Roma Antiga

Planta de la cidade de Roma, na Antiguidade.

Roma Antiga ye l nome dado a la ceblizaçon que se zambolbiu a partir de la cidade de Roma, fundada na península Itálica durante l seclo VIII a.C.. Durante ls sous duoze seclos de eisisténcia, la ceblizaçon romana transitou de la monarquia para ua república ouligárquica até se tornar nun basto ampério que dominou la Ouropa Oucidental i al redror de to l mar Mediterráneo atrabeç de la cunquista i assimilaçon cultural. Inda assi, un rol de fatores sócio-políticos causou l sou declínio, i l ampério fui debedido an dous. La metade oucidental, adonde stában ancluídas la Spánia, la Gália i la Eitália, antrou an colapso definitibo ne l seclo V i dou ourige la bários reinos andependientes; la metade ouriental, gobernada a partir de Custantinopla passou a ser referida, puls storiadores modernos, cumo Ampério Bizantino a partir de 476 d.C., data tradecional de la chimpa de Roma i aprobeitada pula storiografie para demarcar l ampeço de la Eidade Média.

La ceblizaçon romana ye tipicamente anserida na chamada Antiguidade Clássica, juntamente cula Grécia Antiga, que mui anspirou la cultura deste pobo. Roma cuntribuiu mui para l zambolbimiento ne l mundo oucidental de bárias árias de studo, cumo l dreito, teorie militar, arte, literatura, arquitetura, lenguística, i la sue stória persiste cumo ua grande anfluéncia mundial, mesmo ne ls dies de hoije.

Stória

thumb

Monarquia

Ber artigo percipal: Reino de Roma

La documentaçon de l período monárquico de Roma ancontrada até hoije ye mui precária, l que torna este período menos coincido que ls períodos posteriores. Bárias dessas anotaçones registran la sucesson de siete reis, ampeçando cun Rómulo an 753 a.C., cumo repersentado nas oubras de Birgílio (Eneida) i Tito Lhíbio (Stória de Roma).

La region de l Lácio fui habitada por bários pobos. Para alhá de l latinos, ls etruscos tubírun un papel amportante na stória de la Monarquia de Roma, yá que bários de l reis tenien ourige etrusca.

L redadeiro rei de Roma tenerie sido Tarquínio, l Soberbo (534 a.C.-509 a.C.) que, an rezon de sou deseio de reduzir la amportança de l Senado na bida política romana, acabou sendo spulso de la cidade. Este fui l fin de la Monarquia.

Durante esse período, l monarca (rei) acumulaba ls poderes eisecutibo, judicial i relegioso, i era auxiliado pul Senado, ó Cunseilho de Anciones, que detenie l poder lhegislatibo i de beto, decidindo aprobar, ó nó, las lheis criadas pul rei.

República

República Romana ye la spresson ousada por cumbençon para definir l Stado romano i sues porbíncias zde l fin de l Reino de Roma an 509 a.C. al stablecimiento de l Ampério Romano an 27 a.C..

Durante l período republicano, Roma transformou-se de simples cidade-stado nun grande ampério, boltando-se ampeçalmente para la cunquista de la península Itálica i más tarde para la Gália i to l mundo de la borda de l Mar Mediterráneo.

Ampério romano

Ampério Romano ye la designaçon outilizada por cumbençon para referir l Stado romano ne ls seclos que se seguiran a la reorganizaçon política efetuada pul purmeiro amperador, César Augusto. Ambora Roma possuísse colónias i porbíncias antes desta data, l stado pré-Augusto ye coincido cumo República Romana.

Ls storiadores fázen la çtinçon antre l Prencipado, período de Augusto a la crise de l terceiro seclo, i l Domínio ó Dominato que se stende de Diocleciano al fin de l Ampério Romano de l Oucidente. Durante l Prencipado (de la palabra latina princeps, que quier dezir purmeiro), la naturaleza outocrática de l regime era belada por designaçones i cunceitos de la sfera republicana, manifestando ls amperadores relutáncia an se assumir cumo poder amperial. Ne l Domínio (palabra culrigen an dominus, senhor), pul cuntrário, estes redadeiros eisibian claramente ls senhales de l sou poder, usando corona, púrpuras i outros ornamientos simbólicos de l sou statuto.

Sociadade

Fórun Romano - epicentro de l zambolbimiento de Roma.

Ls percipales grupos sociales que se custruíran an Roma éran ls patrícios, ls clientes, ls plebius i ls scrabos.

• Patrícios: éran grandes propietários de tierras, ganados i scrabos. Çfrutában de dreitos políticos i podien zampenhar altas funçones públicas ne l eisército, na religion, na justícia ó na admenistraçon. Éran ls cidadanos romanos.

• Clientes: éran homes lhibres que se associában als patrícios, prestando-les dibersos serbícios pessonales an troca de auxílio eiquenómico i proteçon social. Custituían punto de apoio de la chamaçon política i melitar de l patrícios.

