བླུགས་བཟོ།
༉ ང་བཅས་རའི་དཔལ་ལྡན་འབྲུག་པའི་རྒྱལ་ཁབ་འདི་ནང་ བླུགས་བཟོ་དེ་ཡང་ དང་ཕུ་ལས་དར་ཁྱབ་བྱུང་སྟེ་ཡོདཔ་ཨིན་པས། དེ་ཡང་ མཆོད་ཆའི་རིགས་དཔེར་ན་ རྡོ་རྗེ་དང་དྲིལ་བུ། ཏིང་ཤག་དང་ ཕྲིན་ལས་ཀྱི་ལག་ཆའི་རིགས་ ཕུར་པ་དང་དགྲ་སྟ་ཚུ་དང་། གཞན་ཡང་ སྐུ་འདྲ་ཚུ་ བླུགས་བཟོ་རིག་པ་ལས་བརྟེན་ཏེ་བྱུང་བྱུངམ་ཨིན་མས། བླུགས་བཟོ་ལུ་དབྱེ་བ་ཅིན་ བྱེ་བླུགས་དང་སྤྱ་བླུགས་ཟེར་ ལྷམ་པ་མ་འདྲཝ་གཉིས་ཡོདཔ་ཨིན་པས། དང་པ་ བྱེ་བླུགས་ཟེར་མི་འདི་ སྐུ་དང་མཆོད་ཆས་ཚུ་བླུག་པའི་སྐབས་ སྐུ་རང་འབྱུང་དང་ ཡང་ན་ དུམ་བུར་བཅད་དེ་བསྐལ་པའི་བྱེམ་གྱི་ནང་ལུ་ འབུར་འཐོན་ནིའི་དོན་ལུ་ ཟངས་དང་གསེར། དངུལ་ཚུ་བཞུ་སྟེ་རྒྱུ་ལམ་གྱི་ཐོག་ལས་བླུགས་ཏེ་བཟོ་མི་འདི་ལུ་ བྱེ་བླུགས་ཟེར་སླབ་ཨིན་པས། བྱེ་བླུགས་འདི་ལཱ་འཇམ་པའི་ཁར་ སྤྱ་བླུགས་དང་ཕྱདཔ་ད་མགྱོགས་ནི་ཨིན་མས། སྤྱ་བླུགས་ཟེར་མི་འདི་ སྐུ་དང་གཞན་ག་ཅི་ར་བླུགས་རུང་ དང་པ་ར་ སྤྱ་ཚིལ་གྱིས་དངོས་སྤྱད་ཀྱི་རྣམ་པ་ལེགས་ཤོམ་སྦེ་བཟོ་སྟེ་ འདམ་དང་ནོར་གྱི་ཨ་བ་སླ་བསྲེས་རྐྱབ་ཞིནམ་ལས་ གར་སླ་རན་ཏོག་ཏོ་བཟོ་སྟེ་ ཕྱི་ཁ་ལས་དབུར་ཏེ་ ཉི་གྲིབ་ནང་ཚར་ལེ་ཤ་བསྐམ་དགོཔ་ཨིན། འདམ་གྱི་ནང་ལུ་ཡོད་པའི་དངོས་སྤྱད་སྤྱ་ཚིལ་གྱིས་བཟོ་སྟེ་ཡོད་མི་འདི་ བཞུ་ནི་དང་འདམ་འདི་བསྐམ་ནིའི་དོན་ལུ་ མེ་མ་བཏུབ་བཏུབ་སྦེ་གཏང་དགོ། དེའི་ནང་ལུ་ རྒྱུ་ག་ཅི་བླུགས་ཡོད་རུང་བཞུ་སྟེ་ བླུག་མི་དེ་ལུ་ སྤྱ་བླུགས་ཟེར་སླབ་ཨིན་པས།
