Tesla
C'l artìcul chè 'l è scrit in
Miranduléś |
![](https://upload.wikimedia.org/wikipedia/commons/thumb/9/92/Tesla_Sweden_Rock_2008.jpg/320px-Tesla_Sweden_Rock_2008.jpg)
I califurniàṅ Tesla i èṅ un grup hard & heavy americàṅ, furmâ a Sacramènt in dal 1984. I aṅ vindû da piò ad quatórdas migliòṅ ad disc in di sōi Stat Unî. Al nóm ch'i àṅ sarnî al daśvîṅ da 'l inventōr e inśgnēr sèrb Nikola Tesla.
Biugrafìa
Gl'Inisi (1982-1985)
![](https://upload.wikimedia.org/wikipedia/commons/thumb/6/68/JeffKeithTesla.jpg/210px-JeffKeithTesla.jpg)
Al grup al taca a sunàr c'n al nóm ad City Kid in dal 1982 p'r òpra dal basìsta Brian Wheat e dal chitarìsta Frank Hannon. Par cumpletàr la furmasiòṅ i vìnan ciamâ 'l baterìsta Troy Lucketta (ch'l iva laurâ c'n Eric Martin, in séguit leader di Mr. Big), al cantànt Jeff Keith e 'l chitarìsta Tommy Skeoch.
A 'l inìsi la banda la s fà i òs faghénd di cuncèrt insém a di atri grup cuma i Dokken e di demo prudót par Ronnie Montrose.
Piàn piâṅ i s faṅ avànti al cà discugràfichi par met'r-i sóta cuntràt e Tom Zutaut (quél ch'l iva pascâ Mötley Crüe e Guns N' Roses) al gh fà firmàr par la Geffen Records in dal 1985.
I prim dū disc (1986-1990)
In dal 1986 a vîṅ fóra 'l prim disc ciamâ Mechanical Resonance, un disc ch'al s mōṿ a la granda fra 'n hard rock clàsic e 'l street metal ad chi an lè. Ez come ez go, Cumin' atcha live e Rock me to the top i èṅ di braṅ rock da stadi, Little Suzi (cover di Ph.D) e Modern Day Cowboy i èṅ i sìngui mènt'r i lènt i èṅ Changes e Before my eyes, cansòṅ ch'la sèra 'l disc.
Dòp la publicasiòṅ dal disc, al grup al partìs p'r un tour insém a David Lee Roth, Def Leppard e Poison.
In dal 1989 'l è 'l tùran ad The Great Radio Controversy, àlbum cgnusû p'r avér-ag dèntar dū di sò lènt più famóś: Love song e Paradise e di clàsic quài Hang tough, Lady luck e Makin' magic.
![](https://upload.wikimedia.org/wikipedia/commons/thumb/1/13/Tesla_at_the_Chance_cropped.jpg/330px-Tesla_at_the_Chance_cropped.jpg)
In dal 1990, prima ch'i vgnìsan fóra i unplugged 'd MTV, i regìstr'n un disc da 'l viṿ, cun dal versiòṅ acùstichi di sò braṅ più famóś e dal cover cuma We can work it out di Beatles, Mother's little helper di Rolling Stones o Signs un sucès dal 1971 di Five Man Electrical Band. Al tìtul dal lavōr 'l è Five Man Acoustical Jam e a 'l inìsi al gh'iva da èsar sōl un cuncèrt ad beneficénsa, tgnû al 2 ad Luj dal stés an al Trocadero ad Filadèlfia, ma pò 'l éra vgnû fóra un quèl fat bèṅ e a sarév stâ 'n pcâ a n far-al minga scultàr a tut.
Al sucès pîṅ ad Psychotic Supper (1991-1993)
In dal 1991 i Tesla i fànan vgnir fóra 'l tèrs disc lōr in studi, Psychotic Supper, un disc sòlid sènsa punt ad màgar, c'n i dū chitarìsta Skeoch e Hannon a fàr al cant e 'l contarcànt, specialmènt in dal prim sìngul Edison's medicine (na canta ch'la tōś la part ad Nikola Tesla cóntar 'l emigliàṅ Guglielmo Marconi) e in Don't de-rock me, rabìda e catìva.
