saluhutna i. ᯘᯪᯀᯉ᯲ ᯖᯬᯝᯖᯬᯝᯉ᯲ᯖ ᯑᯬ ᯉᯪᯀᯉ᯲ ᯂᯒᯬᯒᯬᯀᯉ᯲ᯉᯘᯪᯑ ᯀᯞᯤ ᯉ᯲ᯑᯰ ᯑᯬᯝᯉ᯲ᯖ ᯉᯘᯪᯑ  ᯀᯤ ᯀᯀᯖᯮ᯲ ᯑᯬᯝᯉ᯲ᯖ ᯉᯘᯪᯑ ᯥᯑᯒᯮ᯲ ᯔ ᯉᯘᯪᯑ ᯑᯬᯂᯖᯬ᯲ ᯂᯪᯖ ᯀᯞᯤ ᯉᯀᯰᯩ ᯇᯖᯒ᯲ ᯔ ᯉᯘᯪᯑ ᯉ ᯘᯬ ᯑᯬᯝᯉ᯲ᯖ ᯘᯞᯮᯂᯖᯮ᯲ᯉ ᯤ

2:20 Naung miniahan ni Na-badia i do hamu, jala saluhut hamu umbotosa. ᯉᯀᯮᯰ ᯔᯪᯉᯪᯀᯂᯉ᯲ ᯉᯪ ᯉᯅᯑᯪᯀ ᯑᯬ ᯂᯔᯮ ᯐᯞ ᯘᯞᯮᯂᯖᯮ᯲ ᯂᯔᯮ ᯀᯔᯮ᯲ᯅᯬᯖᯬᯘ

2:21 Hubahen pe surat tu hamu, ndada ala so diboto hamu hasintongan i, ala naung diboto hamu i tahe, jala ndang sian hasintongan nasa gabus. ᯂᯮᯅᯂᯉᯩ᯲ ᯇᯩ ᯘᯮᯒᯖ᯲ ᯖᯮ ᯂᯔᯮ ᯉ᯲ᯑᯑ ᯀᯞ ᯘᯬ ᯑᯪᯅᯬᯖᯬ ᯂᯔᯮ ᯤ ᯖᯂᯩ ᯐᯞ ᯉ᯲ᯑᯰ ᯘᯪᯀᯉ᯲ ᯂᯘᯉᯪ᯲ᯖᯬᯝᯉ᯲ ᯉᯘ ᯎᯅᯘᯮ᯲

2:22 Ise do sipargabus i, ia so na mansoadahon, na mandok: Ndang Kristus i Jesus? I ma Antikristus, na mansoadahon Ama i dohot Anak i. ᯤᯘᯩ ᯑᯬ ᯘᯪᯇᯒ᯲ᯎᯅᯘᯮ᯲ ᯤ ᯤᯀ ᯘᯬ ᯉ ᯔᯉ᯲ᯘᯬᯀᯑᯂᯉᯬ᯲ ᯉ ᯔᯉ᯲ᯑᯄ᯦ᯬ᯲ ᯉ᯲ᯑᯰ ᯂ᯦᯲ᯒᯑᯪ᯲ᯖᯘᯮ᯲ ᯤ ᯐᯩᯘᯘᯮ᯲ ᯤ ᯔ ᯀᯉ᯲ᯖᯪᯄ᯦ᯒᯘᯪ᯲ᯖᯘᯮ᯲ ᯉ ᯔᯉ᯲ᯘᯬᯀᯑᯂᯉᯬ᯲  ᯀᯔ ᯤ ᯑᯬᯂᯖᯬ᯲ ᯀᯉᯄ᯦᯲ ᯤ

2:23 Ganup na mansoadahon Anak i, ndang di ibana nang Ama i. Halak na marhatopothon Anak i, di ibana do nang Ama i. ᯎᯉᯇᯮ᯲ ᯉ ᯔᯉ᯲ᯘᯬᯀᯑᯂᯉᯬ᯲ ᯀᯉᯄ᯦᯲ ᯤ ᯉ᯲ᯑᯰ ᯑᯪ ᯤᯅᯉ ᯉᯰ ᯀᯔ ᯤ ᯂᯞᯄ᯦᯲ ᯉ ᯔᯒ᯲ᯂᯖᯬᯇᯖᯬ᯲ᯂᯉᯬ᯲ ᯀᯉᯄ᯦᯲ ᯤ ᯑᯪ ᯤᯅᯉ ᯑᯬ ᯉᯰ ᯀᯔ ᯤ

2:24 Mian ma di bagasan hamu na binegemuna sian mulana i! Molo mian di bagasan hamu na binegemuna sian mulana i, mian ma nang hamu di bagasan Anak i dohot di bagasan Ama i. ᯔᯪᯀᯉ᯲ ᯔ ᯑᯪ ᯅᯎᯘᯉ᯲ ᯂᯔᯮ ᯉ ᯅᯪᯉᯩᯎᯩᯔᯮᯉ ᯘᯪᯀᯉ᯲ ᯔᯮᯞᯉ ᯤ ᯔᯬᯞᯬ ᯔᯪᯀᯉ᯲ ᯑᯪ ᯅᯎᯘᯉ᯲ ᯂᯔᯮ ᯉ ᯅᯪᯉᯩᯎᯩᯔᯮᯉ ᯘᯪᯀᯉ᯲ ᯔᯮᯞᯉ ᯤ ᯔᯪᯀᯉ᯲ ᯔ ᯉᯰ ᯂᯔᯮ ᯑᯪ ᯅᯎᯘᯉ᯲ ᯀᯉᯄ᯦᯲ ᯤ ᯑᯬᯂᯖᯬ᯲ ᯑᯪ ᯅᯎᯘᯉ᯲ ᯀᯔ ᯤ

2:25 Jala anggo bagabaga na pinarbagabaga na i tu hita, i ma ngolu na salelenglelengna i. ᯐᯞ ᯀᯰᯎᯬ ᯅᯎᯉᯎ ᯉ ᯇᯪᯉᯒ᯲ᯅᯎᯅᯎ ᯉ ᯤ ᯖᯮ ᯂᯪᯖ ᯤ ᯔ ᯝᯬᯞᯮ ᯉ ᯘᯞᯩᯞᯰᯩᯞᯩᯞᯰᯩᯉ ᯤ

2:26 Angka i do husurat tu hamu taringot tu angka na mangaliluhon hamu. ᯀᯰᯄ᯦ ᯤ ᯑᯬ ᯂᯮ᯦ᯮᯒᯖ᯲ ᯖᯮ ᯂᯔᯮ ᯖᯒᯪᯝᯖᯬ᯲ ᯖᯮ ᯀᯰᯄ᯦ ᯉ ᯔᯝᯞᯪᯞᯮᯂᯉᯬ᯲ ᯂᯔᯮ

2:27 Na mian do di bagasan hamu pamiahion, naung jinalomuna sian Ibana; ndang pola hamu ajaran ni halak. Sintong do na niajarhon ni pamiahion i saluhutna tu hamu, ndang adong gabus disi. Mian ma hamu di bagasan Ibana, songon naung niajarhon tu hamu! ᯉ ᯔᯪᯀᯉ᯲ ᯑᯬ ᯑᯪ ᯅᯎᯘᯉ᯲ ᯂᯔᯮ ᯇᯔᯪᯀᯂᯪᯀᯉᯬ᯲ ᯉᯀᯮᯰ ᯐᯪᯉᯞᯬᯔᯮᯉ ᯘᯪᯀᯉ᯲ ᯤᯅᯉ ᯉ᯲ᯑᯰ ᯇᯬᯞ ᯂᯔᯮ ᯀᯐᯒᯉ᯲ ᯉᯪ ᯂᯞᯄ᯦᯲ ᯘᯉᯪ᯲ᯖᯰᯬ ᯑᯬ ᯉ ᯉᯪᯀᯐᯒ᯲ᯂᯉᯬ᯲ ᯉᯪ ᯇᯔᯪᯀᯂᯪᯀᯉᯬ᯲ ᯤ ᯘᯞᯮᯂᯖᯮ᯲ᯉ ᯖᯮ ᯂᯔᯮ ᯉ᯲ᯑᯰ ᯀᯑᯰᯬ ᯎᯅᯘᯮ᯲ ᯑᯪᯘᯪ ᯔᯪᯀᯉ᯲ ᯔ ᯂᯔᯮ ᯑᯪ ᯅᯎᯘᯉ᯲ ᯤᯅᯉ ᯘᯬᯝᯉᯬ᯲ ᯉᯀᯮᯰ ᯉᯪᯀᯐᯒ᯲ᯂᯉᯬ᯲ ᯖᯮ ᯂᯔᯮ