• Plebeus: éran homes i mulhieres lhibres que se dedicában al comércio, al artesanato i als trabalhos agrícolas.

• Scrabos: Repersentában ua proiadade, i, assi, l senhor tenie l dreito de castigá-los, de bendé-los ó de alugar sous serbícios.Muitos scrabos tamien éran ebentualmente lhibertados.

Tierra i proiadade na Roma antiga

Grabura que mostra dous romanos fazendo la colheita na Roma Antiga: la agricultura era la atebidade eiquenómica fundamental de la época.

Na Roma antiga, la agricultura era la atebidade eiquenómica fundamental, defrente de outros pobos de la época, que preferian dar maior amportança al comércio i al artesanato. ^{[sin fuontes]}. Mas esso se debe, an parte, a la geografie faborable de la península Itálica, que, al cuntrário de las tierras de la Grécia, por eisemplo, permitie l trabalho agrícola an grande scala.

Alguns specialistas recentes acraditan que Roma se tenga formado a partir dua aldé de agricultores i pastores. Ampeçalmente, a tierra era outilizada de forma quemunitária, cun base an grupos de famílias chamados clanas ó ges. Mas essa situaçon ampeçara a mudar cula spanson de territórios i l crecimiento eiquenómico i populacional. Las famílias más antigas i poderosas, que possuían tierras más férteis, passórun a apropiar-se de tierras que até anton éran públicas.

Nun porcesso de acupaçon de tierras, ls romanos chegórun nua situaçon an que, dun lhado, habie ls grandes lhatifundiários que cuncentrában todos ls poderes políticos de las regiones i, de outro, ls pequeinhos propietários que, sin dreitos de manifestaçon i de repersentaçon, bian-se arruinados pula cuntina perda de sues própias tierras. Esso causou desequilíbrios sociales i, durante bários seclos, cunflitos.

Cultura

La cultura romana fui mui anfluenciada pula cultura griega. Ls romanos adotórun muitos aspetos de la arte, pintura i arquitetura griega.

Ls balneários romanos spalhórun-se pulas grandes cidades. Éran lhocales adonde ls senadores i nembros de la aristocracie romana iban para çcutiren política i ampliar sous relacionamientos pessonales.

La lhéngua romana era l latin, que depuis dun tiempo spalhou-se puls quatro cantos de l ampério, dando ourige, na Eidade Média, al pertués, francés, eitaliano, romeno i espanhol (lénguas neolatinas).

La mitologie romana repersentaba formas de splicaçon de la rialidade que ls romanos nun cunseguian splicar de forma científica. Trata tamien de la ourige de sou pobo i de la cidade que dou ourige al ampério. Antre ls percipales mitos romanos, podemos çtacar l mito de la Fundaçon de Roma, cun Rómulo i Remo i l Rato de las Sabinas.

Religion

Zde ls tiempos de la fundaçon de Roma, habie la fé an muitos diuses. Al lhongo de l seclos, ls romanos assimilórun numerosas anfluéncias relegiosas. Ne l percípio, las dibindades éran cultuadas ne ls lhares i, cula cunsulidaçon de l Stado, ls diuses passórun a ser cultuados publicamente, cun sacerdotes presidindo las cerimónias. Cunquistada la Magna Grécia, ls diuses romanos se cunfundiran culs griegos, als quales fúrun atribuídos nomes lhatinos.

La spanson territorial i l adbento de l Ampério lhebou a la ancorporaçon de cultos ourientales, para alhá daqueles de ourige heilenística. Ls romanos cultuában, por eisemplo, l dius persa Mitra, l que ancluía la fé nun redentor que praticaba l batismo i la quemunhon pul pan i pul bino.

L cristandade ne l Ampério Romano

Na Judeia, ua de las porbíncias romanas ne l Ouriente, façones políticas lhocales se degladiában an fines de l seclo I a.C. Dun lhado, la aristocracie i ls sacerdotes judius aceitában la dominaçon romana, pus ls purmeiros oubtinhan bantaiges comerciales i ls segundos mantinhan l monopólio de la religion. Antre las bárias seitas judaicas que coeisistian na region, stában la de l fariseus, nacionalistas que articulában la rebolta contra ls romanos, i la de l essénios, que pregában la benida de l Messias, un rei poderoso que lhiderarie ls judius rumo a la andependéncia. Nesse clima de agitaçon, durante l gobierno de Otábio, naciu, an Velén, un judiu chamado Jasus.

