(Translated by https://www.hiragana.jp/)
Bløf - Wikipedia Naar inhoud springen

Bløf

Van Wikipedia

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Bløf op 'n optrejje in theater De Muzenval in Emmen.

Bløf (gestileerd es BLØF) is 'ne Nederlandse (Ziewse) rockband dee op 't Nederlands zingk. Heer besteit oet Paskal Jakobsen (leadzaank, gitaar), Bas Kennis (tósje, achtergroondzaank), Peter Slager (basgitaar, achtergroondzaank) en Norman Bonink (drums, achtergroondzaank). De tekste koume vaan Slager, de meziek gooddeils vaan Jakobsen.

Historie

[bewirk | brón bewèrke]

Opriechting en begin

[bewirk | brón bewèrke]

De leie vaan Bløf koume oet versjèllende deile vaan de provincie; aon de opriechting in 1992 góng väöl veuraof. Bassis Peter Slager en drummer Henk Tjoonk kóste ziech al oet Gringo's Sweet Revenge, 'ne band oet Zierikzee.[1] Wie de band, intösse umgeduip in Trouble Every Day, 'ne zenger zoch, melde Paskal Jakobsen oet Vlissingen ziech. De band góng noe optrejje en haolde in 1991 get bijval op Anywave, e popfestival in Zierikzee. De band woort evels al gaw weer oontboonde wie Jakobsen 't weer in Vlissingen góng zeuke, bij Wolfclan Sister.[2]

In 't vreugjaor vaan 1992 oontdèkde Slager de meziek vaan The Scene. De combinatie vaan bluesrock mèt hermetische Nederlandstaolege tekste maakde groeten indrök op häöm.[3] Jakobsen had in ziene solotied al 't werk vaan Bram Vermeulen, Maarten van Roozendaal en De Dijk gezoonge.[4] The Scene en De Dijk zouwe vaan groeten invlood zien op 't later Bløf. Slager en Tjoonk riechde 'ne nuie band op um ouch zoe'ne meziek te maken, en charterde daoveur weer Jakobsen. 'ne Leadgitaris, JanPiet Hoogerwerf, verleet de gróp al gaw; Jakobsen bleek ouch op leadgitaar good te klinke. Dee lèste kós oet Vlissingen ouch nog tósjenis Bas Kennis. Jakobsen en Kennis hadde same e coverbandsje mèt de naom Jack & Daniels. Heimèt trejde ze nog tot in 1995 op, umtot dit lucratiever waor es hun serieus werk.[5] In 2015[6] en in 2017[7] zouwe de twie nog ins in dees formule optrejje. Mèt Kennis waor de band compleet.[8]

't Ierste jaor trejde de gróp nog neet op. Zelfs de naom woort neet direk vasgestèld. 't Idee veur de Deense doorgestriepde o in de naom kaom vaan Bas Kennis.[9] Drummer Henk Tjoonk, d'n ajdste en zakelek de mies ervarene naom de zakeleke kant op ziech. Door zien zakeleke kontakte kós de band zienen iersten demo (Laatste ronde) in eige behier opnumme zelfs ietot 'r oets had opgetrejje: in juni 1993.[10] In augustus volgde 't ierste optrejje, op 't festival Mosselrock in Yerseke (gemeinte Reimerswaal). Mie optrejjes volgde datzelfde jaor nog, oonder mie in de Zeeuwse Belofte.[11]

Provinciaol en lendelek succes

[bewirk | brón bewèrke]

In 1994 späölde de band op diverse Ziewse festivals. De later hits "Aan de kust" en "Wat zou je doen" oontstoonte in deen tied.[12] Bløf kós noe zelfs in 't veurprogram vaan De Dijk goon speule.[13] Door dit succes en 't sterk gegreujd rippertoir dörfde de band 't dat jaor aon um 't debuutalbum Naakt onder de hemel op te numme, ouch nog in eige behier. Begin 1995 kaom 't oet; oetindelek woort 't platina.[14]

Veuriers had de band evels veural nog succes in Zieland. In 1996 kriege ze d'n Aonmeujegingspries vaan de provincie.[15] Wel teikende de band noe bij EMI, begós Free Record Shop hunne cd te verkoupe en versjene gooj recensies in OOR en de Volkskrant.[16]

