Byblus
Byblus (-i, f.; Graece: Βύβλος; Arabice: جبيل Ǧubayl) est portus Libani, ad septentriones Beryti situs in litore Maris Interni. Creditur antiquissimum esse omnium oppidorum quae continuo inhabitantur.
![](https://upload.wikimedia.org/wikipedia/commons/thumb/8/86/ByblosObeliskTemple.jpg/220px-ByblosObeliskTemple.jpg)
Conditam aiunt Byblum quinto fere millennio a.C.n. Bis memoratur a Sancta scriptura, 1 Regum 5:16 atque Ezekiel 27:9. Babyloniis, Phoenicibus, Graecis emporium praebuit locupletem papyrique commercio praecipue insignem, ita ut liber apud Graecos nomen suum βιβλίον ab hoc loco acciperet. Ibidem antiquitus imprimis Adonin colebant deum.
![](https://upload.wikimedia.org/wikipedia/commons/thumb/e/e6/ByblosStJohnBaptisChurch.jpg/220px-ByblosStJohnBaptisChurch.jpg)
Saeculis XI et XII, Byblus sacrarum expeditionum equites in sua moenia recepit, qui eam castro munierunt. Quae etsi anno 1187 a Saladino tandem regno Hierosolymitano esset erepta, usque ad nostros dies Christianam servavit religionem.
Fontes
[recensere | fontem recensere]- Strabo, Geographica XVI.2.18
Bibliographia
[recensere | fontem recensere]- Nina Jidéjian, Byblos through the ages. Beryti: Dar al-Machreq, 1968
![]() |