Jojo eta Ramuntxo
Jojo eta Ramuntxo | |
---|---|
Datuak | |
Jatorria | Nafarroa Beherea eta Lapurdi |
Musika mota | folk |
Produkzioa | |
Diskoetxea(k) | Elkar, Agorila |
Taldekideak | |
Jojo Bordagarai Ramuntxo Carrere | |
Informazio gehigarria | |
![]() ![]() |
Jojo eta Ramuntxo Jojo Bordagarai baxenabartarra eta Ramuntxo Carrere lapurtarra 1987an hasi ziren elkarrekin abesten, Euskal Kantu Txapelketan elkar ezagututa. Hamar urte lehenago, Bernadette arrebarekin plazarik plaza ibili zen Jojo, Txomin Hegik gitarrarekin lagunduta. Jojok eta Ramuntxok hiru disko kaleratu dituzte eta une honetan utzia dute bikote lana. Jojok, baina, bakarkako bidea hasi du eta aitarekin eta arrebarekin Pil Pil taldea osatzen du.
Taldea
[aldatu | aldatu iturburu kodea]Hamabi urte zituenetik herrietan kantari aritu da Jojo Bordagarai. 1973an, Jojo eta Bernadette taldea osatu zuen arrebarekin, eta Txomin Hegi kantari, idazle eta antzerkilariak laguntzen zien gitarrarekin. Urte batzuk lehenago, Hegik berak eta Peio Serbiellek Urrakoa kantu ikuskizuna landu zuten. Jojok eta Bernadettek Agur diskoa (Elkar) grabatu zuten 1978an, Bordagaraik eta Hegik sortutako kantuekin. Hurrengo urtean taldea desegin egin zen, eta Jojo Garaziko Nekez Ari abesbatzan hasi zen kantari. Ahotsaren trebakuntzak Euskal Kantu Txapelketan parte hartzera eraman zuen, 1987an, eta lehiaketa hartan bertan ezagutu zuen Ramuntxo Carrere.
Bikotea beste musikari batzuez inguratu zen taldea osatzeko, eta folk herrikoiaren bidetik ekin zioten (akordeoia, gaita, flauta...). Bordagaraik hartu zuen kantuetako hitzak idazteko ardura, eta doinuak bien artean sortu zituzten. Haize andrea estreinako diskoa (Elkar, 1990) Niko Etxart kantariaren estudioan grabatu zuten, eta Vladimir Cosma errumaniar konpositorearen lan bat moldatu zuten, "Xabinari". Horren aurretik, Azala taldearen Marigaizto diskoan parte hartu zuen bikoteak.
Geroago beste bi disko etorri ziren: Maitasunez ba ote... (Elkar, 1993) eta Zure kanpoetara (Agorila, 2001). Disko bakoitzean, baina batez ere azken horretan, taldearen soinua osatuz joan zen musikari berrien ekarpenekin: Mathieu Haranbure (baxua; King Mafrundi, Txakun...), Phillipe Ezkurra (akordeoia, bandoneoia; Peio Serbielle, Pier Paul Berzaitz...), Mixel Etxekopar (xirula, ttun-ttuna)...
2004. urtean Ramuntxo Carrerek kantatzeari utzi zion, eta Jojo Bordagaraik Pil Pil taldearekin jarraitu zuen. Alexandre aitak, Bernadette arrebak eta Mixel Thikoipe lehengusuak osatzen dute taldea. Beste egitasmo batean ere aritu da, Triki Trakan. Xabi Pery (Itoiz) musikari eta soinu teknikariaren inguruan sortutakoa da hori.
Haatik, orain bakarkako proiektuan dabil murgilduta. Bahaki... diskoa (Elkar, 2008) da lan horren orain arteko fruitua, Philippe Ezkurraren laguntzaz egindakoa. Jazz musikariz inguratu da Bordagarai, eta Europako ekialdeko musikatik eta kantu tradizionaletik asko duten konposizio garaikideak, emozio askotarikoak eta koloretsuak lantzen dituzte.
Diskografia
[aldatu | aldatu iturburu kodea]- Agur (1978, Elkar), Jojo eta Bernadette
- Haize Andrea (1990, Elkar)
- Maitasunez ba ote... (1993, Elkar)
- Zure kanpoetara (2001, Agorila)
- Bahaki (2008, Elkar)
Kolaborazioak
[aldatu | aldatu iturburu kodea]- Gaur olerkiak, bihar presoak Euskal Herrirat! (1998)
- Manex Erdozaintzi-Etxart. Omenaldiko kantaldia II (2004)
Ikus, gainera
[aldatu | aldatu iturburu kodea]Erreferentziak
[aldatu | aldatu iturburu kodea]- Edukiaren zati bat «Jojo eta Ramuntxo» artikulutik hartua da. Artikulu hark Jon Eskisabel du egile, eta Creative Commons Aitortu-Partekatu Berdin 3.0 lizentziarekin argitaratu da Badok euskal kantagintzaren atarian.