Begin 1997 woort Helder, de twiede plaat, opgenome en oetgebrach, mèt d'n hit "Liefs uit Londen". Door 't contrak bij EMI waor de technische kwaliteit good veuroetgegaange.[17] D'n doorbraak boete Zieland bleef veuriers nog oet, en door intern spanninge kaom de band kortbij zien oplufting.[18] Probleme gaof 't veural mèt Henk Tjoonk, die de bandleie wie kinder zouw behandele en dee zien artistieke kwaliteite 't neet haolde bij de res.[19] Wie Tjoonk kraank woort, woort Chris Götte es drummer bij de band betrokke. Häöm kóste Jakobsen en Kennis nog vaan Jack & Daniels.[20] 't Vertrèk vaan Tjoonk, dee juridisch aon de band verboonde waor, woort in 1998 mèt 'n sjikking aofgekoch.[21] In 't naojaor vaan 1997 kaom de band in contak mèt Frank van der Meijden, ieder manager vaan Doe Maar en Het Goede Doel; heer zouw vaanaof jannewarie 1998 't management vaan Bløf regele.[22]

In 't naojaor vaan 1997 begós EMI ouch ernsteg werk te make vaan lendeleke promotie. Vaan "Liefs uit Londen" woort 'ne single mèt videoclip gemaak, dee in jannewarie 1998 oetkaom.[23] De single sloog breid aon, op zoewel de peblieke es de commerciele radio,[24] en haolde de 13de plaots in d'n Top 40.[25] Ouch woort 'n nui versie vaan "Aan de kust" oetgebrach, die ouch breid aonsloog.[26] De band woort dèks in einen aosem geneump mèt De Kast, Skik en Rowwen Hèze, al zinge ze neet in de streektaol.[26] Helder haolde dat jaor de gouwe status.[27] Ouch trejde de band op mèt 't Zeeuws Orkest, e konzèr boevaan 'n liveplaat versjene is,[28] en trejde ze op bij de vering vaan 350 jaor Vrei vaan Munster in D'n Haag. Heiveur woort 't nommer "Boven" gesjreve[29]

In november 1998 begós Bløf aon 't daarde album Boven.[30] Veur de productie woortde hölp vaan Peter Bauwens en Ronald Vanhuffel, twie Gentse meziekveteraone, ingerope.[31] De opnaomes voonte plaots in de ICP Studio's in Brussel.[32] In 't vreugjaor vaan 1999 deeg Bløf in de Marlboro Flashback Tours de groete hits vaan Doe Maar. 't Succes wat ze daomèt hadde leide tot de reünie en de nui plaat vaan Doe Maar.[33] In september gief de band e konzèr op Spitsbergen, wat 't Guiness Book of Records haolde es noordelekste konzèr oets gegeve.[34]

't Volgend jaor al kaom Bløf mèt 't album Watermakers, mèt 'tzelfde team en in dezelfde studio opgenome wie Boven.[35] In dees jaore naom 't succes groete vörm aon en heet Bløf in gans 't land konzèrs te geve. De drökte woort veural Jakobsen te väöl: ind 2000 kraog 'r 'ne burn-out en mós heer gaas trök numme.[36]

Doed Chris Götte

[bewirk | brón bewèrke]
Norman Bonink, d'n drummer dee de gestorve Chris Götte vervong.

Op 17 miert 2001 veroongelökde in de buurt vaan Nieuw- en Sint Joosland drummer Chris Götte, mèt de motor op weeg vaan Goes nao Middelburg.[37] Zienen doed zörgde veur 'ne sjok in gans Nederland. 't NOS-journaol besteide aondach traon en 't haolde de veurblaajer van diverse gezètte.[38] Zien oetvaart woort gehawwe in de Zeelandhallen in Goes, veur oongeveer doezend lui pebliek en nog väöl mie lui boete, laanks de weeg nao 't kèrkef. Op d'n daag vaan 't aofsjeid späölde op initiatief vaan deejay Edwin Evers alle peblieke en commerciële popzenders tegeliek "Harder dan ik hebben kan".[39]