2:28 Nuaeng pe, angka anaha, mian ma hamu di bagasan Ibana, asa marhiras ni roha hita, di na gabe patar Ibana, unang tarila hita maradophon Ibana di harorona i! ᯉᯮᯀᯀᯰᯩ ᯇᯩ ᯀᯰᯄ᯦ ᯀᯉᯂ ᯔᯪᯀᯉ᯲ ᯔ ᯂᯔᯮ ᯑᯪ ᯉᯎᯘᯉ᯲ ᯤᯅᯉ ᯀᯘ ᯔᯒ᯲ᯂᯪᯒᯘ᯲ ᯉᯪ ᯒᯬᯂ ᯂᯪᯖ ᯑᯪ ᯉ ᯎᯅᯩ ᯇᯖᯒ᯲ ᯤᯅᯉ ᯥᯉᯰ ᯖᯒᯪᯞ ᯂᯪᯖ ᯔᯒᯑᯇᯬ᯲ᯂᯉᯬ᯲ ᯤᯅᯉ ᯑᯪ ᯂᯒᯬᯒᯬᯉ ᯤ

2:29 Molo diboto hamu, tigor Ibana, boto hamu ma: Naung tubu sian Ibana do nasa na mangulahon hatigoran i.ᯔᯬᯞᯬ ᯑᯪᯅᯬᯖᯬ ᯂᯔᯮ, ᯖᯪᯎᯒᯬ᯲ ᯤᯅᯉ ᯅᯬᯖᯬ ᯂᯔᯮ ᯔ ᯉᯀᯰᯮ ᯖᯮᯅᯮ ᯘᯪᯀᯉ᯲ ᯤᯅᯉ ᯑᯬ ᯉᯘ ᯉ ᯔᯝᯮᯞᯂᯉᯬ᯲ ᯂᯖᯪᯎᯬᯒᯉ᯲ ᯤ

== 1 Johannes  ᯐᯬᯂᯉ᯲ᯉᯘᯩ᯲ 3 ==
3:1 Ida hamu ma godang ni haholongon na binasabasahon ni Ama i tu hita, ai targoar do hita angka anak ni Debata, jala angka i do hita tutu. Dibahen i, ndang ditanda portibi on hita, ai ndang ditanda anggo Ibana. ᯤᯑ ᯂᯔᯮ ᯔ ᯎᯬᯑᯰ ᯉᯪ ᯂᯂᯬᯞᯬᯝᯉᯬ᯲ ᯉ ᯅᯪᯉᯘᯅᯘᯂᯉᯬ᯲ ᯉᯪ ᯀᯔ ᯤ ᯖᯮ ᯂᯪᯖ ᯀᯤ ᯖᯒ᯲ᯎᯬᯀᯒ᯲ ᯑᯬ ᯂᯪᯖ ᯀᯰᯄ᯦ ᯀᯉᯄ᯦᯲ ᯉᯪ ᯑᯩᯅᯖ ᯐᯞ ᯀᯰᯄ᯦ ᯤ ᯑᯬ ᯂᯪᯖ ᯖᯮᯖᯮ ᯑᯪᯅᯂᯉᯩ᯲ ᯤ ᯉ᯲ᯑᯰ ᯑᯪᯖᯉ᯲ᯑ ᯇᯒᯬ᯲ᯖᯪᯅᯪ ᯀᯉᯬ᯲ ᯂᯪᯖ ᯀᯤ ᯉ᯲ᯑᯰ ᯑᯪᯖᯉ᯲ᯑ ᯀᯰᯎᯬ ᯤᯅᯉ

3:2 Hamu angka haholongan! Anak ni Debata do hita nuaeng, jala ndang dope dipapatar, manang na gabe aha hita sogot; alai taboto do: Anggo dung patar Ibana, gabe suman ma hita tu Ibana, ai idaonta do rupana sandiri. ᯂᯔᯮ ᯀᯰᯄ᯦ ᯂᯂᯬᯞᯬᯝᯉ᯲ ᯀᯉᯄ᯦᯲ ᯉᯪ ᯑᯩᯅᯖ ᯑᯬ ᯂᯪᯖ ᯉᯮᯀᯀᯰᯩ ᯐᯞ ᯉ᯲ᯑᯰ ᯑᯬᯇᯩ ᯑᯪᯇᯇᯖᯒ᯲. ᯔᯉᯰ ᯉ ᯎᯅᯩ ᯀᯂ ᯂᯪᯖ ᯘᯬᯎᯖᯬ᯲ ᯀᯞᯤ ᯖᯅᯬᯖᯬ ᯑᯬ ᯀᯰᯎᯬ ᯑᯮᯰ ᯇᯖᯒ᯲ ᯤᯅᯉ ᯎᯅᯩ ᯘᯮᯔᯉ᯲ ᯔ ᯂᯪᯖ ᯖᯮ ᯤᯅᯉ ᯀᯤ ᯤᯑᯀᯉᯬ᯲ᯖ ᯑᯬ ᯒᯮᯇᯉ ᯘᯉ᯲ᯑᯪᯒᯪ

3:3 Ganup na mangkirim songon i di Ibana, diparbadiai ma dirina, songon Ibana na badia i! ᯎᯉᯇᯮ᯲ ᯉ ᯔᯰᯄ᯦ᯪᯒᯔᯪ᯲ ᯘᯬᯝᯉᯬ᯲ ᯤ ᯑᯪ ᯤᯅᯉ ᯑᯪᯇᯒ᯲ᯅᯑᯪᯀᯤ ᯔ ᯑᯪᯒᯪᯉ ᯘᯬᯝᯉᯬ᯲ ᯤᯅᯉ ᯉ ᯅᯑᯪᯀ ᯤ

3:4 Pangalaosi do ganup na mardosa, ai pangalaosion do dosa i. ᯇᯝᯞᯀᯬᯘᯪ ᯑᯬ ᯎᯉᯇᯮ᯲ ᯉ ᯔᯒ᯲ᯑᯬᯘ ᯀᯤ ᯇᯝᯞᯀᯬᯘᯪᯘᯉᯬ᯲ ᯑᯬ ᯑᯬᯘ ᯤ

3:5 Diboto hamu do, na mambuat angka dosanta do Ibana, umbahen na ro; ndang adong dosa anggo di bagasan Ibana. ᯑᯪᯅᯬᯖᯬ ᯂᯔᯮ ᯑᯬ ᯉ ᯔᯔ᯲ᯅᯮᯀᯖ᯲ ᯀᯰᯄ᯦ ᯑᯬᯘᯉ᯲ᯖ ᯑᯬ ᯤᯅᯉ ᯀᯔᯮ᯲ᯅᯂᯉᯩ᯲ ᯉ ᯒᯬ ᯉ᯲ᯝᯰ ᯀᯑᯰᯬ ᯑᯬᯘ ᯀᯰᯎᯬ ᯑᯪ ᯅᯎᯘᯉ᯲ ᯤᯅᯉ

3:6 Nasa na mian di bagasan Ibana, ndang mardosa; ganup sipardosa, ndang dung diida jala ndang ditanda i Ibana. ᯉᯘ ᯉ ᯔᯪᯀᯉ᯲ ᯑᯪ ᯅᯎᯘᯉ᯲ ᯤᯅᯉ ᯉ᯲ᯑᯰ ᯔᯒ᯲ᯑᯬᯘ ᯎᯉᯇᯮ᯲ ᯘᯪ ᯇᯒ᯲ᯑᯬᯘ ᯉ᯲ᯑᯰ ᯑᯮᯰ ᯑᯪᯤᯑ ᯐᯞ ᯉ᯲ᯑᯰ ᯑᯪ ᯖᯉ᯲ᯑ ᯤ ᯤᯅᯉ

3:7 Hamu angka anaha, unang dipaotooto halak hamu! Siulahon hatigoran, i do na tigor, songon Ibana na tigor i. ᯂᯔᯮ ᯀᯰᯄ᯦ ᯀᯉᯂ ᯥᯉᯰ ᯑᯪᯇᯀᯬᯖᯬᯀᯬᯖᯬ ᯂᯞᯄ᯦᯲ ᯂᯔᯮ ᯘᯪᯥᯞᯂᯉᯬ᯲ ᯂᯖᯪᯎᯬᯒᯉ᯲ ᯤ ᯑᯬ ᯉ ᯖᯪᯎᯒᯬ᯲ ᯘᯬᯝᯉᯬ᯲ ᯤᯅᯉ ᯉ ᯖᯪᯎᯒᯬ᯲ ᯤ

3:8 Sian sibolis do halak na mangulahon dosa, ai sian mulana do mardosa sibolis i. Laho manegai angka ulaon ni sibolis do, umbahen na ro Anak ni Debata. ᯘᯪᯀᯉ᯲ ᯘᯪᯅᯬᯞᯘᯪ᯲ ᯑᯬ ᯂᯞᯄ᯲ ᯉ ᯔᯝᯮᯞᯂᯉᯬ᯲ ᯑᯬᯘ ᯀᯤ ᯘᯪᯀᯉ᯲ ᯔᯮᯞᯉ ᯑᯬ ᯔᯒ᯲ᯑᯬᯘ ᯘᯪ ᯅᯬᯞᯘᯪ᯲ ᯤ

