Friends

Friends
Krouer	Marta Kauffman David Crane
Aktourien bennañ	Jennifer Aniston Courteney Cox Lisa Kudrow Matt LeBlanc Matthew Perry (†) David Schwimmer
Bro orin	Stadoù-Unanet
Doare	Komedienn, sitcom
Koulzadoù	10
Abadennoù	236 (+ Friends : The Reunion)

Friends ("mignoned") zo ur sitcom brudet gant 10 koulzad ennañ, gant 236 rann 22 vunutenn, krouet gant Marta Kauffman ha David Crane, ha skignet etre an 22 a viz Gwengolo 1994 hag ar 6 a viz Mae 2004 war rouedad NBC. Kontañ a ra istor ur strollad mignoned e New-York, tri faotr ha teir flac'h. Karantez, labour, familh, peadra o deus da gontañ ha da rannañ en o zavarn muiañ karet, ar Central Perk.

Uhel-tre e oa an niver a sellerien ha plijet bras e oa an dud gant an heuliad a-hed e brantad skignañ. Unan eus an heuliadoù brudetañ eo a-hollviskoazh. Rakdibabet e oa bet ouzhpenn 250 gwech evit prizioù liesseurt, ha 62 wech er Primeratime Emmy Awards. Friends zo bet renket er 5vet plas e roll an 50 heuliad skinwel gwellañ a-hollviskoazh, gant ar gazetenn Empire. 12vet rann ar c'houlzad 4 a voe rummet er 21añ plas e roll ar 100 rann gwellañ a-hollviskoazh gant TV Guide. Gwelet e oa bet ar rann diwezhañ gant ouzhpenn 52 a vilionoù a dud er Stadoù-Unanet, ha dre-se e voe ar rann er skinwel ar muiañ sellet outañ er bloavezhioù 2000.

D'ar 27 a viz Mae 2021 e voe skignet ur rann dibar anvet Friends: The Reunion (Friends : An Emgav) skignet war HBO Max.

Istor an heuliad

Leurenn an davarn « Central Perk »

Monica Geller (Courtney Cox) zo ur geginerez yaouank zo war-dro 25 bloaz a vev en ur ranndi e Manhattan. Un deiz ec'h erru ur vignonez a-vihanik en davarn n'he doa ket gwelet abaoe bloavezhioù, Rachel Green (Jennifer Aniston), dilezet ganti he fried dirak an aoter. Kenlojañ a reas Rachel gant Monica diwar neuze hag ebarzhet e voe er strollad mignoned gant Phoebe Buffay (Lisa Kudrow), a oa bet kenlojerez da vMonica, a zo merataerez ha sonerez dibar, Ross Geller (David Schwimmer) a zo breur Monica, a zo paleontologour dous ha speredek, a gar Rachel abaoe al lise e sekred, Chandler Bing (Matthew Perry) a labour da geweriañ roadennoù, a zo fent-du gantañ ha prest da c'hoarzhin diwar e goust, mignon muiañ karet Ross abaoe ar Skol-veur, ha Joey Tribbiani (Matt LeBlanc), un aktour ha merc'hetaer n'eo ket gwall fin met leal d'e vignoned, ha kenlojer eo Chandler. Bevañ a ra Chandler ha Joey er ranndi a zo e-tal hini Monica, war ar memes estaj.

An heuliad a gont buhez pemdeziek ar c'hwec'h mignon-se, hag emdroadur o buhez vicherel e-pad dek vloaz.

E pep rann ez eus kaoz eus o zroioù-kaer farsus.

An darempred cheñch-dicheñch etre Ross ha Rachel zo an istor karantez a vez kaoz anezhañ ar muiañ. En em gavout ha dispartiañ a reont meur a wech e doug an heuliad.

E-kerzh an heuliad e timez Ross gant Emily, ur bugel zo gant Ross ha Rachel goude un nozvezh asambles, Chandler ha Monica o deus un darempred asambles ha dimeziñ a reont zoken, ha dimeziñ a ra Phoebe gant Mike (Paul Rudd).

