Аляксей Анатолевіч Ляляўскі

Аляксей Анатолевіч Ляляўскі
Дата нараджэння	2 лютага 1957(1957-02-02) (67 гадоў)
Месца нараджэння	Мінск, БССР, СССР
Бацька	Анатоль Аляксандравіч Ляляўскі
Адукацыя	Беларускі дзяржаўны тэатральна-мастацкі інстытут (1980)
Тэатр	Беларускі дзяржаўны тэатр лялек Магілёўскі абласны тэатр лялек Беларуская дзяржаўная акадэмія мастацтваў
Прэміі	Нацыянальная тэатральная прэмія (2011)
Узнагароды

Аляксей Анатолевіч Ляляўскі (нар. 2 лютага 1957, Мінск) — беларускі рэжысёр тэатра лялек, заслужаны дзеяч мастацтваў Рэспублікі Беларусь, лаўрэат Нацыянальнай тэатральнай прэміі.

Біяграфія

Сын беларускага рэжысёра А. А. Ляляўскага. Скончыў Беларускі тэатральна-мастацкі інстытут у 1980 годзе. З 1979 года ў Беларускім дзяржаўным тэатры лялек. У 1982—1986 гадах галоўны рэжысёр Магілёўскага абласнога тэатра лялек. Адначасова з 1989 года выкладаў ў Беларускай акадэміі мастацтваў. У 1986—1995 і 1998—2023 гадах галоўны рэжысёр у Беларускім дзяржаўным тэатры лялек

Творчасць

Рэжысёр з адметным бачаннем мастацтва тэатра лялек. Значнае месца ў яго творчасці займаюць сучасныя інсцэніроўкі дзіцячай класікі. Сярод пастановак для дзяцей: у Магілёўскім тэатры — «Віні-Пух і ўсе, усе, усе…» паводле А. Мілна (1982), «Дзіўныя прыгоды ката ў ботах» Н. Слепаковай паводле Шарля Перо (1984), «Дзед і жораў» Віталя Вольскага (1985); Беларускім дзяржаўным — «Салавей» паводле Х. К. Андэрсена (1980), «Граф Глінскі-Папялінскі» Артура Вольскага (1987), «Прыгоды Бураціна ў краіне дурняў» паводле А. Талстога і «Папялушка, ці перамога дабрачыннасці» Ж. Маснэ (1991) і інш. З пастановак для дарослых: «Зорка і смерць Хаакіна Мур’еты» Пабла Неруды (1980), «Трыстан і Ізольда» паводле сярэдневяковай легенды (1983), «Майстар і Маргарыта» паводле М. Булгакава (1987), «Бура» У. Шэкспіра, «Сымон-музыка» паводле Якуба Коласа (абедзве 1990), «Прывіды каляднай ночы» («Цар Ірад») Г. Барышава (1993), «Ганэле» Г. Гаўптмана (1999) і інш.

Ставіў спектаклі ў тэатрах Літвы, Нідэрландаў, Польшчы, Расіі, Славеніі.

Узнагароды

• Медаль Францыска Скарыны (2009).

Літаратура

• Ляляўскі Аляксей Анатолевіч // Беларуская энцыклапедыя: У 18 т. Т. 9: Кулібін — Малаіта / Рэдкал.: Г. П. Пашкоў і інш. — Мн. : БелЭн, 1999. — Т. 9. — 560 с. — 10 000 экз. — ISBN 985-11-0035-8. — ISBN 985-11-0155-9 (т. 9).