3:9 Ganup naung tubu sian Debata, ndang mardosa; ai na mian do di bagasan ibana boni i. Ndang tarbahensa mardosa, ai nunga tubu sian Debata ibana. ᯎᯉᯇᯮ᯲ ᯉᯀᯮᯰ ᯖᯮᯅᯮ ᯘᯪᯀᯉ᯲ ᯑᯩᯅᯖ ᯉ᯲ᯑᯰ ᯔᯒ᯲ᯑᯬᯘ ᯀᯤ ᯉ ᯔᯪᯀᯉ᯲ ᯑᯬ ᯑᯪ ᯅᯎᯘᯉ᯲ ᯤᯅᯉ ᯅᯬᯉᯪ ᯤ ᯉ᯲ᯑᯰ ᯖᯒ᯲ᯅᯂᯉᯩ᯲ ᯔᯒ᯲ᯑᯬᯘ ᯀᯤ ᯉᯮᯝ ᯖᯮᯅᯮ ᯘᯪᯀᯉ᯲ ᯑᯩᯅᯖ ᯤᯅᯉ

3:10 Disi do tanda anak ni Debata dohot anak ni sibolis: Ndang sian Debata ganup halak na so mangulahon hatigoran, jala na so marholong ni roha di donganna. ᯑᯪᯘᯪ ᯑᯬ ᯖᯉ᯲ᯑ ᯀᯉᯄ᯦᯲ ᯉᯪ ᯝᯩᯅᯖ ᯑᯬᯂᯖᯬ᯲ ᯀᯉᯄ᯦᯲ ᯉᯪ ᯘᯪᯅᯬᯞᯘᯪ᯲ ᯉ᯲ᯑᯰ ᯘᯪᯀᯉ᯲ ᯑᯩᯅᯖ ᯎᯉᯇᯮ᯲ ᯂᯞᯄ᯦᯲ ᯉ ᯘᯬ ᯔᯝᯮᯞᯂᯉᯬ᯲ ᯂᯖᯪᯎᯬᯒᯉ᯲ ᯐᯞ ᯉ ᯘᯬ ᯔᯒ᯲ᯂᯬᯞᯰᯬ ᯉᯪ ᯒᯬᯂ ᯑᯪ ᯑᯬᯝᯉ᯲ᯉ

3:11 Ai on do barita na binegemuna sian mulana: Ingkon masihaholongan hita. ᯀᯤ ᯀᯉᯬ᯲ ᯑᯬ ᯅᯒᯪᯖ ᯉ ᯅᯪᯉᯩᯎᯩᯔᯮᯉ ᯘᯪᯀᯉ᯲ ᯔᯮᯞᯉ ᯀᯰᯪᯄᯉᯬ᯲ ᯔᯘᯪᯂᯂᯬᯞᯬᯝᯉ᯲ ᯂᯪᯖ

3:12 Unang ma songon si Kain, ai sian hajahaton do ibana, gabe dibunu do anggina. Dia do alana, umbahen na dibunu? Ala na jahat ulaonna; alai tigor do ulaon ni anggina. ᯥᯉᯰ ᯔ ᯘᯬᯝᯉᯬ᯲ ᯘᯪ ᯂ᯦ᯀᯉᯪ᯲ ᯀᯤ ᯘᯪᯀᯉ᯲ ᯂᯐᯂᯖᯉᯬ᯲ ᯑᯬ ᯤᯅᯉ ᯎᯅᯩ ᯝᯪᯅᯮᯉᯮ ᯑᯬ ᯀᯰᯎᯪᯉ ᯑᯪᯀ ᯑᯬ ᯀᯞᯉ ᯀᯔᯮ᯲ᯅᯂᯉᯩ᯲ ᯉ ᯑᯪᯅᯮᯉᯮ ᯀᯞ ᯉ ᯐᯂᯖ᯲ ᯥᯞᯀᯉᯬ᯲ᯉ ᯀᯞᯤ ᯖᯪᯎᯒᯬ᯲ ᯑᯬ ᯥᯞᯀᯉᯬ᯲ ᯉᯪ ᯀᯰᯎᯪᯉ

3:13 Unang ma longang rohamuna, angka dongan, molo dihosomi portibi on hamu. ᯥᯉᯰ ᯔ ᯞᯬᯝᯰ ᯒᯬᯂᯔᯮᯉ ᯀᯰᯄ᯦ ᯑᯬᯝᯉ᯲ ᯔᯬᯞᯬ ᯑᯪᯂᯬᯘᯬᯔᯪ ᯇᯒᯬ᯲ᯖᯪᯅᯪ ᯀᯉᯬ᯲ ᯂᯔᯮ

3:14 Taboto do, naung taripar hita sian hamatean tu hangoluan, ala tahaholongi angka dongan. Na so parholong ni roha, mian do di bagasan hamatean. ᯖᯅᯬᯖᯬ ᯑᯬ ᯉᯀᯮᯰ ᯖᯒᯪᯇᯒ᯲ ᯂᯪᯖ ᯘᯪᯀᯉ᯲ ᯂᯔᯖᯩᯀᯉ᯲ ᯖᯮ ᯂᯝᯬᯞᯮᯀᯉ᯲ ᯀᯞ ᯖᯂᯂᯬᯞᯬᯝᯪ ᯀᯰᯄ᯦ ᯑᯬᯝᯉ᯲ ᯉ ᯘᯬ ᯇᯒ᯲ᯂᯬᯞᯰᯬ ᯉᯪ ᯒᯬᯂ ᯔᯪᯀᯉ᯲ ᯑᯬ ᯑᯪᯅᯎᯘᯉ᯲ ᯂᯔᯖᯩᯀᯉ᯲

3:15 Sibunu jolma do ganup na hosom roha di donganna; jala diboto hamu do, na so mian hangoluan salelenglelengna di nasa dibunu jolma. ᯘᯪᯅᯮᯉᯮ ᯐᯞᯬ᯲ᯔ ᯑᯬ ᯎᯉᯇᯮ᯲ ᯉ ᯂᯬᯘᯔᯬ᯲ ᯒᯬᯂ ᯑᯪ ᯑᯬᯝᯉ᯲ᯉ ᯐᯞ ᯑᯪᯅᯬᯖᯬ ᯂᯔᯮ ᯑᯬ ᯉ ᯘᯬ ᯔᯪᯀᯉ᯲ ᯂᯝᯬᯞᯮᯀᯉ᯲ ᯘᯞᯩᯞᯰᯩᯞᯩᯟᯰᯩᯉ ᯑᯪ ᯉᯘ ᯑᯪᯅᯮᯉᯮ ᯐᯞᯬ᯲ᯔ

3:16 Sian on do tatanda haholongon ni roha: Sian ibana na mangalehon hosana humongkop hita. Hita pe, tama do talehon hosanta humongkop donganta. ᯘᯪᯀᯉ᯲ ᯀᯉᯬ ᯑᯬ ᯖᯖᯉ᯲ᯑ ᯂᯂᯬᯞᯬᯝᯉ᯲ ᯉᯪ ᯒᯬᯂ ᯘᯪᯀᯉ᯲ ᯤᯅᯉ ᯉ ᯔᯝᯞᯩᯂᯉᯬ᯲ ᯂᯬᯘᯉ ᯂᯮᯔᯰᯬᯄ᯦ᯇᯬ᯲ ᯝᯬᯝᯉ᯲ᯉ

3:17 Molo adong paradongan di tano on, ia diida hurangan donganna, gabe dihinsu ateatena maradophon halak i, tung songon dia ma mian holong ni roha ni Debata di bagasan ibana? ᯔᯬᯞᯬ ᯀᯑᯰᯬ ᯇᯒᯑᯬᯝᯉ᯲ ᯑᯪ ᯖᯉᯬ ᯀᯉᯬ᯲ ᯤᯀ ᯑᯪᯤᯑ ᯂᯮᯒᯎᯉ᯲ ᯑᯬᯝᯉ᯲ᯉ ᯎᯅᯩ ᯑᯪᯂᯉᯪ᯲ᯘᯮ ᯀᯖᯩᯀᯖᯩᯉ ᯔᯒᯑᯇᯬ᯲ᯂᯉᯬ᯲ ᯂᯞᯄ᯦᯲ ᯤ ᯖᯮᯰ ᯘᯬᯝᯉᯬ᯲ ᯑᯪᯀ ᯔ ᯔᯪᯀᯉ᯲ ᯂᯬᯞᯰᯬ ᯉᯪ ᯒᯬᯂ ᯉᯪ ᯑᯩᯅᯖ ᯑᯪ ᯅᯎᯘᯉ᯲ ᯤᯅᯉ

3:18 Hamu angka anaha, unang ma hatanta dohot dilanta mangkaholongi; naeng ma marhitehite pambahenan dohot hasintongan. ᯂᯔᯮ ᯀᯰᯄ᯦ ᯀᯉᯂ ᯥᯉᯰ ᯔ ᯂᯖᯉ᯲ᯖ ᯑᯬᯂᯖᯬ᯲ ᯑᯞᯉ᯲ᯖ ᯔᯰᯄ᯦ᯂᯬᯞᯬᯝᯪ ᯉᯀᯰᯩ ᯔ ᯔᯒ᯲ᯂᯪᯖᯩᯂᯪᯖᯩ ᯇᯔ᯲ᯅᯂᯩᯉᯉ᯲ ᯑᯬᯂᯖᯬ᯲ ᯂᯘᯉᯪ᯲ᯖᯬᯝᯉ᯲

