(Translated by https://www.hiragana.jp/)
Urang Ocu - Wikipedia baso Minang Lompat ke isi

Urang Ocu

Wikipedia Minangkabau - Lubuak aka tapian ilimu
Lokasi asa urang Ocu talatak di Kabupaten Kampar, Riau.

Urang Ocu atau urang Kampar (nan dalam bahaso Kampar disabuik ughang Ocu) iolah etnik nan masih sarumpun jo Minangkabau nan barasa dari Kabupaten Kampar, Provinsi Riau.[1] Panduduak asalinyo mangecek dalam bahaso Kampar (nan acok disabuik bahaso Ocu) nan marupokan salah satu dialek dalam bahaso Melayu nan mirip jo bahaso nan dipakai di Rokan Hulu & Kuantan Singingi .[2] Sacaro etnis, sijarah, adaik, jo budayo, inyo dakek bana jo Minangkabau,[3] khususnyo jo masyarakaik di Kabupaten Lima Puluh Kota. Inggo kini masih ado kontroversi soal pangalompokkan urang Kampar sabagai etnik surang atau tamasuak dalam Minangkabau jo Malayu Riau.[4]

Masyarakaik Kampar maanuik sistem adaik nan dicirikan jo sistem katurunan malalui jalua padusi atau matrilineal,[5] jo budayonyo nan amaik kuek diwarnai ajaran agamo Islam. Prinsip adaik Kampar bak cando adaik Minang pado umumnyo tatuang dalam panyatoan Adaik basandi syarak, syarak basandi Kitabullah.

Di Riau, urang Kampar dikenal sabagai suku padagang jo parantau. Inyo dapek ditamukan di sabagian gadang daerah Riau, sarupo Siak, Bengkalis, Ujung Batu, Pelalawan, Selat Panjang dll. Salain itu urang Kampar banyak bamukim di Malaysia misalnyo di Kuantan (Pahang), Sabak Bernam, jo Taluak Intan. Bahkan manjadi namo daerah jo sungai di Malaysia nan dek karano banyak urang Kampar nan dulu manggaleh di sapanjang sungai tasabuik.

Adat jo budayo

[suntiang | suntiang sumber]

Adat

[suntiang | suntiang sumber]
Pakaian adat urang Ocu nan dipakai dek finalis Bujang Dara Kabupaten Kampar 2021

Adat Kampar dijalankan manuruik prinsip Tungku Tigo Sajorangan atau Tigo Tali Sapilin. Mukasuiknyo dalam manjalankan kapamimpinan adat di masyarakaik malibaikkan tigo unsur, nan tadiri ateh:[6]

  1. Pangulu atau niniak mamak
  2. Alim ulama
  3. Codiok condokio

Wilayah adat Kampar disabuik jo Andiko nan 44 Kampar nan marupokan pasakutuan 44 pucuok andiko nan satiok pucuok mamimpin ciek atau labiah nagari. Daerah nan tamasuak dalam Andiko nan 44 antaro lain:[6]

  1. XIII Koto Kampar, Rumpun Muaro Takus
    • Muaro Takus
    • Tanjung
    • Gunuang Malelo
    • Siberuang
    • Tabing
    • Gunuong Bungsu
    • Koto Tuo
    • Pongkai
    • III Koto
    • Tanjuang Alai
    • Muaro Maek
    • Pulau Gadang
    • VIII Koto Satangkai
  2. V Koto
    • Bangkinang
    • Kuok
    • Aia Tirih (Ayu Tighih)
    • Kampar
    • Tambang
  3. V Koto Rokan
    • Rokan IV Koto
    • Tambusai
    • Rambah
    • Kapanuhan
    • Kunto Darussalam
  4. Nagari Tapung IV Bandaro
    • Sinama Niniok
    • Ujuong Batu
    • Kasikan
    • Aliantan
  5. Nagari Kampar Kanan jo Ilia
    • Buluah Nipih
  6. Nagari Kampar Kiri V Khalifah
    • Gunuong Sahilan
    • Kuntu
    • Batu Sanggan
    • Ludai
    • Ujuong Bukik
  7. Singingi/Kampar Kuantan (Sidundun)
  8. VI Koto Bungo Satangkai (Kini Kecamatan Pangkalan Koto Baru, Lima Puluh Kota, Sumatera Barat)
    • Pangkalan Koto Baru
    • Tanjuang Pauah
    • Tanjuang Balik
    • Koto Alam
    • Gunuang Malintang
    • Lubuak Alai
  9. Kapur IX (Kini Kecamatan Kapur IX, Lima Puluh Kota, Sumatera Barat)
    • Muaro Peiti
    • Sialang
    • Koto Tuo Ateh
    • Muaro Lolo