འབྲུག་ལུ་བླུགས་བཟོ་འདི་ ཞབས་དྲུང་རིན་པོ་ཆེ་དང་རྒྱལ་སྲས་བསྟན་འཛིན་རབ་རྒྱས། སྡེ་སྲིད་ ༡༦ པ་ བསོད་ནམས་ལྷུན་གྲུབ་ ཡང་ན་ གཞི་དར་གྱི་སྐབས་ལུ་དང་ ལྷག་པར་དུ་ ཐ་བྲག་དགོན་པའི་བླམ་རིམ་འབྱོན་ཚུ་ ཕུར་པའི་ཉམས་བཞེས་མཛདཔ་ལས་ གཙང་མཁན་ཆེན་འཇམ་དབྱངས་རྒྱ་མཚོའི་དངོས་སློབ་ རྒྱ་མཚོ་རྣམ་དྲུག་གི་སྐབས་ལུ་ མཚན་མ་རྫས་ཀྱི་ཕུར་པ་ཨེ་ཁྲམ་དང་ རྡོ་རྗེ་དྲིལ་བུ་ཚུ་ བླུག་པའི་ས་དོང་གི་ཤུལ་ ཐ་བྲག་དགོན་པ་ལུ་ ད་ལྟོའི་བར་ན་ཡང་མཐོང་སྲོལ་ཡོདཔ་ཨིན་མས། དེ་ལས་ རྒྱལ་སྲས་བསྟན་འཛིན་རབ་རྒྱས་ཀྱི་སྐབས་ བྱེ་བླུགས་དང་སྤྱ་བླུགས་གཉིས་ཀྱི་ཐོག་ལས་ རྡོ་རྗེ་དྲིལ་བུ་དང་ཕུར་པ། གང་གཟར་བླུགས་གཟར། ཏིང་ཤག། སྐུ་བླུགས་བླུགསཔ་ཚུ་ ད་ལྟོའི་བར་ན་ཡང་ འབྲུག་པའི་རྫོང་གཞིས་དང་དགོན་སྡེ་ལ་ལུ་ཅིག་ནང་ མཇལ་ནི་ཡོདཔ་ཨིན་པས། དེ་བསྒང་ རྒྱ་བོད་དང་ཧོར་གྱི་རྒྱལ་ཁབ་ག་ཏེ་ལུ་ཡང་མེད་པའི་དྲིལ་བུ་སྐད་སྙན་དང་བཟོ་བཀོད་ཁྱད་པར་འཕགས་པའི་ལྷོ་དྲིལ་ཟེར་འགངས་ཅན་དང་བརྩི་མཐོང་སྦོམ་ཡོད་པའི་ལོ་རྒྱུས་ཚུ་ཡང་འདུག། དེ་ལས་རིམ་པ་བཞིན་དུ་ རྒྱལ་ཁབ་ནང་ བླུགས་བཟོ་མཁས་པ་ལེ་ཤ་བྱོན་ཏེ་ མཆོད་ཆས་ཀྱི་རིགས་མང་རབས་ཅིག་བླུགས་གནང་ཡོདཔ་མ་ཚད་ གཞུང་གིས་ སྤྱི་ལོ་ ༡༩༨༧ ལུ་ ཐིམ་ཕུག་ལུ་ བླུགས་བཟོའི་སྡེ་གསརཔ་གཞི་བཙུགས་གནང་ཡོདཔ་ཨིན་པས།
བླུགས་བཟོའི་ལཱ་འབད་བའི་སྐབས་ ལག་ཆ་ག་ཅི་ར་དགོཔ་ཨིན་ན་ཟེར་བ་ཅིན་ གསེར་དངུལ་ཟངས་ཚུ་བཞུ་སའི་བཞུ་ཀོང་ཆེ་ཆུང་དང་ མེ་ཐབ་ཀྱི་ནང་ལུ་ རྡོ་སོལ་ནགཔོ་དང་ ཤིང་ས་ཀྲག་གི་སོལ་མོ་ཚུ་བླུག་དགོཔ་ཨིན། དེ་ལས་ བྱེ་བླུགས་ཀྱི་སྐབས་ལུ་འབད་བ་ཅིན་ བསྐལ་པའི་བྱེམ་བརྔོ་ནིའི་དོན་ལུ་ ལྕགས་ཀྱི་སླ་ང་ཆེ་ཆུང་དང་ བྱེམ་བསིག་ཚགས་ཆེ་ཆུང་། བྱེམ་བརྫི་ནིའི་ཧོད་ཆེ་ཆུང་། བྱེ་འདམ་བཀང་སྟེ་ ཕུར་པ་དང་སྐུ་གི་བཟོ་དབྱིབས་བཟོ་ནིའི་ལྕགས་ལེབ་དང་ ཡང་ན་ ཤིང་གི་གཞོང་པ་ཆེ་ཆུང་དང་ ཤིང་གི་ཐོཝ། དེ་ལས་བྱེ་དམ་འབར་འབུར་ཚུ་སྙོམས་ཏོག་ཏོ་བཟོ་ནིའི་དོན་ལུ་ ཀྲེག་ནིའི་གྱི་ཅུང་། ཀོཝ་དང་འཕྲུལ་ཆས་མ་འདྲཝ་ཚུ་དགོཔ་ཨིན། གཞན་ཡང་ རི་མོ་གསལ་རི་རི་མ་ཐོན་པ་ཅིན་ སྤྲོས་བརྐོ་རྐྱབ་སྟེ་བཟོ་ནིའི་དོན་ལུ་ གཟོང་ཆེ་ཆུང་དང་ཐོཝ། གསེག་རྡར་གྲུ་གསུམ། ཟུར་བཞི། ཟླུམ་པོ་དང་ཟླ་གམ་སྣ་ཚོགས་དགོ་ནི་ཨིན་རུང་ བླུགས་བཟོ་རང་སོའི་ལུགས་སྲོལ་དང་བསྟུན་ཏེ་ དགོས་མཁོའི་ལག་ཆ་སྣ་ཚོགས་དགོཔ་ཨིན་པས།
མདོར་བསྡུ་བ་ཅིན་ བླུགས་བཟོ་རིག་པ་དེ་ཡང་ ང་བཅས་རའི་རྒྱལ་ཁབ་ནང་ལུ་ སྔོན་གོང་ལས་དར་ཏེ་ཡོད་པའི་ལམ་སྲོལ་བཟང་པོ་ཅིག་ཨིན་པའི་ཁར་ མང་ཆེ་ཤོས་ཅིག་ སྐུ་དང་མཆོད་ཆས་ཀྱི་རིགས་ཚུ་ བླུགས་བཟོ་སྦེབཟོ་སྲོལ་ཡོདཔ་ཨིན་པས། བླུགས་བཟོ་ལུ་ བྱེ་བླུགས་དང་སྤྱ་བླུགས་ཟེར་ དབྱེ་བ་གཉིས་ཡོདཔ་ཨིནམ་དང་ ལུགས་གཉིས་ཆ་ར་ འབྲུག་ལུ་ཁྱབ་ཆེཝ་སྦེ་ དར་ཏེ་ཡོདཔ་ཨིན་པས། བླུགས་བཟོ་འདི་ དཔལ་ལྡན་འབྲུག་པའི་ལམ་སྲོལ་རྙིངམ་ཅིག་ཨིནམ་ལས་ མི་ཉམས་གོང་འཕེལ་གཏང་ནི་དང་ ཉམས་པ་སོར་ཆུད་འབད་དེ་བཞག་དགོཔ་འདི་ གནམ་མེད་ས་མེད་གལ་ཆེ་ཤོས་ཅིག་ཨིན་ནོ།
ཁུངས་གཏུག།
- ཀེ་ཨེམ་ཀྲི་དཔེ་སྐྲུན་ཁང་། (༢༠༠༤) ལྷོའི་ཆོས་འབྱུང་འཇམ་མགོན་སྨོན་མཐའི་ཕྲེང་བ། ཐིམ་ཕུག། ཀེ་ཨེམ་ཀྲི་དཔེ་སྐྲུན་ཁང་།
- མཁན་པོ་ཕུན་ཚོགས་བཀྲ་ཤིས། (༢༠༠༣) འབྲུག་གི་བཟོ་རིགས་བཅུ་གསུམ་གྱི་བཤད་པ་མཁས་པའི་དགའ་སྟོན། ཐིམ་ཕུག། སྐལ་བཟང་གཞན་ཕན།