3:19 Disi ma botoonta, paboa sian hasintongan hita jala tapapos rohanta di Jolona. ᯑᯪᯘᯪ ᯔ ᯅᯬᯖᯬᯀᯉᯬ᯲ᯖ ᯇᯅᯬᯀ ᯘᯪᯀᯉ᯲ ᯂᯘᯉᯪ᯲ᯖᯬᯝᯉ᯲ ᯂᯪᯖ ᯐᯞ ᯖᯇᯇᯘᯬ᯲ ᯒᯬᯂᯉ᯲ᯖ ᯑᯪ ᯐᯬᯞᯬᯉ

3:20 Molo disolsoli rohanta hita, umbalga do Debata sian rohanta jala diboto saluhutna. ᯔᯬᯞᯬ ᯑᯪᯘᯞᯬ᯲ᯘᯬᯞᯪ ᯒᯬᯂᯉ᯲ᯖ ᯂᯪᯖ ᯀᯔ᯲ᯅᯞ᯲ᯎ ᯑᯬ ᯑᯩᯅᯖ ᯘᯪᯀᯉ᯲ ᯒᯬᯂᯉ᯲ᯖ ᯐᯞ ᯑᯪᯅᯬᯖᯬ ᯘᯞᯮᯂᯖᯮ᯲ᯉ 

3:21 Hamu angka haholongan, molo so disolsoli rohanta hita, marhiras ni roha do hita maradophon Debata. ᯂᯔᯮ ᯀᯰᯄ᯦ ᯂᯂᯬᯞᯬᯝᯉ᯲ ᯔᯬᯞᯬ ᯘᯬ ᯑᯪᯘᯞᯬ᯲ᯘᯬᯞᯪ ᯒᯬᯂᯉ᯲ᯖ ᯂᯪᯖ ᯔᯒ᯲ᯂᯪᯒᯘ᯲ ᯉᯪ ᯒᯬᯂ ᯑᯬ ᯂᯪᯖ ᯔᯒᯑᯇᯬ᯲ᯂᯉᯬ᯲ ᯑᯩᯅᯖ

3:22 Jadi manang aha pe tapangido, jaloonta do sian Ibana, ala taradoti patikna jadi taula lomo ni rohana. ᯐᯑᯪ ᯔᯉᯰ ᯀᯂ ᯇᯩ ᯖᯇᯝᯪᯑᯬ ᯐᯞᯬᯀᯉᯬ᯲ᯖ ᯑᯬ ᯘᯪᯀᯉ᯲ ᯤᯅᯉ ᯀᯞ ᯖᯒᯑᯬᯖᯪ ᯇᯖᯄ᯦ᯪ᯲ᯉ ᯐᯑᯪ ᯖᯥᯞ ᯞᯬᯔᯬ ᯉᯪ ᯒᯬᯂᯉ

3:23 On do patikna: Naeng porsea hita di Goar ni Anakna Jesus Kristus, huhut masihaholongan, songon naung tinonahonna i tu hita. ᯀᯉᯬ᯲ ᯑᯬ ᯇᯖᯄ᯦ᯪ᯲ᯉ ᯉᯀᯰᯩ ᯇᯒᯬ᯲ᯘᯩᯀ ᯂᯪᯖ ᯑᯪ ᯎᯬᯀᯒ᯲ ᯉᯪ ᯀᯉᯄ᯦᯲ᯉ ᯐᯩᯘᯘᯮ᯲ ᯄ᯦᯲ᯒᯘᯪ᯲ᯖᯘᯮ᯲ ᯂᯮᯂᯖᯮ᯲ ᯔᯒ᯲ᯘᯪᯂᯂᯬᯞᯪᯝᯉ᯲ ᯘᯬᯝᯉᯬ᯲ ᯉᯀᯮᯰ ᯖᯪᯉᯬᯉᯂᯉᯬ᯲ᯉ ᯤ ᯖᯮ ᯂᯪᯖ

3:24 Siradoti patikna, i do na mian di bagasan Ibana jala Debata di bagasan ibana. Jala sian on do taboto, naung mian Ibana di bagasan hita: Sian Tondi i, na nilehonna i tu hita. ᯘᯪᯒᯑᯬᯖᯪ ᯇᯖᯄᯪ᯲ᯉ ᯤ ᯑᯬ ᯉ ᯔᯪᯀᯉ᯲ ᯑᯪ ᯅᯎᯘᯉ᯲ ᯤᯅᯉ ᯐᯞ ᯑᯩᯅᯖ ᯑᯪ ᯅᯎᯘᯉ᯲ ᯤᯅᯉ ᯐᯞ ᯘᯪᯀᯉ᯲ ᯀᯉᯬ᯲ ᯑᯬ ᯖᯅᯬᯖᯬ ᯉᯀᯮᯰ ᯔᯪᯀᯉ᯲ ᯤᯅᯉ ᯑᯪ ᯅᯎᯘᯉ᯲ ᯂᯪᯖ ᯘᯪᯀᯉ᯲ ᯖᯉᯬ᯲ᯑᯪ ᯤ ᯉ ᯉᯪᯞᯩᯂᯉᯬ᯲ᯉ ᯤ ᯖᯮ ᯂᯪᯖ

== 1 Johannes ᯐᯬᯂᯉ᯲ᯉᯘᯩ᯲ 4 ==
4:1 Hamu angka haholongan, unang ma ganup tondi haporseai hamu; unjuni hamu ma, manang na sian Debata angka tondi; ai nunga borhat torop panurirang pargapgap tu portibi on. ᯂᯔᯮ ᯀᯰᯄ᯦ ᯂᯂᯬᯞᯬᯝᯉ᯲ ᯥᯉᯰ ᯔ ᯎᯉᯇᯮ᯲ ᯖᯉᯬ᯲ᯑᯪ ᯂᯇᯒᯬ᯲ᯘᯩᯀᯤ ᯂᯔᯮ ᯀᯉᯮ᯲ᯐᯮᯉᯪ ᯂᯔᯮ ᯔ ᯔᯉᯰ ᯉ ᯘᯪᯀᯉ᯲ ᯑᯩᯅᯖ ᯀᯰᯄ᯦ ᯖᯉᯬ᯲ᯑᯪ ᯀᯤ ᯉᯮᯝ ᯅᯒᯬ᯲ᯂᯖ᯲ ᯖᯬᯒᯇᯬ᯲ ᯇᯉᯮᯒᯪᯒᯰ ᯇᯒ᯲ᯎᯇ᯲ᯎᯇ᯲ ᯖᯮ ᯇᯒᯬ᯲ᯖᯪᯅᯪ ᯀᯉᯬ᯲

4:2 Sian on ma tanda hamu Tondi ni Debata: Ganup tondi ma marhatopothon Jesus Kristus…, naung ro di bagasan daging, i ma sian Debata. ᯘᯪᯀᯉ᯲ ᯀᯉᯬ᯲ ᯔ ᯖᯉ᯲ᯑ ᯂᯔᯮ ᯖᯉᯬ᯲ᯑᯪ ᯉᯪ ᯑᯩᯅᯖ ᯎᯉᯇᯮ᯲ ᯖᯉᯬ᯲ᯑᯪ ᯔ ᯔᯒ᯲ᯂᯖᯬᯇᯖᯬ᯲ᯂᯉᯬ᯲ ᯐᯩᯘᯘᯮ᯲ ᯄ᯦᯲ᯒᯘᯪ᯲ᯖᯘᯮ᯲ ᯉᯀᯮᯰ ᯒᯬ ᯑᯪ ᯅᯎᯘᯉ᯲ ᯑᯎᯰᯪ ᯤ ᯔ ᯘᯪᯀᯉ᯲ ᯑᯩᯅᯖ

4:3 Ganup tondi na so marhatopothon Jesus i, i ma na.. so sian Debata. I ma pangalaho ni Antikristus, na naeng ro i, songon naung binegemuna; jala nunga di portibi on ibana nuaeng. ᯎᯉᯇᯮ᯲ ᯖᯉᯬ᯲ᯑᯪ ᯉ ᯘᯬ ᯔᯒ᯲ᯂᯖᯬᯇᯖᯬ᯲ᯂᯉᯬ᯲ ᯐᯩᯘᯘᯮ᯲ ᯤ ᯤ ᯔ ᯉ ᯘᯬ ᯘᯪᯀᯉ᯲ ᯑᯩᯅᯖ ᯤ ᯔ ᯇᯝᯞᯂᯬ ᯉᯪ ᯀᯉ᯲ᯖᯪᯄ᯦᯲ᯒᯘᯪ᯲ᯖᯘᯮ᯲ ᯉ ᯉᯀᯰᯩ ᯒᯬ ᯤ ᯘᯬᯝᯉᯬ᯲ ᯉᯀᯮᯰ ᯅᯪᯉᯩᯎᯩᯔᯮᯉ ᯐᯞ ᯉᯮᯝ ᯑᯪ ᯇᯒᯬ᯲ᯖᯪᯅᯪ ᯀᯉᯬ᯲ ᯤᯅᯉ ᯉᯮᯀᯀᯰᯩ

