Lavanila (maniry)
![](https://upload.wikimedia.org/wikipedia/commons/thumb/2/2e/Vanilla_plantation_in_wood_dsc00190.jpg/220px-Vanilla_plantation_in_wood_dsc00190.jpg)
Ny lavanila na vanila dia zavamaniry mandady, karazana vahy ôrkidea mandady amin' ny tohana na zavamaniry matanjaka kokoa noho izy, izay manana taho miendrika varingarina. Lehibe sady be nofo ny voniny nefa matroka. Amin’ ny faritra manana toetanim-jana-pehin-tany no anirian’ ny vanila. Ilay karazana atao amin' ny anarana ara-tsiansa hoe Vanilla planifolia no tena fantatry ny olona noho izy ahazoana ny voany manitra.
Karazana lavanila
[hanova | hanova ny fango]Maro karazana (zato mahery) ny lavanila nefa ilay karazana manana ravina miloko manopy maitso, atao amin' ny anarana ara-tsiansa hoe Vanilla planifolia, no mamokatra ilay voa ampiasaina hahamanitra ny sakafo. Ny sasany misy ravina fa ny sasany tsy misy na tsy ampy ravina.
Faritra ambolena vanila
[hanova | hanova ny fango]![](https://upload.wikimedia.org/wikipedia/commons/thumb/6/6f/Map_Vanilla.png/299px-Map_Vanilla.png)
Amin’ ny faritra manana toetanim-jana-pehin-tany no anirian’ ny vanila. Vanilla planifolia ny anarany ara-tsiansa. Avy any Amerika Afovoany ny lavanila mamoa manitra, nefa ny firenena tena mamokatra azy dia i Madagasikara sy ireo nosy manodidina toa an’ i Kômôro sy La Réunion ary i Seisely. Mbola mamboly vanila ny olona any Meksika ankehitriny.
Fikarakarana ny vonin-davanila
[hanova | hanova ny fango]Ny fanisiana vovo-bony ny vavim-bony dia tsy mandeha ho azy fa mila an’ ilay bibikely izay tsy hita raha tsy any Amerika, ka noho izany dia tsy maintsy tanana no manatanteraka izany any amin’ ny tany tsy misy an’ io bibikely io.
Fikarakarana ny voan-davanila
[hanova | hanova ny fango]Ny voan’ ny lavanila izay mahatratra 15 sm hatramin’ ny 23 sm dia otazana mbola maitso avy eo hamainina mandra-pahamaintiny. Ny fanahazana no ahafahan’ ny zava-manitra ao anatiny hivoaka ka ho heno.