Rolloù

Aktourien

Kinnig a ra an daolenn-mañ ar c'hwec'h aktour pennañ hervez urzh an anvioù a weler er roll digeriñ

Aktour	Tudenn
Jennifer Aniston	Rachel Karen Green
Courtney Cox	Monica E. Geller-Bing
Lisa Kudrow	Phoebe Buffay Hannigan
Matt LeBlanc	Joseph "Joey" Francis Tribbani
Matthew Perry	Chandler Muriel Bing
David Schwimmer	Ross Eustace Geller

• 
  Jennifer Aniston (Rachel Green).
• 
  Courtney Cox (Monica Geller).
• 
  Lisa Kudrow (Phoebe Buffay).
• 
  Matt LeBlanc (Joey Tribbani).
• 
  Matthew Perry (Chandler Bing).
• 
  David Schwimmer (Ross Geller).

Ken brudet e oa Friends ma zeuas kalz aktourien veur, en o zouez Robin Williams, Bruce Willis, George Clooney, Noah Wyle, Jean-Claude Van Damme, Helen Hunt, Hugh Laurie, Charlie Sheen, Sean Penn, Christina Applegate, Charlton Heston, Ben Stiller, Julia Roberts, Reese Witherspoon, Dakota Fanning, Denise Richards, Sasha Alexander, Alec Baldwin, Paget Brewster, Ellen Pompeo, Danny DeVito, Dina Meyer, Gary Oldman, Selma Blair, Jon Favreau, Winona Ryder, Jeff Goldblum, Isabella Rossellini, Gabrielle Union, Bob Balaban, Jennifer Saunders, Lea Thompson, Jason Alexander, Emily Osment, Billy Crystal, Susan Sarandon, Freddie Prinze Jr., Greg Kinnear, Jennifer Grey, Michael Vartan, Dermot Mulroney, Rebecca Romijn, Brooke Shields, Catherine Bell, Brent Spiner, Steve Zahn, Adam Goldberg, Michael Rapaport, Jon Lovitz, Jennifer Coolidge, Kathleen Turner, Olivia Williams, Michael McKean, Kristin Davis, John Stamos, Melissa George ha Jane Lynch. Pried Jennifer Aniston hag hini Courteney Cox, da lavaret eo Brad Pitt ha David Arquette, a voe pedet ivez.

Tudennoù

Tudennoù pennañ

Rachel Green c'hoariet gant Jennifer Aniston

Mignonez Monica el lise, ganet e oa bet en ur familh pinvidik hag a vez dilezet ganti er rann kentañ goude bezañ laosket he danvez pried e-unan dirak an aoter. Bevañ a ra gant ar pemp tudenn all da vare pe vare (en urzh) : Monica, Phoebe, Joey, Ross ha Chandler. Un darempred luziet a zo etrezi ha Ross, dimezet int bet buan-ha-buan hag ur verc'h o deus Emma. Labouret he doa e-pad ur pennad hir en davarn Central Perk, kregiñ a reas gant ul labour e Bloomingdale's. ha goude-se en embregerezh Ralph Lauren. E-kerzh ar c'houlzad diwezhañ e voe kinniget ur post-labour en embregerezh Louis Vuitton met evit se e oa dav dezhi dilojañ da Bariz. A-benn ar fin e nac'has evit bezañ asambles gant Ross.

Monica Geller c'hoariet gant Courtney Cox

C'hoar Ross eo, bet e oa tev, klañv gant an urzhiañ, ar renkañ hag ar c'hempenn, dont a ra da vezañ penn-keginerez e meur a breti, hini Alessandro's en o zouez. Bevañ a reas gant Phoebe en he ranndi, ha da c'houde e vevas gant Rachel. Savet e oa darempred gant Richard Burke, ur mignon a-gozh eus he familh, hag eñ 21 bloaz koshoc'h eviti. Un darempred kreñv o deus e-pad ur pennad hir. Echuiñ a ra an traoù etrezo pa anzav Richard ne fell ket dezhañ kaout bugale ken, ur ranngalon evit Monica. Dimeziñ a reas gant Chandler hag advugelañ a reas gevelled gantañ : Jack hag Erica. Jack eo anv he zad hag Erica eo anv an engehentourez (ar vaouez he deus douget ar gevelled). Dilojañ a reont e bannlev New York e fin an heuliad, er rann diwezhañ.