4:4 Sian Debata do anggo hamu, angka anaha; jala nunga ditaluhon hamu nasida, ai umbalga do Ibana na di bagasan hamu, asa na di bagasan portibi on. ᯘᯪᯀᯉ᯲ ᯑᯩᯅᯖ ᯑᯬ ᯀᯰᯎᯬ ᯂᯔᯮ ᯀᯰᯄ᯦ ᯀᯉᯂ ᯐᯞ ᯉᯮᯝ ᯑᯪᯖᯞᯮᯂᯉᯬ᯲ ᯂᯔᯮ ᯉᯘᯪᯑ ᯀᯤ ᯀᯔᯮ᯲ᯅᯞ᯲ᯎ ᯑᯬ ᯤᯅᯉ ᯉ ᯑᯪ ᯅᯎᯘᯉ᯲ ᯂᯔᯮ ᯀᯘ ᯉ ᯑᯪ ᯅᯎᯘᯉ᯲ ᯇᯒᯬ᯲ᯖᯪᯅᯪ ᯀᯉᯬ᯲

4:5 Sian portibi on do anggo nasida; dibahen i; sian portibi on do hatanasida, jala ditangihon portibi on do nasida. ᯘᯪᯀᯉ᯲ ᯇᯒᯬ᯲ᯖᯪᯅᯪ ᯀᯉᯬ᯲ ᯑᯬ ᯀᯰᯎᯬ ᯉᯘᯪᯑ ᯑᯪᯅᯂᯉᯩ᯲ ᯤ ᯘᯪᯀᯉ᯲ ᯇᯒᯬᯖᯪᯅᯪ ᯀᯉᯬ᯲ ᯑᯬ ᯂᯖᯉᯘᯪᯑ ᯐᯞ ᯝᯪᯖᯝᯪᯂᯉᯬ᯲ ᯇᯒᯬ᯲ᯖᯪᯅᯪ ᯀᯉᯬ᯲ ᯑᯬ ᯉᯘᯪᯑ

4:6 Sian Debata do ia hita. Halak na tumanda Debata, i ma na tumangihon hita; halak na so sian Debata, i ma na so tumangihon hita. Sian i do tatanda Tondi hasintongan dohot tondi sipaotooto. ᯘᯪᯀᯉ᯲ ᯑᯩᯅᯖ ᯑᯬ ᯤᯀ ᯂᯪᯖ ᯂᯞᯄ᯦᯲ ᯉ ᯖᯮᯔᯉ᯲ᯑ ᯑᯩᯅᯖ ᯤ ᯔ ᯉ ᯖᯮᯔᯝᯪᯂᯉᯬ᯲ ᯂᯪᯖ ᯂᯞᯄ᯦᯲ ᯉ ᯘᯬ ᯘᯪᯀᯉ᯲ ᯑᯩᯅᯖ ᯤ ᯔ ᯉ ᯘᯬ ᯖᯮᯔᯝᯪᯂᯉᯬ᯲ ᯂᯪᯖ ᯘᯪᯀᯉ᯲ ᯤ ᯑᯬ ᯖᯖᯉ᯲ᯑ ᯖᯉᯬ᯲ᯑᯪ ᯂᯘᯉᯪ᯲ᯖᯬᯝᯉ᯲ ᯑᯬᯂᯖᯬ᯲ ᯖᯉᯬ᯲ᯑᯪ ᯘᯪᯇᯀᯬᯖᯬᯀᯬᯖᯬ

4:7 Hamu angka haholongan, masihaholongan ma hita, ai sian Debata do haholongon i, jala ganup na marholong ni roha, i ma naung tubu sian Debata jala ditanda do Debata. ᯂᯔᯮ ᯀᯰᯄ᯦ ᯂᯂᯬᯞᯬᯝᯉ᯲ ᯔᯘᯪᯂᯂᯬᯞᯬᯝᯉ᯲ ᯔ ᯂᯪᯖ ᯀᯤ ᯘᯪᯀᯉ᯲ ᯑᯩᯅᯖ ᯑᯬ ᯂᯂᯬᯞᯬᯝᯉᯬ᯲ ᯤ ᯐᯞ ᯎᯉᯇᯮ᯲ ᯉ ᯔᯒ᯲ᯂᯬᯞᯰᯬ ᯉᯪ ᯒᯬᯂ ᯤ ᯔ ᯉᯀᯮᯰ ᯖᯮᯅᯮ ᯘᯪᯀᯉ᯲ ᯑᯩᯅᯖ ᯐᯞ ᯑᯪᯖᯉ᯲ᯝ ᯑᯬ ᯑᯩᯅᯖ

4:8 Halak na so marholong ni roha, i do na so tumanda Debata, ai haholongon do Debata. ᯂᯞᯄ᯦᯲ ᯉ ᯘᯬ ᯔᯒ᯲ᯂᯬᯞᯰᯬ ᯉᯪ ᯒᯬᯂ ᯤ ᯑᯬ ᯉ ᯘᯬ ᯖᯮᯔᯉ᯲ᯑ ᯑᯩᯅᯖ ᯀᯤ ᯂᯂᯬᯞᯬᯝᯉᯬ᯲ ᯑᯬ ᯑᯩᯅᯖ

4:9 Sian on do gabe patar holong ni roha ni Debata na tu hita; sian naung sinuruna i Anakna na sasada i tu portibi on, asa mangolu hita marhitehite Ibana. ᯘᯪᯀᯉ᯲ ᯀᯉᯬ᯲ ᯑᯬ ᯎᯅᯩ ᯇᯖᯒ᯲ ᯂᯬᯞᯰᯬ ᯉᯪ ᯒᯬᯂ ᯉᯪ ᯑᯩᯅᯖ ᯉ ᯖᯮ ᯂᯪᯖ ᯘᯪᯀᯉ᯲ ᯉᯀᯮᯰ ᯘᯪᯉᯮᯒᯮᯉ ᯤ ᯀᯉᯄ᯦᯲ᯉ ᯉ ᯘᯘᯑ ᯤ ᯖᯮ ᯇᯒᯬ᯲ᯖᯪᯅᯪ ᯀᯉᯬ᯲ ᯀᯘ ᯔᯝᯬᯞᯮ ᯂᯪᯖ ᯔᯒ᯲ᯂᯪᯖᯩᯂᯪᯖᯩ ᯤᯅᯉ

4:10 Di bagasan on do holong ni roha i: Ndada hita mangkaholongi Debata; Ibana do mangkaholongi hita, jala disuru do Anakna, bahen pardengganan pasaehon dosanta. ᯑᯪ ᯅᯎᯘᯉ᯲ ᯀᯉᯬ᯲ ᯑᯬ ᯂᯬᯞᯰᯬ ᯉᯪ ᯒᯬᯂ ᯤ ᯉ᯲ᯑᯑ ᯂᯪᯖ ᯔᯰᯂ᯦ᯂᯬᯞᯬᯝᯪ ᯑᯩᯅᯖ ᯤᯅᯉ ᯑᯬ ᯔᯰᯂ᯦ᯂᯬᯞᯬᯝᯪ ᯂᯪᯖ ᯐᯞ ᯑᯪᯘᯮᯒᯮ ᯑᯬ ᯀᯉᯄ᯦᯲ᯉ ᯅᯂᯉᯩ᯲ ᯇᯒ᯲ᯑᯰᯩᯎᯉᯉ᯲ ᯇᯘᯀᯩᯂᯉᯬ᯲ ᯑᯬᯘᯉ᯲ᯖ

4:11 Hamu angka haholongan, anggo songon i holong ni roha ni Debata di hita, tama ma nang hita masihaholongan! ᯂᯔᯮ ᯀᯰᯄ᯦ ᯂᯂᯬᯞᯬᯝᯉ᯲ ᯀᯰᯎᯬ ᯘᯬᯝᯉᯬ᯲ ᯤ ᯂᯬᯞᯰᯬ ᯉᯪ ᯒᯬᯂ ᯉᯪ ᯑᯩᯅᯖ ᯑᯪ ᯂᯪᯖ ᯖᯔ ᯔ ᯉᯰ ᯂᯪᯖ ᯔᯒ᯲ᯘᯪᯂᯂᯬᯞᯬᯝᯉ᯲

4:12 Ndang dung adong halak na marnida Debata. Molo masihaholongan hita, mian ma Debata di bagasan hita, jala tipak ma holong ni rohana i di bagasan hita. ᯉ᯲ᯑᯰ ᯑᯮᯰ ᯀᯑᯰᯬ ᯂᯞᯄ᯦᯲ ᯉ ᯔᯒ᯲ᯉᯪᯑ ᯑᯩᯅᯖ ᯔᯬᯞᯬ ᯔᯒ᯲ᯘᯪᯂᯂᯬᯞᯬᯝᯉ᯲ ᯂᯪᯖ ᯔᯪᯀᯉ᯲ ᯔ ᯑᯩᯅᯖ ᯑᯪ ᯅᯎᯘᯉ᯲ ᯂᯪᯖ ᯐᯞ ᯖᯪᯇᯄ᯦᯲ ᯔ ᯂᯬᯞᯰᯬ ᯉᯪ ᯒᯪᯂᯉ ᯤ ᯑᯪ ᯅᯎᯘᯉ᯲ ᯂᯪᯖ