D'n daag nao Götte zienen doed besloot de band veur door te goon.[40] Kort nao de begraffenis gónge de drei euvergebleve bandleie nao Barcelona. Hei begóste ze al mèt sjrieve; 't leedsje "Barcelona" zouw evels neet op 't volgend album koume meh op 't album daonao (Omarm).[41] Tenao gónge ze fulltime aon 't werk veur e nui album, nog ietot 'ne nuien drummer gevoonde waor. Oetindelek veel later dat jaor de keus op Norman Bonink. Heer kaom oet de band vaan Frank Boeijen; Bløf kós häöm vaan 't festival De Vrienden van Amstel Live.[42] In juni woort nog de live-cd Oog in oog oetgebrach, boevaan de opbrengs nao War Child góng.[43]

Blauwe ruis, 't gedinkalbum veur Götte, woort in e hoes in Dishoek (gemeinte Veere), kortbij Middelburg, opgenome.[44] 't Opnaomeperces woort vasgelag in de documentair Weggaan en weer terugkomen.[45] De locatie meinde wel tot 't opgenome materiaol neet de bèste geluidskwaliteit had.[46] In oktober gaove ze hun ierste konzèr mèt 't nui materiaol en mèt Bonink. Locatie waor discotheek De Hooizolder in Westkapelle (gemeinte Veere). Bij dat konzèr zien ouch Frank Boeijen en Marco Borsato presint.[47]

Aon d'n top in Nederland

[bewirk | brón bewèrke]

Begin jaore nul stoont Bløf aon d'n absoluten top in Nederland. In 2001 naom de band de positie vaan mies gedrejde Nederlandsen act euver vaan Marco Borsato; 'n positie die ze vief jaor laank zouwe hawwe.[48] In dezen tied kraoge ze ouch diverse prestigieus prieze. Zoe woort hun begin 2003 de Gouwe Harp oetgereik, nog mer veer jaor naotot ze de Zèlvere hadde gekrege ('nen aonmeujegingspries, in tegestèlling tot de Gouwe Harp, die mie 'nen oeuvrepries veur gearriveerde is).[49] Kort nao dee pries oontvóng de band twie Edisons, in 2004 ouch de Poppries vaan Conamus.[50]

Intösse waor de band ouch bezeg mèt e nui album, Omarm. Dit album versjeen in juni 2003 en waor 't ierste wat de band gans zelf produceerde.[51] Dit is album contrasteert door zie löchteg karakter sterk mèt ziene veurgenger. Op dit album kristalliseerde de stijl vaan Bløf ziech oet; tekstueel is 't de liech erotische leefde e belaankriek thema.[52]

Allewel tot de band mèt ziene Nederlandstaolege zaank gein carrière in 't boeteland kós make, hadde ze wel de wuns um mèt boetelandse artieste op te trejje, en noe en daan ouch boete Nederland en Vlaondere. In fibberwarie 2004 speule ze in Ahoy mèt de Pruus Herbert Grönemeyer.[53] De laankstdorende samewèrking waor die evels mèt Counting Crows. Peter Slager oontdèkde de band al in 1994, later woort gans Bløf fan vaan dees Amerikaanse gróp.[54] De twie bands troffe ziech begin 2003 veur 't iers, nao e konzèr vaan de Crows in de Heineken Music Hall.[55] Leadzenger Adam Duritz raakde oonder d'n indrök vaan de muziek en me besloot tot 'nen twietaolege bewèrking vaan 't nommer "Holiday in Spain". Dit woort d'n ierste nommereinhit veur Bløf. Ouch gaove de bands same e konzèr in Ahoy.[56] De band tösse de twie bands zouw laankdoreg weure, en neve artistiek-zakelek ouch vrundsjappelek.[57]

Nao dit oetstepke begós de band aon e zier ambitieus perjek: ze wouwe 'n album make mèt artieste vaan euver de ganse wereld, veur eder leedsje 'n aander land. Inspiratie kaom oonder mie vaan Graceland vaan Paul Simon, zoewie Prophecy vaan Nitin Sawhney en Unity through diversity vaan One Giant Leap.[58] Werknaom veur dit projek waor Het eind van het begin (oetindelek woort de naom veur 'ne verzaomel-cd).[59] 't Ieder aonbod vaan Foster Parents Plan um in Kenia te speule pasde good in dit plan; de ierste reis góng nao Kenia en Nigeria, in welke land ze same späölde mèt Femi Kuti.[60] In Afrika woort ouch de definitieve naom veur 't projek gevoonde: Umoja, Swahili veur 'saamhuregheid'.[61] Wijer reize brachte de band nao Turkije, Cuba (mèt Eliades Ochoa vaan de Buena Vista Social Club), Portugal (mèt Christina Branco), Argentinië, India, Bhutan, Japan, Australië, Ierland en Rusland.[62] De prizzentatie vaan 't album weurt gekoppeld aon konzèrs in 't Nui Luxortheater in Rotterdam, boebij (bekaans) alle gasmuzikante live koume speule. De ganse plaat heet mie es 'n mieljoen euro gekos.[63] Vaan Umoja weure mie es e kwart mieljoen plate verkoch.[64]