Phoebe Buffay c'hoariet gant Lisa Kudrow

Kenlojet he doa gant Monica, ha kenlojañ a reas ivez gant Rachel, betek ma vefe tangwall er ranndi. Ur vuhez hej-dihej he doa bet : bevañ he doa er straedoù goude emlazh he mamm ha skampet e oa he zad kuit eus an ti. Ur c'hoar gevell he deus, Ursula, met n'en em glev ket ganti, hag un hanter-vreur, Frank Junior. Ur vaouez laouen eo evelkent, ha n'eo ket evit ober evel ar re all. Merataerez eo ha kanerez er Central Perk. Brudet eo gant he c'hanaouenn Smelly Cat. Dougen a ra bugale (un triad) he breur hag Alice : Frank Jr Jr, Leslie ha Chandler. Tri darempred karantez sirius he deus e-doug an heuliad : David, ur skiantour, echuiñ a ra o darempred pa ya-eñ da vMinsk evit e enklaskoù, Gary, p'he doa kavet e vadj archer, ha Mike Hannigan, ur soner piano, ha dimeziñ a reont er c'houlzad diwezhañ.

Joey Tribbiani c'hoariet gant Matt LeBlanc

Kenlojañ a ra gant Chandler, e vignon muiañ karet, ha goude-se gant Rachel (un darempred karantez berr-tre o deus e-kerzh an heuliad). Ganet e oa bet en ur familh italian-amerikan, gant 7 c'hoar. Aktour eo met ne seblant ket bezañ gwall varrek war e vicher. E barr uhelañ e vuhez vicherel e c'hoari roll ar mezeg Dr. Drake Ramoray en heuliad Days of our lives. N'eo ket gwall speredek met daremprediñ a ra gant kalz merc'hed, hep mont gwech ebet, pe dost, kalz pelloc'h ganto evelkent. Piket e voe e galon gant Rachel avat.

Chandler Bing c'hoariet gant Matthew Perry

Kenlojañ a ra gant Joey adalek ar c'houlzad kentañ, ur mignon a-gozh da Ross ha pried Monica, c'hoar Ross. Borodus eo e vicher, ha n'eo ket sklaer titl e bost zoken (gouzout a reer eo liammet gant « adkefluniañ roadennoù » ha « faktoriñ stadegoù »). Mont a ra war-zu ur post er bruderezh da c'houde. E dad zo ur vaouez treuzjener, e penn un arvest e Las Vegas, hag e vamm he deus skrivet levrioù erotek brudet-tre. Pa dorr-dimezas e gerent, pa oa yaouank, ec'h implijas ar fent goapaus evit en em zifenn. Studiañ a reas en ul lise prevez evit ar baotred hepken ha kompren a reer e oa pinvidik e familh. E-pad pell eo bet diaes dezhañ mennozh an dimeziñ ha kaout bugale, met ur wech gant Monica e cheñch tro-spered. Advugelañ a reas daou vugel : Jack Bing, anvet diwar tad Monica, hag Erica Bing, a oa anv an engehentourez (ar vaouez he deus douget ar gevelled).

Ross Geller c'hoariet gant David Schwimmer

Breur Monica ha mignon da Chandler abaoe ar Skol-veur eo. Paleontologour eo, ur vicher a blij dezhañ kalz met ne zedenn ket kalz e vignoned. Dimezet ha torr-dimezet 3 gwech eo : gant Carol, ur vaouez heñvelreizh, hag ur mab, Ben, o deus asambles, gant Emily, eus Bro-Saoz, asambles int bet e-pad un nebeud mizioù, dimezet kerkent, met distagañ a reas Ross an anv fall da vare an eured, dirak an aoter, ha Rachel, dimeziñ a rejont pa oant mezv-poch e Las Vegas. Torr-dimeziñ a rejont, genel a reas Rachel ur verc'h, Emma, hag a glaskont desevel asambles memestra, hag e fin an heuliad e teujont da vezañ ur c'houblad en-dro.