4:13 Sian on do taboto, hita mian di bagasan Ibana jala Ibana di bagasan hita: Ala naung nilehonna i tu hita sian Tondina i.ᯘᯪᯀᯉ᯲ ᯀᯉᯬ᯲ ᯑᯬ ᯖᯅᯬᯖᯬ ᯂᯪᯖ ᯔᯪᯀᯉ᯲ ᯑᯪ ᯅᯎᯘᯉ᯲ ᯂᯪᯖ ᯀᯞ ᯉᯀᯮᯰ ᯉᯪᯞᯩᯂᯉᯬ᯲ᯉ ᯤ ᯖᯮ ᯂᯪᯖ ᯘᯪᯀᯉ᯲ ᯖᯉᯬ᯲ᯑᯪᯉ ᯤ

4:14 Huida jala huhatindangkon hami, naung disuru Ama i do Anak i, bahen Sipalua portibi on. ᯂᯮᯤᯑ ᯐᯞ ᯂᯮᯂᯖᯉᯪ᯲ᯑᯰᯄ᯲ᯉᯬ᯲ ᯂᯔᯪ ᯉᯀᯮᯰ ᯑᯪᯘᯮᯒᯮ ᯀᯔ ᯤ ᯑᯬ ᯀᯉᯄ᯦᯲ ᯤ ᯅᯂᯉᯩ᯲ ᯘᯪᯇᯞᯮᯀ ᯇᯒᯬ᯲ᯖᯪᯅᯪ ᯀᯉᯬ᯲

4:15 Ia i na marhatopothon, Jesus do Anak ni Debata, di bagasan ibana do mian Debata jala ibana di bagasan Debata. ᯤᯀ ᯤ ᯉ ᯔᯒ᯲ᯂᯖᯬᯇᯖᯬ᯲ᯂᯉᯬ᯲ ᯐᯩᯘᯘᯮ᯲ ᯑᯬ ᯀᯉᯄ᯦᯲ ᯉᯪ ᯑᯩᯅᯖ ᯑᯪ ᯅᯎᯘᯉ᯲ ᯤᯅᯉ ᯑᯬ ᯔᯪᯀᯉ᯲ ᯑᯩᯅᯖ ᯐᯞ ᯤᯅᯉ ᯑᯪ ᯅᯎᯘᯉ᯲ ᯑᯩᯅᯖ

4:16 Nunga tatanda jala tahaporseai holong ni roha ni Debata di hita. Debata do haholongon i; jala halak na mian di bagasan haholongon, i do na mian di bagasan Debata jala Debata di bagasan ibana. ᯉᯮᯝ ᯖᯖᯉ᯲ᯑ ᯐᯞ ᯖᯂᯇᯒᯬ᯲ᯘᯩᯀᯤ ᯂᯬᯞᯰᯬ ᯉᯪ ᯒᯬᯂ ᯉᯪ ᯑᯩᯅᯖ ᯑᯪ ᯂᯪᯖ ᯑᯩᯅᯖ ᯑᯬ ᯂᯂᯬᯞᯬᯝᯉᯬ᯲ ᯤ ᯐᯞ ᯂᯞᯄ᯦᯲ ᯉ ᯔᯪᯀᯉ᯲ ᯑᯪ ᯅᯎᯘᯉ᯲ ᯂᯂᯬᯞᯬᯝᯉᯬ᯲ ᯤ ᯑᯬ ᯉ ᯔᯪᯀᯉ᯲ ᯑᯪᯅᯎᯘᯉ᯲ ᯑᯩᯅᯖ ᯐᯞ ᯑᯩᯅᯖ ᯑᯪ ᯅᯎᯘᯉ᯲ ᯤᯅᯉ

4:17 Disi ma gabe tipak holong ni roha i di bagasan hita, pola marhiras ni roha hita di ari paruhuman i; ai songon Ibana, songon i do nang hita di portibi on. ᯑᯪᯘᯪ ᯔ ᯎᯅᯩ ᯖᯪᯇᯄ᯦᯲ ᯂᯬᯞᯰᯬ ᯉᯪ ᯒᯬᯂ ᯤ ᯑᯪ ᯅᯎᯘᯉ᯲ ᯂᯪᯖ ᯇᯬᯞ ᯔᯒ᯲ᯂᯪᯒᯘ᯲ ᯉᯪ ᯒᯬᯂ ᯂᯪᯖ ᯑᯪ ᯀᯒᯪ ᯇᯒᯮᯂᯮᯔᯉ᯲ ᯤ ᯀᯤ ᯘᯬᯝᯉᯬ᯲ ᯤᯅᯉ ᯘᯬᯝᯉᯬ᯲ ᯤ ᯑᯬ ᯉᯰ ᯂᯪᯖ ᯑᯪ ᯇᯒᯬ᯲ᯖᯪᯅᯪ ᯀᯉᯬ᯲

4:18 Ndang adong biar di bagasan holong ni roha i; alai dipabali holong ni roha naung rimpas i do biar i. Ai na bernit do anggo biar; jala ndang rimpas holong ni roha ni halak na mabiar. ᯉ᯲ᯑᯰ ᯀᯑᯰᯬ ᯅᯪᯀᯒ᯲ ᯑᯪ ᯅᯎᯘᯉ᯲ ᯂᯬᯞᯰᯬ ᯉᯪ ᯒᯬᯂ ᯤ ᯀᯞᯤ ᯑᯪᯇᯅᯞᯪ ᯂᯬᯞᯰᯬ ᯉᯪ ᯒᯬᯂ ᯉᯀᯮᯰ ᯒᯔᯪ᯲ᯇᯘ᯲ ᯤ ᯑᯬ ᯅᯪᯀᯒ᯲ ᯤ ᯀᯤ ᯉ ᯅᯒᯩ᯲ᯉᯖᯪ᯲ ᯑᯬ ᯀᯰᯎᯬ ᯅᯪᯀᯒ᯲ ᯐᯞ ᯉ᯲ᯑᯰ ᯒᯔᯪ᯲ᯇᯘ᯲ ᯂᯬᯞᯰᯬ ᯉᯪ ᯒᯬᯂ ᯉᯪ ᯂᯞᯄ᯦᯲ ᯉ ᯔᯅᯪᯀᯒ᯲

4:19 Marroha holong ma hita, ala Ibana jumolo mangkaholongi hita! ᯔᯒ᯲ᯒᯬᯂ ᯂᯬᯞᯰᯬ ᯔ ᯂᯪᯖ ᯀᯞ ᯤᯅᯉ ᯐᯮᯔᯬᯞᯬ ᯔᯰᯄ᯦ᯂᯬᯞᯬᯝᯪ ᯂᯪᯖ

4:20 Pargabus do halak na mandok: Holong rohana di Debata; hape dihosomi do donganna. Ai na so mangkaholongi donganna na niidana, tung songon dia ma haholonganna Debata na so niidana? ᯇᯒ᯲ᯎᯅᯘᯮ᯲ ᯑᯬ ᯂᯞᯄ᯦᯲ ᯉ ᯔᯉ᯲ᯑᯄ᯦ᯬ᯲ ᯂᯬᯞᯰᯬ ᯒᯬᯂᯉ ᯑᯪ ᯑᯩᯅᯖ ᯂᯇᯩ ᯑᯪᯂᯬᯘᯬᯔᯪ ᯑᯬ ᯑᯬᯝᯉ᯲ᯉ ᯀᯤ ᯉ ᯘᯬ ᯔᯰᯄ᯦ᯂᯬᯞᯬᯝᯪ ᯑᯬᯝᯉ᯲ᯉ ᯉ ᯉᯪᯤᯑᯉ ᯖᯮᯰ ᯘᯬᯝᯉᯬ᯲ ᯑᯪᯀ ᯔ ᯂᯂᯬᯞᯬᯝᯉ᯲ᯉ ᯑᯩᯅᯖ ᯉ ᯘᯬ ᯉᯪᯤᯑᯉ

4:21 On do patik na tajalo sian Ibana: Na mangkaholongi Debata, i ma na mangkaholongi nang donganna. ᯀᯉᯬ᯲ ᯑᯬ ᯇᯖᯂᯪ᯲ ᯉ ᯖᯐᯞᯬ ᯘᯪᯀᯉ᯲ ᯤᯅᯉ ᯉ ᯔᯰᯄ᯦ᯂᯬᯞᯬᯝᯪ ᯑᯩᯅᯖ ᯤ ᯔ ᯉ ᯔᯰᯄ᯦ᯂᯬᯞᯝᯪ ᯉᯰ ᯑᯬᯝᯉ᯲ᯉ