A vâl la pénd 'd arcurdàr anc Song & emotions, un braṅ 'd òt minùt e mèś dedicâ a 'l amìg dasfurtunâ Steve Clark, chitarìsta di Def Leppard mòrt da pôc, la dura Freedom slaves e i àtar sìngui Call it what you want e What you give.
I Tesla i s mòlan (1994-1999)
![](https://upload.wikimedia.org/wikipedia/commons/thumb/4/4c/Tesla_live_02-07-2010.jpg/250px-Tesla_live_02-07-2010.jpg)
In d'l Agóst dal 1994 a véd la luś al quàrt àlbum in studi, Bust a Nut (“Vèrar na nōś”, ma anc “Śburàr” in séns figurâ) par via dla cupertìna in du a s véd na màchina par schisàr e vèr'r al nōś), stanta minùt 'd hard rock a la sò manéra, cun di braṅ dûr (Solution, Action talks) misćiâ a qvéi più lènt (Need Your Lovin, sìngul insém a Mama's Fool e A lot to Lose). Da nutàr che l'edisiòṅ giapunéśa dal 1998 dal disc la gh'à dènt'r un braṅ da piò, la cover di Led Zeppelin The Ocean.
Al ròbi però i n gìran minga cuma prima parchè cal lavōr chè al riva a ciapàr sōl un disc 'd òr in dal 1995. Subìt dòp la registrasiòṅ d'l àlbum, Tommy Skeoch 'l è custrét a far-as da part par di prubléma 'd dròga.
Anc s'al grup al sarév stâ custrét par cuntràt a publicàr àtar dū disc par la Geffen, la cà discugràfica la parmét a i sinc califurgnàṅ ad mulàr-as finî 'l tour e 'd tōr dònca dal stradi difarénti. Keith e Skeoch i daṅ vita a 'n grup ciamâ Bar 7 e in dal 2000 i fan catàr in di negòsi 'l àlbum The World Is a Freak e 'l sìngul Four Leaf Clover.
Al ritóran (2000-2004)
![](https://upload.wikimedia.org/wikipedia/commons/thumb/4/46/Tesla_-_Live_Zaragoza_2008.jpg/250px-Tesla_-_Live_Zaragoza_2008.jpg)
Dòp soquànt an, i Tesla i tórnan insém al 25 'd Utóbar dal 2000 cun tut i mémbar uriginài in ucaśiòṅ 'd un cuncèrt tgnû a Sacramènt e pò p'r àtar tri in Dicémbar. I cuncèrt i cuntìnuan anc 'l an dòp, fra Favràr e Utóbar, e i Tesla i i rigìstran faghénd vgnir fóra 'n live dópi in dal Setémbar dal 2001 par la nóva cà discugràfica, la Sanctuary Records.
Al tìtul dal lavór 'l è Replugged live, un disc dópi cun vint canti dèntar vgnû fóra anc in n'edisiòṅ scurtàda 'd trédas braṅ su 'n disc sōl ciamàda Standing Room Only.
Sèmpar par la Sanctuary, a distànsa 'd déś an da 'l precedènt, al grup al fà catàr in di negòsi un disc nóṿ in dal Mars dal 2004, Into The Now ('l ùltim cun Tommy Skeoch) ch'al s piàsa a 'l 31śum pòst dla clasìfica dla Billboard vindénd da piò ad trénta-mila còpi la prima stmana e déś-mila a la stmana in séguit. I sìngui tirâ fóra i èṅ Caught in a Dream e Words Can't Explain. D'arcurdàr anc al dûri Miles Away e Got No Glory, la title track, What a shame e Heaven Nine Eleven ch'la dascór d'l atintâ 'd Osama Bin Laden a 'l tóri śmèli 'd New York d'l 11 ad Setémbar dal 2001.