In 2006 begós Bløf ouch aon Concert at Sea. Geïnspireerd door ieder optrejjes op of aon 't water, beveurbeeld veur de Vlissinge Boulevard in 2000 of konzèrs in Renesse (gemeinte Schouwen-Duiveland), vatde me 't idee op um op de Brouwersdam te speule, tösse Schouwen-Duiveland en Goeree-Overflakkee, kortbij de grens mèt Zuid-Holland.[65] 't Optrejje woort oetgebreid tot e gans festival, boe-op diverse Nederlandse mèt e middle of the road-rippertoir späölde: neve Bløf zelf oonder mie Ilse DeLange en Raccoon. Oondaanks groete logistieke probleme (de locatie waor neet veur n'importe welk evenemint gemaak) woort 't e succes. Hei-op besloot me Concert at Sea jaorleks te organisere.[66]

Nao dees perjekte deeg de band 't eve rösteger. In 2007 haolde ze wel 'ne nommereinhit mèt "Alles is liefde", veur de gelieknaomege film vaan Kim van Kooten.[67] In 2007 en 2008 dege ze ouch twie sjriefsessies, ein in de Ardenne, ein in Ierland.[68] 't Materiaol woort verdeild euver twie albums Oktober en April, die in respectievelek 't naojaor vaan 2008 en vreugjaor vaan 2009 oetkaome. Op de albums stoon veural väöl röstege leedsjes. Nao Oktober stopde Frank van der Meijden es manager.[69]

Jaore tien

[bewirk | brón bewèrke]

In de jaore 2010 góng de band door mèt 't make vaan nuie meziek en 't optrejje in 't clubcircuit. 't Imago vaan de band had evels ummer mie te lije oonder de opinie vaan popleefhöbbers. Veur 't album Alles blijft anders, wat in de Hansa Tonstudio in Berlijn woort opgenome[70] en boeveur woort samegewèrk mèt popfotograaf Anton Corbijn,[71] stoont oonder mie 'n optrejje in de Groningse club Vera gepland. De website vaan die club spraok ziech negatief euver de meziek vaan Bløf oet, boenao 'n klein rel waor gebore. Oetindelek kaom de band toch in de Vera speule.[72] Ouch besloot meziekblaad OOR gein aondach mie aon 't album te besteie.[73] De opvolgers In het midden van alles[74] en Aan[75] kraoge later wel recensies in 't blaad.

Veur In het midden van alles, wat in 2014 oetkaom, reep Bløf veur 't iers sinds jaore weer de hölp vaan 'ne producer in, en wel JB Meijers, 'ne maan mèt groete ervaoring zoewel es muzikant es producent.[74] Daonao begóste twie bandleie aon soloprojekte. Jakobsen, dee in 2007 al euver 'n soloplaat dach,[76] deeg in de ierste hèlf vaan 2016 'nen theatertour, Stedentrip.[77] Heer heet aongekundeg dit dèkser te wèlle doen.[78] Peter Slager prizzenteerde in november vaan datzelfde jaor 'n solo-album, Slik, mèt folk- en countryleedsjes in zien eige Ziews dialek.[79] De prizzentatie waor in 't Middelburgs poppodium De Spot, mèt Broeder Dieleman.[80] Toch góng de band es collectief gewoen door; in 2017 versjeen mèt Aan 't twelfde studio-album.[81] De single "Zoutelande", mèt de Vlaomse zengeres Geike Arnaert (ex-Hooverphonic), kaom zoewel in Nederland es in Vlaondere op nommer ein.[82]

Invlood

[bewirk | brón bewèrke]

