Arran
Arran es un insul de Scotia, situat in li estuarie del fluvie Clyde (Firth of Clyde). It es con 432km² li settesim max grand insul scotesi. Li population resident esset 4.629 in 2011. Arran apartene al districte administrativ de North Ayrshire.
Geologie
[modificar | redacter fonte]Li ruptura geologic del Highlands (anglesi: Highland Boundary Fault) passa trans li insul, sectent li, simil quam li chef terra de Scotia, in un nord montanial e un sud con terra agricultural colinosi. Pro to Arran ha esset nominat «Scotia in miniatura», e es considerat quam un paradise por geologes. Li max alt monte es Goat Fell (863,5m).
Historia
[modificar | redacter fonte]Arran es habitat continuimen depoy li era neolitic. Vi numerosi tombes neolitic sur li insul, anc menhires e circules de lápides. Desde li 6. secul gente de Irland colonisat li insul e apportat li lingua goidelic, que vat evoluar in un dialecte del scot-gaelic, e lor religion cristan. Plu tard li Vikinges dominat it; li pluparte del nómines de loc es de origine norse. In 1266 finalmen Arran passat del reyatu de Norvegia a to de Scotia.
In li 19. secul li "Clearances" (vacuationes de cultivatores de litt parcelles de suol) ha obligat mult gente a emigrar. Multes eat a Quebec. Desde ti epoca li dialecte scot-gaelic de Arran eat declinant, til li ultimes qui parlat it quam lingua maternal morit in li 1990s.
Arran hodie
[modificar | redacter fonte]Li max grand villages es Lamlash e Brodick al costa est. Un servicie de ferry conexe Brodick con li citá de Ardrossan sur li chef terra. Li turisme es li max important industrie de Arran. Li agricultura es anc significant, e whisky, bir e cosmeticos es fabricat sur li insul.