Témp 'd adès (2005-2018)
![](https://upload.wikimedia.org/wikipedia/commons/thumb/4/41/Troy_Luccketta_with_Tesla_at_the_Chance_in_Poughkeepsie%2C_NY.jpg/180px-Troy_Luccketta_with_Tesla_at_the_Chance_in_Poughkeepsie%2C_NY.jpg)
In dal Śugn dal 2007 i Tesla i faṅ vgnir fóra dū disc ad cover, Real to Reel e Real to Reel 2, ch'i véd'n al debùt dal chitarìsta nóṿ Dave Rude ch'l iva in cal méntar tòlt al pòst ad Skeoch. Fra i vint-sinc braṅ i gh'èṅ All The Young Dudes ad David Bowie, Seasons Of Wither di Aerosmith, War Pigs di Black Sabbath, Is It My Body 'd Alice Cooper, Space Truckin’ di Deep Purple, Thank You di Led Zeppelin e Honky Tonk Women di Rolling Stones.
A la fiṅ 'd Agóst i Tesla i dìśan ch'i tacaràṅ un tour in Austràglia, Giapòṅ e Európa da Utóbar a Nuvémbar, al prim in séd'ś an.
In d'l Utóbar dal 2008 a véd la luś 'l utàṿ disc in studi dla banda americàna, Forever More, prudót par Terry Thomas, qvél ad Bust a Nut. In dla cupertìna a s véd dū schéltar in śnòć, òṅ in frònt a c'l àtar, ch'i s bràsan cuntènt. Dòp vint-sinc an insém i Tesla i èṅ incóra bòṅ ad far un disc frésc, sèmp'r in dal nóm d'l hard rock ad livèl élt. Forever more, Pvt Ledbetter e i sìngui I Wanna Live, Breakin’ Free e Fallin’ Apart i èṅ i braṅ ad punta.
In dal 2011 al grup al regìstra un disc acùstic ciamâ Twisted Wires & the Acoustic Sessions cun dèntar soquànt braṅ vèć (sinc sunâ in dal 2005 cun Tommy Skeoch a la chitàra) e tri inèdit: 2nd Street, Better Off Without You e I Love You.
Furmasiòṅ
![](https://upload.wikimedia.org/wikipedia/commons/thumb/b/b5/Frank_Hannon_di_Tesla_2010.jpg/260px-Frank_Hannon_di_Tesla_2010.jpg)
![](https://upload.wikimedia.org/wikipedia/commons/thumb/3/3e/Dave_Rude_di_Tesla_2010.jpg/260px-Dave_Rude_di_Tesla_2010.jpg)
![](https://upload.wikimedia.org/wikipedia/commons/thumb/a/a4/20140608_Gelsenkirchen_RockHard_0861.jpg/260px-20140608_Gelsenkirchen_RockHard_0861.jpg)
Quéla 'd adès
- Jeff Keith vōś (1984-1994, 2000-incō)
- Frank Hannon chitàra, pianofòrt, òrgan (1984-1994, 2000-incō)
- Dave Rude chitàra (2006-incō)
- Brian Wheat bas, pianofòrt (1984-1994, 2000-incō)
- Troy Luccketta baterìa (1984-1994, 2000-incō)
Ex-cumpunènt
- Tommy Skeoch chitàra (1984-1994, 2000-2006)
Discugrafìa
Album in studi
- 1986 - Mechanical Resonance
- 1989 - The Great Radio Controversy
- 1991 - Psychotic Supper
- 1994 - Bust a Nut
- 2004 - Into the Now
- 2007 - Real to Reel
- 2007 - Real to Reel 2
- 2008 - Forever More
- 2011 - Twisted Wires & the Acoustic Sessions
- 2014 - Simplicity
- 2019 - Shock
Album da 'l viṿ
- 1990 - Five Man Acoustical Jam
- 2001 - Replugged Live
- 2002 - Standing Room Only
- 2003 - Extended Versions
- 2010 - Alive in Europe
- 2016 - Mechanical Resonance Live
Racòlti
- 1991 - Bonus & Unreleased Rare Tracks
- 1995 - Time's Makin' Changes - The Best of Tesla
- 2001 - 20th Century Masters - The Millennium Collection: The Best of Tesla
- 2008 - Time Machine - box set
EP
- 2007 - A Peace Of Time