Ingels hierevoetbalèlftal
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
![](https://upload.wikimedia.org/wikipedia/commons/thumb/3/3b/Wembley_enggermatch.jpg/220px-Wembley_enggermatch.jpg)
![](https://upload.wikimedia.org/wikipedia/commons/thumb/3/3c/Arms_of_The_Football_Association.svg/220px-Arms_of_The_Football_Association.svg.png)
Ingeland heet es eine vaan de veer Britse deilstaote vaanajds e nationaol voetbalteam. Same mèt 't Sjots voetbalteam, boe Ingeland in 1872 d'n alleriersten interland tege späölde, is 't 't ajdste nationaol èlftal vaan de wereld. 't Weurt, wie de res vaan de 't Ingels voetbal, gereguleerd door de Football Association (FA). De bèste prestatie vaan 't Ingels èlftal is 't behole vaan de Wereldbeker in 1966. Op de Olympische Speule maag Ingeland neet apaart deilnumme; veur zoe'n toernoje besteit e Brits hierevoetbalèlftal.
Historie
Al in 1870 woorte wèdstrije tösse selecties vaan Ingelse en Sjotse speulers gespäöld, oonder ospicië vaan de FA. Die rekent me evels nog neet es interland, umtot bei teams door dezelfde boond waore geformeerd. De match Sjotland-Ingeland op 30 november 1872 in 't Sjots Partick waor d'n ierste mèt teams oet twie versjèllende boonde. Dit duel indegde in 0-0. De jaore dao-op späölde ze diverse wèdstrije tege de aander landsdeile vaan 't Vereineg Keuninkriek. In 1906 kaome ze bij de FIFA, en in 1908 oondernaome ze 'ne tournee op 't continent, boe ze de ierste interlands tege neet-Britse teams späölde. Oondertösse waor ouch 'n apaart Ingels amateurèlftal oontstande. E conflik mèt de FIFA, oonder mie euver 't betaole vaan speulers, leide detouw tot Ingeland in 1928 droetstapde en pas in 1946 weer debij kaom. Heidoor misde Ingeland de ierste drei WK's.
Eine kier trök op 't internationaol podium bleek tot de Ingelse neet mie zoe superieur waore wie ieder. In de ierste runde vaan 't WK vaan 1950 verlore ze vaan de Vereinegde Staote, wat hel aonkaom, en in 1953 goonge ze mèt 3-6 (toes) en 7-1 (oet) twie kier oonderoet tege 't Hongarije vaan Puskás. In de jaore zèsteg góng 't beter en in 1966, op 't WK in eige land, lökden 't zelfs um wereldkampioen te weure door in de finaal Wes-Duitsland mèt 4-2 te versloon. Geoff Hurst scoorde heibij 'nen hattrick.
't Succes doort neet laank; in 1974 en 1978 oontbraoke ze weer op 't WK. Get beter góng 't in de jaore tachteg; in 1990, bij 't WK in Italië, haolde ze zelfs de veerde plaots. In sjrèl contras stoont daomèt hun oontbreke op 't volgend WK. In 1996 organiseerde Ingeland 't EK; in de haaf finales lagte ze 't aof tege de latere kampioen Duitsland. Op de WK's vaan 2002 en 2006 haolde ze nog de kwartfinales. Sindsdeen waor 't Ingels team langen tied neet bezunder succesvol, oondaanks tot hun clubcompetitie in dezen tied tot de bèste vaan de wereld oetgreujde. Hoopvol waor me in Ingeland bij 't WK vaan 2018; 't team bereikde oetindelek de haaf finaal. Sommege meinde tot de gloriedaog vaan 't Ingels voetbal noe trök waore, aandere weze trop tot 't team veural gelök had gehad en bij tegestanders vaan formaot niks leet zien. Op 't EK vaan 2021 haolde Ingeland zelfs de finaal. Väöl lui rekende drop tot Ingeland 't toernooj zouw winne (football's coming home); oetindelek woort Ingeland nao penanties door Italië geklop.