Neve The Scene, De Dijk en Counting Crows heet de band ouch The Wallflowers, Luka Bloom, Elvis Costello,[83] Coldplay, U2,[84] Jeff Buckley,[51] Damien Rice, The Frames, Kings of Convenience,[85] Snow Patrol en Kings of Leon[86] op eineg memint es invlood geneump. Neet euver alle bands waore de veer oonverdeild positief: zoe spraok Jakobsen kritiek oet op de tekste vaan Coldplay.[87] Veur e deil vaan de tekste kaom de inspiratie vaan diechters wie J. Slauerhoff en Rutger Kopland.[88]

Discografie

[bewirk | brón bewèrke]

Albums

[bewirk | brón bewèrke]

Mèt noteringe in d'n Album Top 100.[89]

Album Datum vaan
versjijne		 Datum vaan
binnekoms		 Hoegste
positie		 Aontal
weke		 Opmerkinge
Studio-albums
Laatste ronde juni 1993 n.v.t. democassèt
Naakt onder de hemel begin 1995 19-9-1998 59 4 platina
Helder begin 1997 28-2-1998 2 125 2 × platina
Boven begin 1999 10-4-1999 2 80 2 × platina
Watermakers 2000 7-10-2000 1 (2 w.) 36 platina
Blauwe ruis jannewarie 2002 19-1-2002 1 (4 w.) 90 2 × platina
Omarm 2003 14-6-2003 1 (2 w.) 77 platina; ierste Bløf-album in sacd
Umoja 2006 11-3-2006 1 (4 w.) 53 2 × platina
Oktober 1-10-2008 11-10-2008 1 48 platina
April 3-4-2009 11-4-2009 1 (2 w.) 35 goud
Alles blijft anders 25-2-2011 4-3-2011 1 56 platina
In het midden van alles 2014 3-5-2014 1 (2 w.) 37 platina
Aan 2017 27-5-2017 2 20
Livealbums
XXL 1998 5-12-1998 69 4 mèt 't Zeeuws Orkest
Live 2004 2004 19-6-2004 16 18
Een manier om thuis te komen 2007 8-9-2007 2 30 Umoja live. Soundtrack bij de film mèt dezelfde naom.
Verzaomelere
Het eind van het begin ind 2004 4-12-2004 2 71 platina
Platinum 2007 7-4-2007 2 42
Hier - Het beste van 20 jaar Bløf 26-10-2012 3-11-2012 1 30

Singles

[bewirk | brón bewèrke]

Mèt noteringe in de Nederlandsen Top 40.[89]

Single Datum vaan
binnekoms		 Hoegste
positie		 Aontal
weke		 Opmerkinge
"Liefs uit Londen" 28-2-1998 13 11
"Aan de kust" 27-6-1998 27 11
"Wat zou je doen" 26-9-1998 5 15
"Harder dan ik hebben kan" 20-3-1999 11 12
"Niets dan dit" 12-6-1999 tip8 n.v.t. Nommer 62 in de Single Top 100
"Zaterdag" 18-9-1999 tip15 n.v.t. Nommer 60 in de Single Top 100
"Een dag op de grens" 18-12-1999 tip5 n.v.t. Nommer 70 in de Single Top 100
"Dansen aan zee" 20-4-2000 9 12 alarmsjief
"Hier" 26-8-2000 15 10 alarmsjief
"Ze is er niet" 27-1-2001 33 2
"Dichterbij dan ooit" 10-11-2001 12 10 alarmsjief
"Blauwe ruis" 20-3-2002 36 3
"Mooi dag" 25-5-2002 17 14
"Meer van jou" 26-10-2002 tip3 n.v.t. Nommer 37 in de Single Top 100
"Omarm" 17-5-2003 8 11
"Misschien niet de eeuwigheid" 30-8-2003 39 2
"Barcelona" 8-11-2003 tip7 n.v.t. Mèt Carel Kraayenhof; Nommer 61 in de Single Top 100
"Hart tegen hart" 14-2-2004 32 5
"Holiday in Spain" 5-6-2004 1 (5 w.) 20 Mèt Counting Crows; ouch nommer 1 in de Single Top 100; alarmsjief.
"Opstand" 20-11-2004 13 8 alarmsjief
"Dat wij dat zijn" 12-3-2005 25 4
"Aanzoek zonder ringen" 28-1-2006 2 16 Mèt Kodo; nommer 1 in de Single Top 100; alarmsjief
"Hemingway" 13-5-2006 8 11 Mèt Eliades Ochoa; alarmsjief
"Mens" 26-8-2006 10 12 Mèt Omar Faruk Tekbilek; alarmsjief
"Een manier om thuis te komen / Regen" 25-11-2006 5 8 Mèt Jigme Drukpa; alarmsjief
"Donker hart" 28-7-2007 8 13 alarmsjief
"Alles is liefde" 29-9-2007 2 20 Nommer 1 in de Single Top 100; alarmsjief
"Oktober" 20-9-2008 7 11 Nommer 1 in de Single Top 100
"Vallende engel" 13-12-2008 28 5
"Vandaag" 21-3-2009 7 10 alarmsjief
"Midzomernacht" 4-7-2009 22 5
"De storm (Geef niet op)" 3-10-2009 16 6
"Wijd open" 25-12-2010 29 3 Veur Serious Request 2010
"Beter" 12-2-2011 13 9
"Hou vol hou vast" 7-5-2011 25 10
"Was je maar hier" 3-9-2011 23 9
"Meer kan het niet zijn" 3-12-2011 30 10 Mèt Sabrina Starke
"Later als ik groot ben" 19-5-2012 25 6 alarmsjief
"Zo stil" 20-10-2012 17 12
"Mannenharten" 19-10-2013 10 14 Mèt Nielson; alarmsjief
"Spijt heb je morgen maar" 3-4-2014 35 3
"Open je ogen" 14-6-2014 tip2 n.v.t. ep; mèt Ilse DeLange; nommer 60 in de Single Top 100
"Wereld van verschil" 1-4-2017 tip1 n.v.t. Mèt Typhoon
"Zoutelande" 25-11-2017 1 (4 w.) 14 Nommer 1 in d'n Ultratop 50

