Rogerius Baco
![](https://upload.wikimedia.org/wikipedia/commons/thumb/8/8a/Roger-bacon-statue.jpg/220px-Roger-bacon-statue.jpg)
Rogerius Baco;[1] qui doctoris mirabilis cognomen meruit (Ilchester, in Somersetensi Anglica provincia, natus anno 1214; mortuus Oxoniae anno 1294), fuit Franciscanus monachus et philosophus Anglicus.
De vita
[recensere | fontem recensere]Oxonii primum atque deinde in Athenaeo Parisiensi, ubi theologicae doctrinae laurea insignitus est, studiis vacavit, post quae in Angliam rediit atque Francisci Asisiensis Fratrum Minorum regulam est amplexatus. In solitudinem sic digressus, scientiae illi magis magisque sibi acquirendae totus incubuit, ad quam naturali spiritu tractus iam a teneris unguiculis videbatur: dicitur enim vel a pueris excedens, Latinam, Graecam, Hebraicam Arabicamque linguam optime calluisse.
Atqui reapse sapientiae omnis partes per eum provectae sunt. Grammaticen ac philologiam ad sacrarum rerum studium expediendum ipse vocavit; mathesim necessarium instrumentum edixit ad ceteras disciplinas adeundas; ac re confirmavit, quando, inter alia, Iuliani kalendarii reformationem primus proposuit, quae, Copernico etiam sollicitante, a Gregorio PP. XIII post saecula tandem inducta est. Cum autem diutinos in libris labores exercuisset cognitionesque suas etiam tum indigentiae plenas sentiret, intimius naturae secreta penetrandi cupidus, praetermisso—ut ipse ait—Aristotele, in rerum comprehensionem intendit propriis experimentis usus. Procul dubio rerum illa aetate condicio erat, ut errores vitare impossibile foret: in eosque et noster incidit, qui alchimiam quoque impense coluit. Quamquam satis rationabiliter, neque superstitione nimia, ut mos tum erat, apprime invasus; lapidis enim illius philosophalis inquisitio, ei fuit praecipue investigatio, qua ratione metallum quoddam per ignem edolaret, ad instar naturalis actionis in fodinis. Nihilo minus peritiam eius magices arguerent, cuius poenas effugere non valuit, nisi cum Clemens Papa IV, Baconis sapientiae rectus aestimator, in Petri solio sedit.
Opera
[recensere | fontem recensere]- Opus maius
- Opus minus
- Opus tertium
- De multiplicatione specierum
- Epistola de secretis operibus artis et naturae sive De mirabili potestate artis et naturae (auctore incerto)
Notae
[recensere | fontem recensere]- ↑ Ex multis: Compendium philosophia ad usum seminariorum, III (Parisiis, 1854), 407.
Nexus interni
- Speculum alchemiae (opus Baconi attributum, ab alio quodam scriptum)
- The Famous History of Friar Bacon, mythistoria de rebus mirabilibus a Bacone effectis
- Friar Bacon and Friar Bungay (1594), ludus scaenicus Roberti Greene eodem fere argumento
- Codex Voynich, liber manu scriptus originis incerti, interdum Baconi attributus
Nexus externi
[recensere | fontem recensere]- "In honorem Rogerii Baconis", Alma Roma, 4, 1914, p. 61
- Friedrich Wilhelm Bautz, "BACON, Roger" in Biographisch-Bibliographisches Kirchenlexikon vol. 1 (Hammonae, 1975; reimpr. 1990. ISBN 3-88309-013-1) , columnae 331–332 (Theodisce)
- Bacon.html Biographia apud Mc Tutor (Anglice)
- De Rogerio Bacone apud universitatem Stanfordiensem a Ieremia Hackett scripta