== 1 Johannes ᯐᯬᯂᯉ᯲ᯉᯘᯩ᯲ 5 ==
5:1 Ganup na porsea, Jesus do Kristus, i do naung tubu sian Debata, jala ganup na mangkaholongi Ibana na manubuhon, haholongan ni i do nang na tubu sian Ibana.ᯎᯉᯇᯮ᯲ ᯉ ᯇᯒᯬ᯲ᯘᯩᯀ ᯐᯘᯘᯮ᯲ ᯑᯬ ᯄ᯦᯲ᯒᯘᯪ᯲ᯖᯘᯮ᯲ ᯤ ᯑᯬ ᯉᯀᯮᯰ ᯖᯮᯅᯮ ᯘᯪᯀᯉ᯲ ᯑᯩᯅᯖ ᯐᯞ ᯎᯉᯇᯮ᯲ ᯉ ᯔᯰᯄ᯦ᯂᯬᯞᯬᯝᯪ ᯤᯅᯉ ᯉ ᯔᯉᯮᯅᯮᯂᯉᯬ᯲ ᯂᯂᯬᯞᯬᯝᯉ᯲ ᯉᯪ ᯤ ᯑᯬ ᯉᯰ ᯉ ᯖᯮᯅᯮ ᯘᯪᯀᯉ᯲ ᯤᯅᯉ

5:2 Sian on do taboto, naung holong rohanta di angka anak ni Debata: Molo tahaholongi Debata jala taradoti patikna. ᯘᯪᯀᯉ᯲ ᯀᯉᯬ᯲ ᯑᯬ ᯖᯅᯬᯖᯬ ᯉᯀᯮᯰ ᯂᯬᯞᯰᯬ ᯒᯬᯂᯉ᯲ᯖ ᯑᯪ ᯀᯰᯄ᯦ ᯀᯉᯄ᯦᯲ ᯉᯪ ᯑᯩᯅᯖ ᯔᯬᯞᯬ ᯖᯂᯂᯬᯞᯬᯝᯪ ᯑᯩᯅᯖ ᯐᯞ ᯖᯒᯑᯬᯖᯪ ᯇᯖᯄ᯦ᯪ᯲ᯉ

5:3 Ai on do holong ni roha di Debata; molo taradoti patikna. Ndada na dokdok patikna i. ᯀᯤ ᯀᯉᯬ᯲ ᯑᯬ ᯂᯬᯞᯰᯬ ᯉᯪ ᯒᯬᯂ ᯉᯪ ᯑᯩᯅᯖ ᯔᯬᯞᯬ ᯖᯒᯑᯬᯖᯪ ᯇᯖᯄ᯦ᯪ᯲ᯉ ᯉ᯲ᯑᯑ ᯉ ᯑᯄᯬ᯲ᯑᯄᯬ᯲ ᯇᯖᯄ᯦ᯪ᯲ᯉ ᯤ

5:4 Ai nasa na tubu sian Debata do manaluhon portibi on. Haporseaonta i do naung monang manaluhon portibi on. ᯀᯤ ᯉᯘ ᯉ ᯖᯮᯅᯮ ᯘᯪᯀᯉ᯲ ᯑᯩᯅᯖ ᯑᯬ ᯔᯉᯞᯮᯂᯉᯬ᯲ ᯇᯒᯬ᯲ᯖᯪᯅᯪ ᯀᯉᯬ᯲ ᯂᯇᯒᯬ᯲ᯘᯩᯀᯀᯉᯬ᯲ᯖ ᯤ ᯑᯬ ᯉᯀᯮᯰ ᯔᯬᯉᯰ ᯔᯉᯞᯮᯂᯉᯬ᯲ ᯇᯒᯬ᯲ᯖᯪᯅᯪ ᯀᯉᯬ᯲

5:5 Ise do na manaluhon portibi on, ia so na porsea di Jesus Kristus, Anak ni Debata? ᯤᯘᯩ ᯑᯬ ᯉ ᯔᯉᯞᯮᯂᯉᯬ᯲ ᯇᯒᯬ᯲ᯖᯪᯅᯪ ᯀᯉᯬ᯲ ᯤᯀ ᯘᯬ ᯉ ᯇᯒᯬ᯲ᯘᯩᯀ ᯑᯪ ᯐᯩᯘᯘᯮ᯲ ᯄ᯦᯲ᯒᯘᯪ᯲ᯖᯘᯮ᯲ ᯀᯉᯄ᯦᯲ ᯉᯪ ᯝᯩᯅᯖ

5:6 Ibana do i, naung ro marhitehite aek dohot mudar, Jesus Kristus; ndada holan di bagasan aek i, di bagasan aek dohot mudar, i do! Jala Tondi i do na mangkatindangkon, ai hasintongan do Tondi i. ᯤᯅᯉ ᯝᯬ ᯤ ᯉᯀᯮᯰ ᯒᯬ ᯔᯒ᯲ᯂᯪᯖᯩᯂᯪᯖᯩ ᯀᯀᯄᯩ᯲ ᯑᯬᯂᯖᯬ᯲ ᯔᯮᯑᯒ᯲ ᯐᯩᯘᯘᯮ᯲ ᯄ᯦᯲ᯒᯘᯪ᯲ᯖᯘᯮ᯲ ᯉ᯲ᯝᯝ ᯂᯬᯞᯉ᯲ ᯑᯪ ᯅᯎᯘᯉ᯲ ᯀᯀᯂ᯦᯲ ᯤ ᯑᯪ ᯅᯎᯘᯉ᯲ ᯀᯀᯄᯩ᯲. ᯑᯬᯂᯖᯬ᯲ ᯔᯮᯑᯒ᯲ ᯤ ᯑᯬ ᯐᯞ ᯖᯉᯬ᯲ᯑᯪ ᯤ ᯑᯬ ᯉ ᯔᯰᯄ᯦ᯖᯉᯪ᯲ᯑᯰᯂᯉᯬ᯲ ᯀᯤ ᯂᯘᯉᯪ᯲ᯖᯬᯑᯉ᯲ ᯑᯬ ᯖᯉᯬ᯲ᯑᯪ ᯤ

5:7 Ai tolu do na mangkatindangkon. ᯀᯤ ᯖᯬᯞᯮ ᯑᯪ ᯉ ᯔᯰᯄ᯦ᯖᯉᯪ᯲ᯑᯰᯄ᯦ᯉᯬ᯲

5:8 I ma Tondi i, aek i dohot mudar i; jala sada do na tolu i. ᯤ ᯔ ᯖᯉᯬ᯲ᯑᯪ ᯤ ᯀᯀᯄᯩ᯲ ᯤ ᯑᯬᯂᯖᯬ᯲ ᯔᯮᯑᯒ᯲ ᯐᯞ ᯘᯑ ᯑᯬ ᯉ ᯖᯬᯞᯮ ᯤ

5:9 Ia panindangion sian jolma tajalo do; alai sumurung do panindangion na sian Debata, ai panindangion na sian Debata do on, na hinatindangkonna taringot tu Anakna i.ᯤᯀ ᯇᯉᯉᯪ᯲ᯑᯝᯪᯀᯉᯬ᯲ ᯘᯪᯀᯉ᯲ ᯐᯞᯬ᯲ᯔ ᯖᯐᯞᯬ ᯑᯬ ᯀᯞᯤ ᯘᯮᯔᯮᯒᯮᯰ ᯑᯬ ᯇᯉᯉᯪ᯲ᯑᯝᯪᯀᯉᯬ᯲ ᯉ ᯘᯪᯀᯉ᯲ ᯑᯩᯅᯖ ᯀᯤ ᯇᯉᯉᯪ᯲ᯑᯝᯪᯀᯉᯬ᯲ ᯉ ᯘᯪᯀᯉ᯲ ᯑᯩᯅᯖ ᯑᯬ ᯀᯉᯬ᯲ ᯉ ᯂᯪᯉᯖᯉᯪ᯲ᯑᯰᯄ᯦ᯉᯬ᯲ᯉ ᯖᯒᯪᯝᯖᯬ᯲ ᯖᯮ ᯀᯉᯄ᯦᯲ ᯤ

5:10 Na porsea di Anak ni Debata, ditiop do panindangion i. Na so porsea di Debata, i ma mambahen Ibana pargabus, ala so porsea ibana di na hinatindangkon ni Debata taringot tu Anakna i. ᯉ ᯇᯒᯬ᯲ᯘᯩᯀ ᯑᯪ ᯀᯉᯄ᯲ ᯉᯪ ᯑᯩᯅᯖ ᯑᯪᯖᯪᯀᯇᯬ᯲ ᯑᯬ ᯇᯉᯉᯪ᯲ᯑᯝᯪᯀᯉᯬ᯲ ᯤ ᯉ ᯘᯬ ᯇᯒᯬ᯲ᯘᯩᯀ ᯑᯪ ᯑᯩᯅᯖ ᯤ ᯔ ᯔᯔ᯲ᯅᯂᯉᯩ᯲ ᯤᯅᯉ ᯇᯒ᯲ᯎᯅᯘᯮ᯲ ᯀᯞ ᯘᯬ ᯇᯒᯬ᯲ᯘᯩᯀ ᯤᯅᯉ ᯑᯪ ᯉ ᯂᯪᯉᯖᯉᯪ᯲ᯑᯰᯄ᯦ᯉᯬ᯲ ᯉᯪ ᯝᯩᯅᯖ ᯖᯒᯪᯝᯖᯬ᯲ ᯖᯮ ᯀᯉᯄ᯦᯲ᯉ ᯤ