Dvd's

[bewirk | brón bewèrke]

Mèt noteringe in d'n DVD Top 30.[89]

Dvd Datum vaan
binnekoms		 Hoegste
positie		 Aontal
weke		 Opmerkinge
Tussen nacht en morgen 14-12-2002 5 70 mèt 't Metropole Orkest
Live 2004 26-6-2004 1 (6 w.) 48 Zuug ouch bove oonder Albums
Tussen schemer en avond 18-6-2005 1 (2 w.) 28 mèt 't Metropole Orkest
De beste clips & documentaires 21-4-2007 11 5
Een manier om thuis te komen 8-12-2007 3 28 Umoja live, zuug ouch bove oonder Albums

Bronne

[bewirk | brón bewèrke]
  • Ernst Jan Rozendaal, Hier. 20 jaar Bløf. Amsterdam, Uitgeverij Carrera, 2012.

Rifferenties

[bewirk | brón bewèrke]
  1. ↑ Rozendaal 2012: pp. 14-6
  2. ↑ Rozendaal 2012: pp. 17-20
  3. ↑ Rozendaal 2012: p. 20
  4. ↑ Rozendaal 2012: p. 18
  5. ↑ Rozendaal 2012: pp. 61-3
  6. ↑ Back at Sea - Jack & Daniels
  7. ↑ Concert at SEA - Jack & Daniels
  8. ↑ Rozendaal 2012: pp. 21-5
  9. ↑ Rozendaal 2012: p. 29
  10. ↑ Rozendaal 2012: p. 32
  11. ↑ Rozendaal 2012: p-5. 33
  12. ↑ Rozendaal 2012: pp. 38-41
  13. ↑ Rozendaal 2012: pp. 41-2
  14. ↑ Rozendaal 2012: pp. 45 vv.
  15. ↑ Rozendaal 2012: p. 51
  16. ↑ Rozendaal 2012: p. 53-5
  17. ↑ Rozendaal 2012: pp. 66 vv.
  18. ↑ Rozendaal 2012: p. 71
  19. ↑ Rozendaal 2012: pp. 73-5
  20. ↑ Rozendaal (2012): p. 76
  21. ↑ Rozendaal (2012): pp. 77 vv.
  22. ↑ Rozendaal 2012: pp. 87-92
  23. ↑ Rozendaal 2012: pp. 95 vv.
  24. ↑ Rozendaal 2012: pp. 100-2
  25. ↑ Johan van Slooten, Top 40 hitdossier 1965-2005. Haarlem, J.H. Gottmer, 2005: p. 38
  26. ↑ 26,0 26,1 Rozendaal 2012: pp. 102-3
  27. ↑ Rozendaal 2012: p. 106
  28. ↑ Rozendaal 2012: pp. 106-10
  29. ↑ Rozendaal 2012: p. 111
  30. ↑ Rozendaal 2012: pp. 113-4
  31. ↑ Rozendaal 2012: pp. 114-7
  32. ↑ Rozendaal 2012: pp. 117-21
  33. ↑ Rozendaal 2012: pp. 123-5
  34. ↑ Rozendaal 2012: pp. 130-4
  35. ↑ Rozendaal 2012: pp. 144 vv.
  36. ↑ Rozendaal 2012: pp. 151-3
  37. ↑ Rozendaal 2012: pp. 155 vv.
  38. ↑ Rozendaal 2012: p. 161
  39. ↑ Rozendaal 2012: pp. 162-5
  40. ↑ Rozendaal 2012: p. 167
