Tao Teh King/Bab 60

LX.

BANTOEANNJA ROH-ROH.

1. Pamerentahan atas saboeah negri besar haroes dilakoeken sabagi memasak saekor ikan ketjil, traoesah moesti bekerdja banjak.
2. Djikaloe itoe negri besar diperentah menoeroet Tao, roh dari orang-orang jang soedah mati tida nanti kasih liat perboeatan jang adjaib aken mengganggoe manoesia.
3. Itoelah boekan lantaran marika tida bisa kasih liat apa-apa jang loear biasa, hanja kerna marika tida maoe goenaken itoe boeat menjoesahken pada manoesia.
4. Djoega boekan marika tida bisa menjoesahken pada manoesia, hanja lantaran marika meliat bahoea itoe Radja jang Boediman poen tida pernah mengganggoe manoesia.
5. Djikaloe tida ada Radja atawa poen orang aloes melakoeken perboeatan jang meroegiken rahajat, marika poenja kabedjikan aken mendjoeroes ka satoe toedjoean jang mendatengken kabaekan oemoem.

⁂

Inilah ada satoe dari fatsal-fatsal jang paling roewet dan samar dari Tao Teh King, kerna membitjaraken perkara gaib jang berhoeboeng dengen pengaroehnja roh-roh dari orang mati pada manoesia dan pemerentah negri. Boeat petjahken maksoednja ini fatsal boekan sadja orang haroes mengenal baek pada kapertjajaan Tionghoa tentang roh leloehoer tapi djoega pada pengataoean occult jang berhoeboeng dengen roh-roh dan tenaga pikiran, jang seringkalih pengaroehin pada manoesia dan doenia poenja penghidoepan lahir. Zonder berdasar atas ini pengartian itoe oedjar-oedjar di atas djadi kaliatan seperti menjasar ka djoeroesan pri moedjidjat jang beräda di loear natuur dan soesah diboektiken kabenerannja.

Itoe andean hal memerentah negri besar haroes dilakoeken sabagi memasak saekor ikan ketjil inilah ada gampang dimengerti. Ikan ketjil tida perloe disertaken banjak boemboe, tida oesah dibersihken terlaloe rapih, dan kapan digoreng atawa dibakar tida boleh terlaloe lama soepaja tida djadi angoes. Pendeknja itoe masakan ada lebih saderhana dari-pada ikan jang besar. Djoestroe itoe kasaderhana'an ada sanget perloe dalem pamerentahan, biar poen jang dioeroes ada satoe negeri jang mempoenjai banjak rahajat. (Ajat 1).

Soeal ganggoengan dari rohnja orang-orang jang soedah mati boekan lantaran samoea orang jang mati ada bersifat djahat, hanja seperti soedah diterangken dalem boekoe Penghidoepan di sabelah sananja Koeboer, jang biasa menganggoe ada Badan Aloes kembaran (Kwie atawa Lingasharira) dan Badan Hawa Nafsoe (Kama-roepa, Phik) jaitoe bagian sabelah bawah jang bersifat rendah dari manoesia poenja badan-badan aloes, jang biasa ditinggalken di Kamaloka (Im Kan) kapan manoesia poenja Sien Hoen soedah bisa landjoetken perdjalanannja ka tingkatan atas aken bersatoe sama Bing. Itoe pamoedja'an pada aboe leloehoer, seperti djoega pada Thian dan machloek-machloek soetji, samoea ada ditoedjoeken pada itoe leloehoer poenja roh sabelah atas, jang lantaran menggenggem itoe Seng maka sifatnja selaloe baek, hingga siapa memoedja dengen soedjoet dan toeloes hati pada leloehoernja, pastilah aken mendapet berkah dan kasoetjian. Berbareng dengen itoe, pengaroehnja itoe kabaktian membikin itoe se­gala matjem Kwie dan Phik jang bergelandang­ an di alam aloes bagian paling rendah tida bisa mengganggoe pada dirinja, sebab itoe kabiasa'an atawa kamoestian „bangsa mentjari bangsa" ada berlakoe djoega di mana-mana. Itoe roh-roh djahat tjoemah berpengaroeh pada orang-orang jang kandoeng pikiran tida baek, tapi tida bisa berdaja terhadep saorang jang hidoep bersih dan berbakti. Inilah ada satoe kabeneran jang bisa diboektiken di mana-mana.