Bahaso

[suntiang | suntiang sumber]

Bahaso nan dipakai dek urang Kampar iyolah bahaso Ocu atau bahaso Kampar. Bahaso Ocu marupokan salah satu dialek dalam bahaso Minang, nan punyo banyak pasamoan jo dialek Limopuluah Koto - Payokumbuah. Bahaso iko balainan logat jo dialek bahaso Minang lainnyo nan dipakai dek masyarakaik Luhak Agam, Luhak Tanah Data, maupun kawasan pasisir Minangkabau lainnyo.[2] Bahaso Ocu ado kamiripan pulo jo dialek Kuantan jo Rokan nan basabalahan wilayah jo Kampar.

Bahaso Ocu marupokan hasia akulturasi bahaso antaro bahaso Minangkabau jo bahaso Melayu.

Kasenian

[suntiang | suntiang sumber]

Alaik musik nan biaso dimainkan urang Kampar iyolah Talempong (nan disabuik Calempong) jo Aguang (nan disabuik Oguong).

Replika Rumah Lontiok di TMII, Jakarta.

Salah satu lagu daerah urang Kampar nan tanamo bajudul Kutang Baghendo. Lagu ko barisi tantang nasihaik dari mandeh kapado anak nan sadang batimang-timang. Lagu ko populer pulo di Sumatra Barat jo lirik nan alah disesuaikan dialeknyo.

Rumah adaik

[suntiang | suntiang sumber]

Rumah Lancang atau rumah Lontiok adolah rumah adaik urang Kampar. Lontiok atau Lontik dalam dialek standar bararti lantiak. Hal iko dek karano bantuak atok nan malangkuang lantiak. Rumah Lontiok marupokan rumah pangguang jo bafungsi sabagai rumah adaik jo tampek tingga. Dibangun dalam ciek prosesi panjang nan malibaikan masyarakaik sakitar.

Bantuak rumah Lontiol barasa dari bantuak kapa, hal iko tacamin dari sebutan pado bagian-bagian rumah tasabuik sarupo: bawah, tangah, ujuang, pangka, sarato turun, jo naiak. Dindiang muko jo lakang dibuek miriang kalua jo kaki dindiang sarato tutuik dinding dibuek malangkuang sainggo bantuaknyo manyarupoi sabuah kapa nan dilatakan di ateh tonggak-tonggak.

Rumah Lontiok di Kompleks MTQ, Pekanbaru.

Konstruksi panggung pado rumah ko dipiliah untuak mangindari bahayo binatang lia jo banjir. Kolong rumah biasonyo dipakai untuak kandang taranak, tampek panyimpan sampan, tampek batukang, atau tampek bamain anak, jo gudang kayu untuak pasiapan bulan puaso. Pamakaian janjang pado rumah lontiok ado katantuan adaiknyo. Jumlah anak janjang ganjia bilangannyo jo manyadiokan tampayan aia di dakeknyo untuak mancuci kaki di pangka janjang. Katantuan adaik manyabuikan baso fungsi rumah bapangguang supayo indak nampak isi rumah dari lua rumah dek di dalam rumah indak ado panyakek atau palinduang biliak.

Dindianglua rumah lontiok sadonyo miriang kalua, babeda jo dindiang dalam nan tagak luruih. Balok tumpuan dindiang muko lua malangkuang ka ateh, nan kok disambuang jo ukiran sudut-suduik dindiang, tanampak saroman sampan. Balok tutuik ateh dindiang malangkuang pulo walaupun indak samalangkuang balok tumpuan. Lakuaknyo mangikuti lakuak sisi bawah bidang atok. Kaduo ujuang parabuang diagiah hiasan nan disabuik Sulo Bayuong. Sadangkan Sayok Lalangan marupokan ornamen pado kaampek suduik cucuran atok. Bantuak hiasan baragam, ado nan manyarupoi bulan sabik, taji, dan sabagainyo.