  41. ↑ Rozendaal 2012: pp. 168-70
  42. ↑ Rozendaal 2012: p. 172
  43. ↑ Rozendaal 2012: pp. 177-8
  44. ↑ Rozendaal 2012: p. 181
  45. ↑ Rozendaal 2012: p. 183
  46. ↑ Rozendaal 2012: p. 184
  47. ↑ Rozendaal 2012: p. 195
  48. ↑ Rizendaal 2012: p. 197
  49. ↑ Rozendaal 2012: pp. 199-202
  50. ↑ Rozendaal 2012: pp. 202-3
  51. ↑ 51,0 51,1 Rozendaal 2012: p. 204
  52. ↑ Rozendaal 2012: pp. 204-9
  53. ↑ Rozendaal 2012: pp. 209-10
  54. ↑ Rozendaal 2012: pp. 67-9; op. cit., pp. 213-4
  55. ↑ Rozendaal 2012: p. 215
  56. ↑ Rozendaal 2012: pp. 215-21
  57. ↑ Rozendaal 2012: pp. 222-5
  58. ↑ Rozendaal 2012: p. 229
  59. ↑ Rozendaal 2012: p. 230
  60. ↑ Rozendaal 2012: pp. 231 vv.
  61. ↑ Rozendaal 2012: p. 241
  62. ↑ Rozendaal 2012: 244-67
  63. ↑ Rozendaal 2012: p. 268-9
  64. ↑ Rozendaal 2012: p. 272
  65. ↑ Rozendaal 2012: pp. 287-90
  66. ↑ Rozendaal 2012: p. 290
  67. ↑ Rozendaal 2012: p. 276
  68. ↑ Rozendaal 2012: pp. 274-7, 278-79
  69. ↑ Rozendaal 2012: pp. 281 vv.
  70. ↑ Rozendaal 2012: pp. 301-3
  71. ↑ Rozendaal 2012: p. 304
  72. ↑ Rozendaal 2012: pp. 306, 308
  73. ↑ Rozendaal 2012: 307
  74. ↑ 74,0 74,1 OOR, jaorgaank 2014, nommer 5: p. 73
  75. ↑ OOR, jaorgaank 2017, nommer 5: p. 71
  76. ↑ Rozendaal 2012: p. 274
  77. ↑ OOR, jaorgaank 2016, nommer 2: p. 67
  78. ↑ Nu.nl - Nu.nl - Zanger Paskal Jakobsen wil weer solo gaan
  79. ↑ Peter Slager.com - Slik
  80. ↑ 3 voor 12 Zeeland - Peter Slager maakt pop in Zeeuws dialect sexy!
  81. ↑ Nu.nl - Bløf omarmt Spotify en muzikale verandering op AAN
  82. ↑ De Standaard online - Kustburgemeester blij met hit over zijn gemeente: ‘Gedroomde reclame’
  83. ↑ Rozendaal 2012: p. 121
  84. ↑ Rozendaal 2012: pp. 192-3
  85. ↑ Rozendaal 2012: p. 275
  86. ↑ Rozendaal 2012: p. 303
  87. ↑ Volkskrant - Paskal Jakobsen (BLØF): 'Coldplay heeft alleen maar kutteksten'
  88. ↑ Rozendaal 2012: p. 205
  89. ↑ 89,0 89,1 89,2 Alles volgens dutchcharts.nl.
[bewirk | brón bewèrke]
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Bløf&oldid=456333"