Satoe Keizer di Tiongkok ada djadi wakilnja antero rahajat, sabagi ajah dan pendita jang paling besar, kerna tjoemah ia sendiri sadja jang haroes mengadep dan bersembahjang pada Thian. Kapan itoe keizer hidoep soetji, tida temaha dan tida pikirken laen dari kaselametannja rahajat, hingga tida atoer pemerentahan jang saderhana menoeroet Tao , boekan sadja ia bisa bikin sekalian rahajat djadi berlakoe bener tapi djoega, dengen pengaroeh dan kakoeasa'annja jang besar itoe, ia bisa singkirken segala roh roh djahat jang biasa mengganggoe dan bikin kaloet pikirannja manoesia. Rahajat jang merasa senang dan poeas soedah tentoe tida kandoeng ingetan djahat, maka tida aken moentjoel itoe woedjoet pikiran atawa geteran jang bisa menarik perhatiannja roh-roh djahat boeat tjoba timboelken kakaloetan. Banjak kadjadian heibat dalem doenia jang tida bisa ditjegah oleh kapandean manoesia, seperti peperangan, pemberontakan dan pertempoeran antara bangsa sendiri, sabetoelnja tjoemah boeah jang kaliatan dari apa jang soedah lama terpeta di doenia aloes sabagi woedjoet-pikiran. Sasoeatoe gontjangan heibat di doenia kabanjakan didoeloeken dengen pertempoeran dalem alam aloes, seperti djoega toeroennja oedjan biasa didoeloein oleli berkoempoelnja awan tebel di atas langit. Maka kapan di satoe negri jang mendjadi keizer, radja atawa pemimpin-pemimpin rahajat, ada kandoeng niatan tida baek, oepama soeka bermoesoeh pada bangsa laen atawa ingin rampas negri tetangga, itoe samoea pikiran jang djahat, apalagi kaloe soedah dianoet oleh antero rahajat, pastilah aken menimboelken kaonaran. Djikaloe itoe peperangan tida kadjadian, dalem negri sendiri nanti timboel pemberon­takan, atawa nanti mengondang datengnja katjilaka'an, seperti bandjir besar, gempah boemi dan laen-laen jang sama djoega heibatnja seperti itoe peperangan, kerna sasoeatoe pikiran djahat moesti membawa boeah jang djahat djoega. Itoe pikiran djadi seperti hidoep, dan dibikin koeat oleh roh-roh djahat dan sadjoemblah machloek aloes jang dinamaken lelemboet atawa elemen­taal, jang goenaken itoe gontjangan dari perasa­an bentji dan goesar dari manoesia boeat mengharoe-biroe, hingga apa jang bermoelah dipandang seperti perkara ketjil bisa meloelah dan timboelken permoesoehan heibat jang tida bisa ditjegah lagi. Kapan orang soedah mengarti pada ini kaada'an, tiada soesah aken membade apa jang dimaksoedken oleh Lao Tze koetika membilang, kapan satoe negri diperentah menoeroet Tao, pendoedoeknja tida bisa diganggoe oleh roh-roh djahat, sebab di dalem Tao ada tergeng­gam sifat saderhana jang melinjapken manoesia poenja hawa nafsoe serakah, serta memberi kapoeasan dan katentreman, hingga itoe sifat-sifat djahat dari doenia aloes tida dapet kasempetan boeat mengadoek, seperti djoega api jang me­njajah heibat nanti padem sendiri kapan tida dapet oempan, Sabaiiknja, dengen berlakoe menoeroet Tao, itoe Keizer jang Boediman nanti dapet bantoeannja roh-roh baek atawa doenia aloes poenja segala sifat jang soetji boeat mendatengken berkah pada sekalian rahajatnja, satoe bantoean penting jang banjak pamerentah, lan­taran tida taoe resia dari kakoeasa'an aloes jang gaib itoe, soedah tida taro perhatian, dan mengandel sadja pada kakoeasa'an materialistisch jang sanget berwates. (Ajat 2-5).

Tao Teh King (page 278 crop)