Antigua

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

---

Oetzich euver Antigua.

Antigua is 'n eilandj inne Caribische Zieë mit 'n oppervlakdje van 280 km². 't Is 'n óngerdeil van 't landj Antigua en Barbuda en haet zoeaget 68.000 inweuners. De meiste luuj wonen in Saint John's, de grótste stad van 't eilandj en ouch de houfstad van 't landj.

Antigua woort in 1493 óntdèk door Columbus, dae 't eilandj verneumdje nao Santa Maria la Antigua, 'n Maria-aafbeildjing mit gelieknamige kepèl die zich bevindj inne kattedraol van Sevilla.

't Eilandj bleef gooddeils ónbewóndj toet 't in 1632 in bezit woort genómme door Ingelse koloniste. De Ingelse woorte verjaag dore Caribe, meh komen in 1663 trögk. In 1666 woort 't eilandj geplónderdj dore Franse. Bieje Vraeje van Breda woort 't eilandj toegewezen ane Ingelse.

In 1981 woort Antigua same mitte eilenj Barbuda en Redonda ónaafhenkelik van 't Vereinig Keuninkriek óngere naam Antigua en Barbuda.