Scream 2
|
C'l artìcul chè 'l è scrit in
Miranduléś |
 Scream 2
| ||
 La Cox, la Campbell e Schreiber in na figùra dal film | ||
| Sîg 2 1997 | ||
|---|---|---|
| Regìa: Wes Craven | ||
| Scritōr: Kevin Williamson | ||
| Atōr: Neve Campbell • Courteney Cox Arquette David Arquette • Jamie Kennedy • Laurie Metcalf Liev Schreiber • Timothy Olyphant • Tori Spelling Portia de Rossi • Rebecca Gayheart • Omar Epps Jada Pinkett Smith • Sarah Michelle Gellar | ||
| Müsica: Marco Beltrami | ||
| Léngua: Ingléś | ||
| Dürä dal film: 116 minüt | ||
| Nasiōṅ: Stat Unî | ||
Scream 2 (Sîg 2) 'l è 'n film ad scarésa americàṅ dal 1997 ad Wes Craven scrit par Kevin Williamson. 'L vgnû fóra 'l an dòp ad Scream e al gh'à abû pò anc dū séguit: Scream 3 dal 2000 e Scream 4 dal 2011.
Custâ vint-quàtar migliòṅ ad dòlar, al film al 'n à pò muciâ sù da piò ad sènt-stantadū.
Sunt
In un cìnema dla sità ad Windsor 'l è in prugràma 'l film „Śbrandlâ“ ch'al tōś ispirasiòṅ da i masamènt sucès dabòṅ 'l an prima a Woodsboro, acsè cuma cuntâ da 'n lìbar dla giurnalìsta Gale Weathers (Courteney Cox Arquette). Durànt la prujesiòṅ, dū studènt ad culōr, Phil Stevens (Omar Epps) e la Maureen Evans (Jada Pinkett Smith), i vènan cupâ ad òpra 'd un sasèṅ c'n adòs la mascra 'd Ghostface.
La Sidney Prescott (Neve Campbell), ch'a pâr l'àppia daśmindgâ i brut fat ad Woodsboro, la sa dmanda s'al sò arbgàt al n sia mia finî dabòṅ. Randy Meeks (Jamie Kennedy), un śōvan ch'al stùdia sèg in culéǵ, 'l è dl'idéa ch'a sarév al caś ad mét'r-ag na préda insìma. In dal campus a riva Linus (David Arquette) par védar se la Sidney la s è misa in bóla e acsè al gh'à la manéra 'd cgnósar l’Hallie McDaniel (Elise Neal), Mickey Altieri (Timothy Olyphant), òṅ ch'al và mat p'r i film ad Quentin Tarantino, e Derek (Jerry O'Connell), muróś dla Sidney e studènt ad madśìna.
I rìv'n anc dimóndi giurnalìsta cuma la Debbie Salt (Laurie Metcalf) e la Gale ch'la taca a intervistàr Cotton Weary (Liev Schreiber), al ragàs suspetâ 'd èsar lò al sasèṅ d'l an prima. In cal méntar la CiCi Cooper (Sarah Michelle Gellar) la ricév dal telefunàdi da 'l serial killer e la s lōga in dal tasèl mòrt ma a n gh'è gnint da far parchè la s bèca dū scurtlàdi e pò la vèṅ butàda śò da 'l balcòṅ. Adès 'l è 'l tùran dla Sidney e ad Derek (Jerry O'Connell): i ragàs i la scàmpan e 'l sierìf Lewis Hartley (Lewis Arquette) al gh fà rivàr dū guàrdi dal còrp par prutéś'r-i.