Universia de Oxford
![](https://upload.wikimedia.org/wikipedia/commons/thumb/f/fc/Oxf-uni-mus-nh.jpg/197px-Oxf-uni-mus-nh.jpg)
La Universia de Oxford es la instituida de instrui alta la plu vea en la mundo de la lingua engles, situada en Oxford, England. La site Oxford ia es ja importante como sentro de instrui a la fini de la sentenio 12. En la desenio de 1250, membros de multe ordinas relijiosa ia abita en Oxford, ia deveni influosa e ia manteni casas per studiantes. Alora, persones privata carital ia fundi universias per servi como comunias autosufisinte de scolores; un cuantia cresente de studiantes ia abita en la universia.
La aprendes de la Renase (sentenios 14 a 17) ia influe vasta Oxford.
La universia ia es un sentro de la Partido Monarciste en la Gera Interna Engles (1642–49). La soldato-statiste Oliver Cromwell, canselor de la universia de 1650 a 1657, ia es encargada a preveni la clui de la du universias de Oxford e Cambridge par la puritanes, ci ia regarda la instrui de la universia como perilosa a sua credes relijiosa.
Reformis de organiza en la sentenio 19 ia inclui un tolera plu grande per desacorda relijial e la fundi de cuatro scolas per femes, como Somerville College. La cursos de Oxford ia avansa en la sentenio 19 per inclui studias medical e siensal.
![](https://upload.wikimedia.org/wikipedia/commons/thumb/8/8f/Somerville_College.jpg/197px-Somerville_College.jpg)
Oxford inclui 39 scolas, e cada ave sua propre strutur interna e ativia. La xef formal de la universia es la "canselor", elejeda per sua vive par tota membros de la universia ci ave un diploma de grado "M.A." (mestre de artes). La "vis-canselor", ci reteni sua posto per cuatro anios, es la xef esecutante de la universia. La universia fa esaminas e ofre diplomas. On nesesa susede en du esaminas per oteni un diploma prima. Diplomas e rexercas a la niveles de "mestre" e "dotor" es ofreda en tota sujetos studiada a la nivel graduada.
Pregraduadas dispone instruis formal en la forma de lesones, e labora direta con un instruor privata de la universia, ci es encargada a oserva la progresa academial de un studiante.
De pos 1902, studiantes stranjer ia pote studia en Oxford su la sistem de Donadas de Rhodes, fundida par la statiste colonial brites Cecil John Rhodes.
En ajunta a recursos de come e abita, la scolas furni ativias sosial, cultural e divertinte per sua membros.
Entre la arciteta dominante gotica de la universia es Tom Quad de Christ Church, la plaza la plu grande en la universia. La biblioteca xef, la Biblioteca Bodleian, ia es construida en la comensa de la sentenio 17. Museos inclui la Museo Ashmolean de Arte e Arceolojia (1683). Libros ia es prima primida par la universia en 1478. La primeria Oxford University Press publici, entre otras, la disionario engles de Oxford.