Kontroversi

[suntiang | suntiang sumber]

Inggo kini masih ado kontroversi tantang pangalompokkan urang Kampar sabagai etnik tapisah atau tamasuak dalam Minangkabau jo Malayu Riau.[4]

Ado babarapo pandapaik tantang iko. Pandapaik partamo nan manyatokan baso urang Ocu bagian dari urang Minangkabau umumnyo barasa dari masyarakaik lua Kampar, khususnyo nan dari Ranah Minang (Sumatera Barat). Pandapaik ko muncua dek sarupo sacaro etnis, sijarah, adaik, bahaso, jo budayo jo masyarakaik Minang, khususnyo nan ado di Luhak Limopuluah Koto. Alasan lain nan mandukuang dek pado zaman Karajaan Pagaruyuang, Kampar manjadi kawasan rantau dari Luhak Limopuluah nan banamo Rantau Limo Koto nan tadiri dari Kuok, Salo, Bangkinang, Aia Tirih, jo Rumbio.[7]

Masyarakaik Kampar surang labiah manyukoi pandapaik kaduo jo katigo, iyolah urang Ocu iolah bagian dari Melayu atau sabagai etnik tapisah dari kaduonyo. Pandapaik sabagai suku banso tapisah didasarkan dek paradaban Kampar nan labiah dulu ado sabalun peradaban Minang atau Pagaruyuang, nan ditandoi jo adonyo Candi Muaro Takuih. Urang Kampar mangganggap istilah Minangkabau indak mawakilinyo jo marupokan namo dari sabuah tampek nan ado di dataran tinggi hulu Batang Kampar sarupo istilah Kampar nan marupokan namo sabuah tampek. Dek itulah baginyo urang Kampar jo urang Minang sabagai etnik tapisah dan samo-samo bagian dari Malayu.[8]

Caliak pulo

[suntiang | suntiang sumber]

Rujuakan

[suntiang | suntiang sumber]
  1. ↑ "archive copy". Diarsipkan dari versi asli tanggal 2018-07-03. Diakses tanggal 2018-07-04. 
  2. ↑ a b Said, C., (1986), Struktur bahasa Melayu di Kabupaten Kampar, Pusat Pembinaan dan Pengembangan Bahasa, Departemen Pendidikan dan Kebudayaan.
  3. ↑ Purna, I. M., Sumarsono, Astuti, R., Sunjata, I. W. P., (1997), Sistem pemerintahan tradisional di Riau, Departemen Pendidikan dan Kebudayaan
  4. ↑ a b "archive copy". Diarsipkan dari versi asli tanggal 2018-07-03. Diakses tanggal 2018-07-04. 
  5. ↑ Coral Reefs Information and Training Center, (2002), Pengembangan kelembagaan masyarakat pesisir dan kepulauan: perspektif budaya lokal pesisir dan kepulauan, Coral Reefs Information and Training Center.
  6. ↑ a b Bidang Penelitian/Pengkajian dan Penulisan Lembaga Adat Melayu Riau, 2006. Pemetaan Adat Masyarakat Melayu Riau Kabupaten/Kota Se-Provinsi Riau. Cetakan Pertama. Pekanbaru: Lembaga Adat Melayu Riau.
  7. ↑ "Sejarah Berdirinya Kabupaten Kampar ,Ocu dan Minangkabau". riauterbit.com (dalam bahasa Indonesia). Diakses tanggal 2018-07-03. 
  8. ↑ "Kampar, antara Melayu dan Minangkabau - WACANA". www.wacana.co (dalam bahasa Indonesia). Diakses tanggal 2018-07-03. [pranala nonaktif permanen]
Diambiak dari "https://min.wikipedia.org/w/index.php?title=Urang_Ocu&oldid=2500154"