LaLiga
| Liga de Fútbol Profesional | |
|---|---|
 | |
| Tipo | Liga profesional |
| Fundación | 26 de xullo de 1984 |
| Localización | Madrid |
| Na rede | |
| https://www.laliga.com/ | |
     | |
| [ editar datos en Wikidata ] | |
A Liga de Fútbol Profesional (LFP), coñecida comercialmente como LaLiga e oficialmente como Liga Nacional de Fútbol Profesional, é unha asociación deportiva integrada polos clubs e as sociedades anónimas deportivas que participan nas categorías profesionais da liga española de fútbol, isto é, a Primeira e a Segunda División. Foi creada en 1984 e forma parte da Real Federación Española de Fútbol (RFEF), aínda que ten personalidade xurídica propia e goza de autonomía para o seu funcionamento.
A súa principal función, ademais de defender os intereses dos seus asociados, é a organización do Campionato Nacional de Liga na categoría profesional (Primeira e Segunda División) en coordinación coa RFEF.
Historia
[editar | editar a fonte]En 1977 os clubs FC Barcelona, Athletic Club, Atlético de Madrid e Real Sociedad tentaron crear unha Liga Profesional pero o intento foi freado polo daquela presidente da Real Federación Española de Fútbol, Pablo Porta, coa creación dun Comité Nacional de Fútbol Profesional, o cal ficaría dentro da RFEF sen constituír un órgano xuridicamente independente.[1] Este comité sería o xermolo do que máis tarde sería a LFP.
O primeiro comité executivo da LFP tomou posesión o 30 de decembro de 1983 na sede da Real Federación Española de Fútbol.
A primeira directiva formouse polos seguintes presidentes de clubs profesionais, cos seguintes cargos na LFP:
- Manuel Vega-Arango Alvaré (Sporting de Gijón), presidente.
- Gerardo Martínez Retamero (Real Betis), vogal.
- Antonio Pérez Gascón (CD Málaga), vogal.
- Antonio Baró Armengol (RCD Espanyol), vogal.
- José de Aguilar Hernández (UD Las Palmas), vogal.
- Jesús Corzo Sierra (Deportivo da Coruña), vogal.
- Manuel Toledano Núñez (Calvo Sotelo CF), vogal.
Contratouse como secretario xeral a Jesús Samper Vidal, que organizou a primeira estrutura económica e administrativa da LFP, e que elaborou os primeiros estatutos, que se aprobaron en 1984. Por mor da aprobación deses estatutos, a LFP fúndase oficialmente o 26 de xullo de 1984.
En 1987 contrátase a Antonio Fernández Fidalgo como director de relacións externas, e en 1991 a Pedro Tomás Marqués como xerente e a Carlos del Campo Colás como asesor xurídico.
O 11 de decembro de 1984 Antonio Baró Armengol sucede a Manuel Vega-Arango na presidencia, que ocupa ata o seu falecemento, o 11 de febreiro de 2001. Realízanse entón unhas eleccións á presidencia, que gaña Pedro Tomás Marqués.
En 1997 a Real Federación Española de Fútbol propuxo a supresión da Liga Nacional de Fútbol Profesional e a súa transformación nun comité de fútbol profesional dentro da RFEF.[2]
Sen esgotar o seu mandato, Tomás deixou o cargo e o 9 de xuño de 2004 o vicepresidente primeiro da LFP, José Luis Astiazarán -presidente da Real Sociedad de Fútbol- asumiu a presidencia en funcións. Tras un ano, Astiazarán deixou o seu posto ante a convocatoria de eleccións, sendo substituído na presidencia interina o 22 de xuño de 2005 por Guillermo Cabello Valero, vicepresidente segundo da LFP e presidente do Terrassa FC. Porén, o descenso deste club a Segunda División B obrigoulle a Cabelo a ceder a presidencia en funcións a Carlos del Campo Colás, secretario xeral da LFP.[3] As eleccións celebráronse finalmente o 15 de xullo de 2005, sendo elixido José Luis Astiazarán como novo presidente, ao obter o aval de 39 dos 42 clubs afiliados á LFP.[4]
O 14 de abril de 2009 Astiazarán dimitiu para anticipar as eleccións,[5] exercendo como presidentes interinos os dous vicepresidentes, Javier Tebas e Jaime Barriuso, xunto ao secretario xeral, Carlos del Campo. Finalmente, o 27 de abril de 2009 Astiazarán foi reelixido presidente tras ser a súa a única candidatura presentada.[6]
O 26 de abril de 2013 foi sucedido no cargo por Javier Tebas, que foi o único candidato que se presentou ás eleccións no seguinte mandato.[7] O 11 de outubro de 2016 Tebas foi reelixido co aval de 37 dos 42 clubs con dereito a voto para un segundo mandato.[8] A finais de 2019 foi reelixido para un terceiro mandato ata 2024.[9]
Presidentes
[editar | editar a fonte]| Presidente | Período |
|---|---|
| Manuel Vega-Arango Alvaré | 1983 - 1984 |
| Antonio Baró Armengol | 1984 - 2001 |
| Pedro Tomás Marqués | 2001 - 2004 |
| José Luis Astiazarán (interino) | 2004 - 2005 |
| Guillermo Cabello (interino) | 2005 |
| Carlos del Campo (interino) | 2005 |
| José Luis Astiazarán | 2005 - 2013 |
| Javier Tebas | 2013 - actualidade |
Notas
[editar | editar a fonte]- ↑ "La Liga de fútbol profesional fue abortada por Porta". El País. 7 de xullo de 1977.
- ↑ "La federación pide CSD la desaparición de la Liga de Fútbol Profesional". El País. 22 de febreiro de 1997.
- ↑ "noticias - A LFP aproba modificacións da Copa, das designacións arbitrais e o calendario 2005/06". Arquivado dende o orixinal o 05 de maio de 2011. Consultado o 20 de xuño de 2011.
- ↑ "La Liga estrena presidente", 15/7/2005, El País (en castelán).
- ↑ "rtve.es/deportes - Astiazarán dimite para adelantar as eleccións".
- ↑ "lfp : José Luis Astiazarán, reelexido presidente da Liga - AS.com".
- ↑ Javier Tebas, proclamado definitivamente como nuevo presidente de la Liga
- ↑ "Tebas, reelegido presidente de laLiga: del salvavidas de los clubes de fútbol...". Web Financial Group (en castelán). Consultado o 17 de abril de 2020.
- ↑ "Liga | Javier Tebas, reelegido presidente de LaLiga por tercera vez". RTVE (en castelán). 23 de decembro de 2019. Consultado o 17 de abril de 2020.
