Mýrasýsla
![](https://upload.wikimedia.org/wikipedia/commons/thumb/0/03/M%C3%BDras%C3%BDsla_Loc.svg/300px-M%C3%BDras%C3%BDsla_Loc.svg.png)
Mýrasýsla (einnig Mýrar) var ein af sýslum Íslands. Sýslur eru ekki lengur stjórnsýslueining á Íslandi, en nafnið er enn notað til að vísa til svæðisins.
Mýrarsýsla er á Vesturlandi og nær frá Hvítá í Borgarfirði að Hítará. Sýslan er alls 3.270 km².
Náttúrufar
[breyta | breyta frumkóða]Úti fyrir strönd Mýrasýslu eru ótal sker og er aðgrunnt að ströndinni. Mestur hluti sýslunnar er láglendur og kallast hann einu nafni Mýrar og ná þær allt inn að Norðurá og Gljúfurá meðfram Hvítá. Mýrarnar eru víða illar yfirferðar, með lágum klapparholtum inn á milli. Holt þessi eru mörg hver vaxin birkikjarri. Upp af Mýrunum ganga síðan dalir inn í hálendið; helstu dalir eru Hítardalur, Hraundalur með Langavatnsdal, Norðurárdalur og Þverárhlíð austust.
Mýrasýslan er öll gróðursæl og er gróðurlendið útbreiddast á Mýrum. Afréttir eru einnig grösugir. Í Mýraeldum vorið 2006 skemmdist þó nokkurt gróðurlendi en líklegt er talið að það muni ná sér á einhverjum áratugum.
Stjórnsýsla
[breyta | breyta frumkóða]Mýrasýsla er í lögsagnarumdæmi með Borgarfjarðarsýslu og hefur sýslumaður aðsetur sitt í Borgarnesi. Sveitarfélög innan Mýrasýslu eru tvö, Borgarbyggð og Hvítársíðuhreppur.
Kjördæmið
[breyta | breyta frumkóða]Mýrarsýsla var kjördæmi í Alþingiskosningum fram til 1959, er Vesturlandskjördæmi var myndað.
Heimild
[breyta | breyta frumkóða]- Þorsteinn Jósepsson, Steindór Steindórsson og Páll Líndal (1982). Landið þitt Ísland, L-R. Örn og Örlygur.