Esperanza e gloria

Esperanza e gloria
Ficha técnica
Título orixinal	Hope and Glory
Director	John Boorman
Produtor	John Boorman Michael Dryhurst
Guión	John Boorman
Intérpretes	Sarah Miles David Hayman Derrick O'Connor Susan Wooldridge Sammi Davis Ian Bannen
Música	Peter Martin
Fotografía	Philippe Rousselot
Montaxe	Ian Crafford
Estudio	Goldcrest Films Nelson Entertainment
Distribuidora	Columbia Pictures
Estrea	13 de novembro de 1987
Duración	113 minutos
Orixe	Reino Unido Estados Unidos
Orzamento	9,3 millóns de dólares
Recadación	10 millóns de dólares
Na rede

Esperanza e gloria (en inglés: Hope and Glory) é un filme británico-estadounidense de 1987 escrito, producido e dirixido por John Boorman e baseado na súa propia experiencia crecendo durante o Blitz no Londres da segunda guerra mundial. O título derívase da canción patriótica tradicional británica "Land of Hope and Glory" e conta a historia da familia Rowan a través dos ollos do fillo, Billy.

Esperanza e gloria foi un éxito de crítica e público; gañou o Globo de Ouro ao mellor filme (comedia ou musical) e recibiu cinco candidaturas aos premios Óscar, incluídas as de mellor filme, mellor director e mellor guión orixinal. Tamén obtivo trece candidaturas aos premios da BAFTA, gañando o de mellor actriz secundaria (Susan Wooldridge).

Foi estreado na Televisión de Galicia o 15 de maio de 1992.

Argumento

Comezando xusto antes do inicio da segunda guerra mundial, o filme conta a historia da familia Rowan: Billy, as súas irmás Sue e Dawn, e os seus pais Grace e Clive, que viven nun suburbio de Londres. Despois do comezo da guerra, Clive únese ao exército, deixando a Grace soa para ocuparse dos nenos. Ela case envía a Billy e a Susie fóra de Londres, mais no último segundo na beiravía do tren dáse de conta que non pode soportar estar separada deles. Así é como Billy pasará o resto da guerra en Londres.

A ollos do neno de dez anos, os "fogos de artificio" do Blitz cada noite resultan tan excitantes como terroríficos. A súa familia non ve as cousas do mesmo xeito segundo as bombas continúan a caer, pero a súa ansia de supervivencia lévaos a achegarse.

Elenco

• Sebastian Rice-Edwards como Billy Rowan
• Sarah Miles como Grace Rowan
• David Hayman como Clive Rowan
• Geraldine Muir como Sue Rowan
• Sammi Davis como Dawn Rowan
• Susan Wooldridge como Molly
• Derrick O'Connor como Mac
• Ian Bannen como Grandfather George
• Anne Leon como Grandma
• Jean-Marc Barr como Corporal Bruce Carrey

Localizacións

O decorado principal do filme construíuse nunha pista en desuso do antigo aeródromo de Wisley en Surrey e outras escenas do río foron rodadas preto de Shepperton Lock.

Filme de arquivo

A metraxe de novas no cinema local contén escenas do filme de 1969 Battle of Britain.

Críticas

Esperanza e gloria recibiu críticas positivas no momento da súa estrea e foi considerado un dos mellores filmes de 1987 por máis de cincuenta críticos. O filme foi recibido favorablemente por Pauline Kael na súa colección de artigos Hooked.