De Zjeramiek

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Avenue Céramique

De Zjeramiek (Nederlands: Céramique) is de naom vaan 'n wiek in Mestreech. Ze weurt in 't noorde begrens door Wiek, in 't ooste door 't Heugemerveld, in 't zuie door Randwiek, en in 't weste door de Maos. De wiek heet veurnaomelek 'n woen- en kentoerfunktie. De naom vaan de wiek kump vaan de eerdewerkindustrie Société Céramique, die hei gelege waor in vreuger jaore.

In 1987 is begós met de herontwikkeling vaan 't terrein. Nao de sloop vaan de industrieel gebouwe, woort door Jo Coenen 'n masterplan opgestèld. Veur de ontwerpe vaan de kentoer- en appartemintsgebouwe woorte internationaal bekinde arsjitekte gevraog, wie Aldo Rossi, Álvaro Siza en Mario Botta.

De koup/heurpries vaan de woeninge is hoeg te numme. De wiek kaom e paar jaor geleie in 't nuits door 't balkondrama vaan Patio Sevilla, boebei twie doeie zien gevalle.

Bekinde gebouwe zien 't Centre Céramique (ontwórpe door Jo Coenen) en 't Bonnefantemuseum (ontwórpe door Aldo Rossi). Via de fietsers- en vootgengersbrögk de Hoeg Brögk (Hoge Brug), die oetkump op Plein 1992, is de wiek verboonde met de binnestad vaan Mestreech.

Vaan de aw industrieel bebouwing zien inkel de Wiebengahal, de villa Jaunez (dirrektäörswoening) en de bordenhal (noe Derlon theater) euver. Oonder aon de tore vaan Siza is in 't weegdèk aongegeve boe het bastion Parma gestande heet.