5:11 Jala on do panindangion i: Naung dibasabasahon Debata do tu hita hangoluan salelenglelengna, jala di bagasan Anakna do hangoluan i. ᯐᯞ ᯀᯉᯬ᯲ ᯑᯬ ᯇᯉᯉᯪ᯲ᯑᯝᯪᯀᯉᯬ᯲ ᯤ ᯉᯀᯮᯰ ᯑᯪᯅᯘᯅᯘᯂᯉᯬ᯲ ᯑᯩᯅᯖ ᯑᯬ ᯖᯮ ᯂᯪᯖ ᯂᯝᯬᯞᯮᯀᯉ᯲ ᯘᯞᯩᯞᯰᯩᯞᯩᯞᯰᯩᯉ ᯐᯞ ᯑᯪ ᯅᯎᯘᯉ᯲ ᯀᯉᯄ᯦᯲ᯉ ᯑᯬ ᯂᯝᯬᯞᯮᯀ ᯤ

5:12 Ia di ibana Anak i, di ibana do hangoluan i; ia so di ibana Anak ni Debata, ndang di ibana hangoluan i. ᯤᯀ ᯑᯪ ᯤᯅᯉ ᯀᯉᯄ᯦᯲ ᯤ ᯑᯪ ᯤᯅᯉ ᯑᯬ ᯂᯝᯬᯞᯮᯀᯉ᯲ ᯤ ᯤᯀ ᯘᯬ ᯝᯪ ᯤᯅᯉ ᯀᯉᯄ᯦᯲ ᯉᯪ ᯑᯩᯅᯖ ᯉ᯲ᯑᯰ ᯑᯪᯤᯅᯉ ᯂᯝᯬᯞᯮᯀᯉ᯲ ᯤ

5:13 Umbahen na husurat angka i tu hamu, angka na porsea di Goar ni Anak ni Debata: Naeng botoonmuna, naung di hamu do hangoluan na salelenglelengna! ᯀᯔᯮ᯲ᯅᯂᯉᯩ᯲ ᯉ ᯂᯮᯘᯮᯒᯖ᯲ ᯀᯰᯄ ᯤ ᯖᯮ ᯂᯔᯮ ᯀᯰᯄ᯦ ᯉ ᯇᯒᯬ᯲ᯘᯩᯀ ᯑᯪ ᯎᯬᯀᯒ᯲ ᯉᯪ ᯀᯉᯄ᯦᯲ ᯉᯪ ᯑᯩᯅᯖ ᯉᯀᯰᯩ ᯅᯬᯖᯬᯀᯉᯬ᯲ᯔᯉ ᯉᯀᯮᯰ ᯑᯪ ᯂᯔᯮ ᯑᯬ ᯂᯝᯬᯞᯮᯀᯉ᯲ ᯉ ᯘᯞᯩᯞᯰᯩᯞᯩᯞᯰᯩᯉ

5:14 On do hiras ni rohanta maradophon Ibana: Molo tapangido manang aha marguru tu lomo ni rohana, tangihononna do hita. ᯀᯉᯬ᯲ ᯑᯬ ᯂᯪᯒᯘ᯲ ᯉᯪ ᯒᯬᯂᯉ᯲ᯖ ᯔᯒᯑᯇᯬ᯲ᯂᯉᯬ᯲ ᯤᯅᯉ ᯔᯬᯞᯬ ᯖᯇᯝᯪᯑᯬ ᯔᯉᯰ ᯀᯂ ᯔᯒ᯲ᯎᯮᯒᯮ ᯖᯮ ᯞᯬᯔᯬ ᯉᯪ ᯒᯬᯂᯉ ᯖᯝᯪᯂᯉᯉᯬ᯲ᯉ ᯑᯬ ᯂᯪᯖ

5:15 Jala molo taboto, tangihononna do hita di nasa na tapangido, gabe taboto, saut ma di hita angka na tapangido i sian Ibana. ᯐᯞ ᯔᯬᯞᯬ ᯖᯅᯬᯖᯬ ᯖᯝᯪᯂᯬᯉᯉᯬ᯲ᯉ ᯑᯬ ᯂᯪᯖ ᯑᯪ ᯉᯘ ᯉ ᯖᯇᯝᯪᯑᯬ ᯎᯅᯩ ᯖᯅᯬᯖᯬ ᯘᯀᯖᯮ᯲ ᯔ ᯑᯪ ᯂᯪᯖ ᯀᯰᯄ᯦ ᯉ ᯖᯇᯝᯪᯑᯬ ᯤ ᯘᯪᯀᯉ᯲ ᯐᯅᯉ

5:16 Ia diida halak donganna, mangulahon dosa na so marhapatean tu hamatean, martangiang ma ibana, dung i basabasahononna ma tu ibana hangoluan; i ma di angka na mardosa na so marhapatean tu hamatean. Adong do dosa na marhapatean tu hamatean; ndang hudok, tangiangkononhon anggo i.

5:17 Dosa do nasa hageduhon, jala adong do dosa na so marhapatean tu hamatean. ᯑᯬᯘ ᯑᯬ ᯉᯘ ᯂᯎᯩᯑᯮᯂᯉᯬ᯲ ᯐᯞ ᯀᯑᯰᯬ ᯑᯬ ᯑᯬᯘ ᯉ ᯘᯬ ᯔᯒ᯲ᯂᯇᯖᯩᯀᯉ᯲ᯖᯮ ᯂᯔᯖᯩᯀᯉ᯲

5:18 Taboto do, na so mardosa nasa naung tubu sian Debata; alai na marsihohot tu Debata do halak, naung tubu sian Ibana, jala ndang tarhahua parjahat i ibana. ᯖᯅᯬᯖᯬ ᯑᯬ ᯉ ᯘᯬ ᯔᯒ᯲ᯑᯬᯘ ᯉᯘ ᯉᯀᯮᯰ ᯖᯮᯅᯮ ᯘᯪᯀᯉ ᯑᯩᯅᯖ ᯀᯞᯤ ᯉ ᯔᯒ᯲ᯘᯪᯂᯬᯂᯖᯬ᯲ ᯖᯮ ᯑᯩᯅᯖ ᯑᯬ ᯂᯞᯄ᯦᯲ ᯉᯀᯮᯰ ᯖᯮᯅᯮ ᯘᯪᯀᯉ᯲ ᯤᯅᯉ ᯐᯞ ᯉ᯲ᯑᯰ ᯖᯒ᯲ᯂᯂᯮᯀ ᯇᯒ᯲ᯐᯂᯖ᯲ ᯤ ᯤᯅᯉ

5:19 Taboto, na sian Debata do hita, jala di bagasan hajahaton do nasa portibi on. ᯖᯅᯬᯖᯬ ᯉ ᯘᯪᯀᯉ᯲ ᯑᯩᯅᯖ ᯑᯬ ᯂᯪᯖ ᯐᯞ ᯑᯪ ᯅᯎᯘᯉ᯲ ᯂᯐᯂᯖᯉᯬ᯲ ᯑᯬ ᯉᯘ ᯇᯒᯬ᯲ᯖᯪᯅᯪ ᯀᯉᯬ᯲ 

5:20 Alai taboto do, naung ro Anak ni Debata jala dilehon roha tu hita, asa tatanda Parsintong i. Di bagasan Parsintong i do hita, di bagasan Anakna Jesus Kristus. Ibana do Debata na sintong dohot hangoluan salelenglelengna. ᯀᯞᯤ ᯖᯅᯬᯖᯬ ᯑᯬ ᯉᯀᯮᯰ ᯒᯬ ᯀᯉᯄ᯦᯲ ᯉᯪ ᯑᯩᯅᯖ ᯐᯞ ᯑᯪᯞᯩᯂᯉᯬ᯲ ᯒᯬᯂ ᯖᯮ ᯂᯪᯖ ᯀᯘ ᯖᯖᯉ᯲ᯑ ᯇᯒ᯲ᯘᯉᯪ᯲ᯖᯰᯬ ᯤ ᯑᯪ ᯅᯎᯘᯉ᯲ ᯇᯒ᯲ᯘᯉᯪ᯲ᯖᯰᯬ ᯤ ᯑᯬ ᯂᯪᯖ ᯑᯪ ᯅᯎᯘᯉ᯲ ᯀᯉᯄ᯦᯲ᯉ ᯐᯩᯘᯘᯮ᯲ ᯂ᯦᯲ᯒᯘᯪ᯲ᯖᯘᯮ᯲ ᯤᯅᯉ ᯑᯬ ᯑᯩᯅᯖ ᯉ ᯘᯉᯪ᯲ᯖᯰᯬ ᯑᯬᯂᯖᯬ᯲ ᯂᯝᯬᯞᯮᯀᯉ᯲ ᯘᯞᯩᯞᯰᯩᯞᯩᯞᯩᯞᯰᯩᯉ

5:21 Hamu angka anaha, jaga hamu ma dirimuna maralohon debata sileban! ᯂᯔᯮ ᯀᯰᯄ᯦ ᯀᯉᯂ ᯐᯎ ᯂᯔᯮ ᯔ ᯑᯪᯒᯪᯔᯮᯉ ᯔᯒᯞᯬᯂᯉᯬ᯲ ᯑᯩᯅᯖ ᯘᯪᯞᯩᯅᯉ᯲
[[Horong:Bibel]]