Bastia (Arbenga)
Bastia frasiùn geugrafica | |
---|---|
U burgu da Bastìa | |
Localizaçión | |
Stâto | Itàlia |
Región | Liguria |
Provìnsa | Savuna |
Comùn | Arbenga |
Teritöio | |
Coordinæ: | 44°03′27.96″N 8°10′19.36″E |
Altitùdine | 25 m s.l.m. |
Abitanti | 693 |
Âtre informaçioìn | |
CAP | 17031 |
Prefìsso | 0182 |
Fûzo oràrio | UTC+1 |
Nomme abitanti | bastiöi au scingulàre bastiö |
Sànto patrón | A Nunsià e San Benardu |
Giórno festîvo | 25 marsu e 20 aùstu |
Cartògrafîa | |
Bastìa a l'è 'na frasiun d'Arbenga, in Ligü(r)ia, de 693 abitanti.
Geugrafîa
In ta pruvinsa de Savuna e in te l'entrutèra d'Arbenga, Bastìa a se tröva in ta val du s-ciümme Aròscia, pôcu ciü a munte da cunfluènsa cun u Néva. A l'è scitüâ a 25 mêtri in sciu livèllu du mâ, a 5 chilòmmetri dau sentru sitadìn.
Regiùi
Cumme e âtre frasiui arbenganesi ascì quella da Bastia a l'è divîza fra ciü regiùi, cumme i Massà(r)i (da San Steva in sciü, rivandu dau Burgu), Massaretti (da San Steva in zü), Ènnexi, Fieré e Berunài(r)e.
Stòia
A fundasiun du burgu da Bastìa a l'è avegnüa sutta u duminiu fu libe(r)u cumün de Arbenga, fra i seculi XIII e XIV, difatti u munisipiu arbenganese u dexideâva rinfursâ u proppiu duminiu in sce l'entrutèra, pé evitâ l'intruxùn inta ciàna di marchesi de Clavesana, a l'epuca forte du duminiu in sce Utuê.
Nascian cuscì ina séie de Vìlle növe, dunde l'éa cumpresa ascì Valliranum, numme latìn che u va a indicâ a Bastia de ancöi. Gh'è da ricurda peò che u nucleu ciü véiu u l'è da truvà inta lucalitài da gêxa de San Steva de Massà(r)u, zà abitau prubabilmente düante l'epuca di rumài.
Prinsipalmente da chi i abitanti i se spusteàn in grùppu pé fundà u burgu növu, tantu che l'antigu insediamentu u vegne abandunàu a partì dau XVI seculu, faxendu scì che i sacramenti da parocchia vegnan spustài inta gêxa da Santiscima Nunsiâ, a partì dau 1518.[1]
Posti de Interesse
Architetüe religiuse
- Gêxa paruchiàle da Santìscima Nunsiâ, a l'è scitüâ intu burgu da frasiun. A l'è stâ custruîa a partì da-u 1623, ma zà da-u 1518 i abitànti de Bastìa sernen a növa gêxa in sustitusiùn de quella de San Steva.
- U(r)atòiu da Santa Cruxe, in fàccia a-a gêxa, a l'è a sêde da lucale cunfraternita.
- Gêxa de San Steva de Massà(r)u, scitüâ in scia stràdda pé Sènexi (Cixan), a l'è stâ mensciunâ pé a primma vòtta 1271, l'edifissiu u se prezènta de stile rumanicu, cun ancù a strutüa uriginàia du Duxèntu, tranne che pé quarche mufifica di periudi sucescîvi. A-u sò internu u cunserva ina sé(r)ie de afréschi datài fra u 1383 e i inissi du seculu XV. Ascì doppu u trasfe(r)imèntu da cumünitài paruchiàle de Bastìa inta növa gêxa da Nunsiâ a l'è restâ cunsacrâ, cun l'obbligu de selebrâ e mésse da Pàsqua, da Pentecoste e a-i 26 de dixembre, dì de San Steva.[2]
- Capella da Madonna du Carmine, inta cuntrâ di Pissu, a l'è stâ edificâ segundu a vu(r)untài du Steva di Pissu ai 27 d'avrì du 1641. Au dì d'ancöi a l'è avèrta au cültu, e se ghe tegnen e selebrasiui da Vèrgine, de San Bertumê, Santa Lusia e au dì di Mòrti. Sturicamente se regorda de cumme a capella a sécce stâ ascì duve(r)â cumme scöa pe i matetti du paìse, intu periudu du dòppu-guèra.
- Capella de San Benardu, culucâ in scia parte ciü âta du burgu, ch'a l'è ascì a ciü veja.
Feste e fêe
- U 25 de marsu: Festa da Santiscima Nunsiâ
- U 16 de lüiu: Festa da Madonna du Carmine
- U 20 d'austu: Festa de San Benardu
- U 5 de setémbre: Festa da Madonna Adulu(r)â
- Ürtima fin da setemàna d'austu: Sagra du burgu
Âtre frasiui d'Arbenga
Nòtte
- ↑ (IT) A Bastia a gêxa mai scurdâ, in sce liguriaedintorni.it. URL consultòu o 14 novénbre 2021.
- ↑ (IT) Bastia, a gêxa de San Steva, in sce museionline.info. URL consultòu o 5 frevâ 2022.
Atri prugètti
- Wikimedia Commons a contêgne di files in sce Bastia