Fero
Fero es un elemento cimical con la simbol Fe e la numero atomal 26. Lo es un metal de la serie prima de transita e grupo 8 de la table de elementos. Lo es, par masa, la elemento la plu comun a tera, forminte la plu de la cores esterna e interna de la planeta. Lo es la elemento cuatro la plu comun en la crosta de la tera.
En sua state como un metal, fero es rara en la crosta de la tera, limitada a depone par meteorites. Minerales de fero, par contrasta, es entre la plu abundante en la crosta, ma la estrae de metal usable de los nesesa fornones capas de ateni 1500 °C o plu, sirca 500 °C plu ca lo cual es nesesada per fonde cupre. Umanas ia comensa developa acel prosede en Eurasia sola sirca 2000 aec, e la usa de utiles de fero ia comensa despone la usa de alias de cupre en alga rejiones, sola sirca 1200 aec. Acel aveni es videda como la move de la eda de bronze a la eda de fero. En la mundo moderna, alias de fero, como aser, fero moldida, aser nonosidable, e aseres spesial es la metales industrial la plu comun, per sua cualias mecanical alta e sua custa basa.
Surfases de fero pur e lisa es mirorin e gris arjentin. Ma fero reata fasil con osijen e acua per produi osidos idratada brun o negra, comun nomida corode. No como la osidos de alga otra metales, cual formi stratos pasivinte, corode ave plu volum ca la metal, e alora despeli, esposante surfases fresca per corode.
La corpo de un umana adulte conteni sirca 4 grames (0.005% de la pesa de la corpo) de fero, la plu en la forma de emoglobina e mioglobina. Esta du protenas ave roles esensal en la metaboli de vertebratos, pd la transporta de osijen par sangue, e la conserva de osijen en musculos. Per manteni cuantias nesesada, la metaboli de fero en umanas nesesa un minima de fero en la dieta. Fero es ance la metal a la loca ativa de multe enzimas reduinte-osidinte con respira e osidi e redui en plantas e animales.
Cimical, la states de osidinte la plu comun de fero es fero(2) e fero(3). Fero comparti multe cualias de otra metales de transita, incluinte rutenio e osmio. Fero formi composada en un estende vasta de states de osidi, -2 a +7. Fero formi ance multe composadas de coordina; alga de los, como feroseno, feriosalato, e blu prusen, ave multe usas en industria, medica, e rexerca.