Malaria

Malaria es un maladia infetante, transportada par moscitos, cual afeta vertebratos. Malaria umana causa sintomes cual inclui tipal febre, fatiga, vomita e doles de testa. En casos sever, lo pote causa itero, convulsas, coma o mori. Sintomes comensa usual a 10 a 15 dias pos un morde par un moscito Anopheles infetada. Si on no trata lo coreta, persones pote ave recores de la maladia a menses a pos. En los ci ia survive resente un infeta, un reinfeta causa usual sintomes plu debil. Esta imunia partal desapare tra menses a anios si la person no ave esposa continuante a malaria.

Microorganismes uniselulal de la grupo Plasmodium causa malaria umana. Lo sperde sola tra mordes de moscitos Anopheles fema infetada. La morde de la moscito introdui la parasitos de la saliva de la moscito a en la sangue de un person. La parasitos viaja a la figato, do los maturi e reprodui. Sinco spesies de Plasmodium infeta comun umanas. La tre spesies asosiada con casos plu sever es P. falciparum (cual es culpable per la plu grande parte de moris par malaria), P. vivax, e P. knowlesi (un malaria simial cual sperde a miles de persones per anio). P. ovale e P. malariae causa jeneral un forma plu debil de malaria. On diagnose tipal malaria par la esamina microscopial de sangue usante filmas de sangue, o con probas rapida de diagnose fundida sur antijenes. Metodos cual usa la reata cadenin de polimerase per deteta la ADN de la parasito esiste, ma los no es vasta usada en rejiones do malaria es comun, par causa de sua custa e complicadia.

On pote redui la risca de la maladia par preveni mordes de moscito par usa redes contra moscitos e repulsantes de insetos o con mesuras de controla de moscitos como insetisides e drena acua staniante. Alga medisines es disponable per preveni malaria per viajores en areas do la maladia es comun. Dosas nonfrecuente de la medisin combinada sulfadoxina/pirimetamina es recomendada en enfantes e pos la trimestre prima de ensintia en areas con tasos alta de malaria. De 2023, du vasines contra malaria es aprobada par la Organiza Mundal de Sania. La trata recomendada per malaria es un combina de medisines antimalarial cual inclui artemisinina. La medisin du pote es o meflocina, lumefantrina, o sulfadoxina/pirimetamina. On pote usa cinina, en junta con doxisiclina, si artemisinina no es disponable. En rejiones do la maladia es comun, on debe confirma malaria si posible ante comensa la trata par causa de preocupas sur la crese de resiste a drogas. Resiste entre la parasitos ia developa a alga medisines antimalarial; per esemplo, P. falciparum con resiste a clorocina ia sperde a la plu de rejiones malarial, e resiste a artemisinina ia deveni un problem en alga partes de Asia sude-este.

La maladia es vasta sperdeda en la rejiones tropical e sutropical cual esiste en un banda larga sirca la ecuator. Esta inclui la plu de Africa susaharan, Asia, e America latina. En 2022, sirca 249 milion casos de malaria tra la mundo ia resulta en un estima de 608 000 moris, con 80 persentos esente sinco anios vea o min. Sirca 95% de la casos e moris ia aveni en Africa sude de la Sahara. Tasos de la maladia ia diminui de 2010 a 2014, ma ia crese de 2015 a 2021. Seguente UNICEF, a cuasi cada minuto, un enfante su sinco anios ia mori de malaria en 2021, e "multe de esta moris es prevenable e tratable". Malaria es comun asosiada con povria e ave un efeto negativa sinifiante a la developa economial. En Africa, on estima ce lo resulta en perdes de 12 bilion dolares american per anio par causa de la crese de custas de cura medical, la perde de capasia de labora, e efetos negativa per turisme.