Tao Teh King/Bab 12

XII.

MENOETOEP PINTOE.

1. Sinar bergoemilang dari berbagi-bagi war­na bisa bikin orang poenja mata mendjadi boeta; kabrisikannja soeara-soeara aken bikin koepingnja toeli ; pertjampoeran dari roeparoepa rasa makanan bikin orang poenja perasa­an lidah mendjadi poentoel dan tida karoean; asiknja dalem pemboeroean bikin ia mendjadi boeas, dan kaindahannja barang barang jang langka membikin hatinja djadi ketarik.
2. Oleh kerna itoe maka orang-orang boediman mentjari apa-apa boeat poeasken iapoenja roh dan tida boeat iapoenja pantjadrija atawa perasa'an badan.
3. .Ia tida perdoeliken pada jang satoe dan samboet pada jang laen dengen kadoea tangan.

⁂

Dalem ini fatsal boekan sadja Lao Tze maoe oendjoek bagimana manoesia poenja pantjadrija gampang ketarik oleh segala apa jang berada di sapoeternja, tapi djoega teroetama itoe roeparoepa perasa'an badan bisa djadi roesak atawa poentoel oleh lantaran digoenaken terlaloe dari moesti boeat mengedjer apa jang paling disoeka. Oepamanja, mata jang soedah kemaroek pada paras jang eilok, membikin tida bisa kenalin lagi segala tjatjat dan kadjelekan jang tertampak di dalem itoe katjantikan ; koeping jang soedah kakenjangan denger poedjian dan oempakan, tida bisa mengarti dan taro harga pada nasehat jang djoedjoer dan berfaedah tapi tida enak didenger. Begitoe poen saorang jang terlaloe dojan dahar makanan enak, perasa'an lidahnja sringkalih tida bisa ketarik pada barang santapan saderhana maskipoen baginiana berfaedah oentoek kawarasannja, kerna soedah biasa sama lezad dan sedepnja masakan, boekan pada kagoena'annja itoe makanan.

Salaennja disesatken oleh iapoenja pantjadrija atawa lima matjem perasa'an badan, djoega manoesia dibikin mendjadi boeas dan loepaken segala apa pada waktoe lagi asik memboeroe; jang dimaksoedken dengen itoe perkata'an „memboeroe" pastilah boekan tjoemah terhadep pada binatang oetan, tapi djoega mengedjer nama, kakaja'an, kadoedoekan agoeng, kapoedjian, paras eilok dan sabagiiija lagi, jang sringkalih membikin manoesia djadi „loepa darataii." Pendeknja itoe segala barang atawa sifat langka jang tida sembarang orang bisa dapet atawa poenjaken, telah membikin manoesia djadi begitoe ketarik hingga banjak jang goenaken saantero dari kahidoepannja tjoemah boeat kedjer dan poenjaken itoe barang atawa sifat doenia jang sia-sia dan tida kekel. Maka itoe ada perloe sekaiih orang beladjar „toetoep pintoe," jaitoe tahan hawa nafsoe jang ditimboelken oleh iapoenja pantjadrija, soepaja toedjoean hidoepnja tida menjasar. (Ajat 1).

Orang-orang boediman selaloe mentjari apaapa jang berfaedah dan membri kapoeasan pada soemanget atawa roh, maka ia tida perdoeliken pada itoe segala penarik oentoek badan kasar, tapi sedia aken samboet dengen kadoea tangan pada segala apa jang bisa menambahken sampoernanja iapoenja batin (Ajat 2, 3)