Poucas fuontes stóricas nó-cristianas mencionan Jasus ó ls purmeiros anhos de l Cristandade. La percipal fuonte la respeito de sue bida son ls Ebangelhos, que relatan l nacimiento i ls purmeiros anhos ne l modesto lhar dun arteson de Nazaré. Hai un período subre l qual praticamente nun hai anformaçones, até que, als trinta anhos, recibe l batismo pulas manos de Juan Batista, nas augas de l Riu Jordan i ampeça la pregaçon de sou eideário. Jasus se apersenta cumo l messias sperado puls judius. Ne l Sermon de la Muntanha, çcrito ne ls ebangelhos atribuídos la Mateus i Lucas, delineou ls percípios básicos de sou pensamiento: para Jasus, la moral, cumo la religion, era eissencialmente andibidual i la birtude nun era social, mas de cuncéncia. Pregaba la eigualdade antre ls homes, l perdon i l amor al próssimo.

Segundo ls Ebangelhos, las outoridades relegiosas judaicas nun aceitórun que aquel home simples, que pregaba als houmildes, podisse ser l rei, l Messias que benerie salbá-los. Cunsiderórun nel un dissidente i l enquadrórun na lhei relegiosa, cundenando-lo a la muorte por crucificaçon, a ser aplicada puls romanos (de l punto de bista de las outoridades romanas, Jasus era un rebelde político). Lhebadas puls sous çcípulos, ls apóstolos, la dibersas partes de l ampério romano, las eideias de Jasus fruitificórun. L apóstolo Paulo, judiu cun cidadanie romana, dou carátener ounibersal a la nuoba religion: segundo el, la mensaige de Jasus, chamado de Cristo (l ungido) por sous seguidores, era dirigida nun solamente als judius, mas a todos ls pobos. Cun Paulo, l Cristandade deixou de ser ua seita de l judaísmo para se tornar ua religion outónoma. Por nun aceitáren la dibindade amperial i por acraditáren que habie ua sola berdade - la de Jasus -, ls crestiano fúrun perseguidos puls romanos.

Por buolta de l anho 70, fúrun scritos ls ebangelhos atribuídos la Mateus i Marcos, an léngua griega. Trinta anhos depuis, publicaba-se l ebangelho atribuído la Juan, i la doutrina de la Santíssima Trindade (Pai, Filho i Sprito Santo) ampeçaba a tomar forma. L cristandade puode, anton, ser anterpretado cumo ua síntese de fés judaicas i persas.

Apegados al monoteísmo, ls crestianos nun jurában l culto debino al amperador, probocando reaçones biolentas. Las perseguiçones ocorrírun an cúrtios períodos, ambora biolentos, a la medida an que l culto debino al amperador, stablecido por Augusto mas formalizado por Domiciano era aplicado nas porbíncias . Muitos fúrun perseguidos, outros morrírun nas arenas, deborados por feras. Al mesmo tiempo, cada beç más pessonas se cumbertian al cristandade, specialmente pobres i scrabos, que se boltában para la Eigreija por acraditáren na promessa de bida eiterna ne l Paraíso.

L poder de l cristandade nun podie más ser eignorado. A partir de l momiento an que cidadanos ricos de l Ampério Romano se cumbertírun a la nuoba religion, la doutrina, que pregaba la eigualdade i la lhiberdade, deixaba de repersentar un peligro social. Als poucos, la Eigreija Católica se anstitucionalizaba i l clero se Ourganizaba, cul aparecimiento de l bispos i presbíteros. L território sob l domínio romano fui debedido an porbíncias eclesiásticas. Ls Patriarcas, bispos de l grandes centros ourbanos - cumo Roma, Custantinopla i Alexandria -, ampliórun sou poder, cuntrolando las porbíncias. L bispado de Roma percurou se subrepor als demales, alegando que l bispo de Roma era l heirdeiro de l apóstolo Pedro, que tenerie recebido de Jasus la ancumbéncia de propagar la fé cristiana antre ls pobos.

An 313, l amperador Custantino fizo publicar l Édito de Milon, que anstituía a toleráncia relegiosa ne l ampério, beneficiando principalmente ls crestianos. Cun esso, recebiu apoio an sue lhuita para se tornar l solo amperador i stinguir la tetrarquia. An 361, assumiu l trono Juliano, l Apóstata, que tentou rerguer l paganismo, dando-le cunsisténcia ético-filosófica i reabrindo ls templos. Trés anhos depuis l amperador morriu i, cul, las tentatibas de retomar la antiga religion romana.

An 391, Teodósio I (379-395) ouficializou l cristandade ne ls territórios romanos i perseguiu ls dissidentes. Apuis de sou reinado, l ampério fui debedido an dues partes. Ls filhos de Teodósio assumiran l poder: Arcádio heirdou l Ampério Romano de l Ouriente, cujo centro político era Custantinopla (antiga Bizáncio, rebatizada an houmenaige al amperador Custantino, lhocalizaba-se adonde hoije ye la cidade turca de Istambul); la Honório coube l Ampério Romano de l Oucidente, cun capital an Roma.

Arte

Al lhongo de sue stória, la arte romana sofriu trés grandes anfluéncias: la etrusca (na técnica), la griega (na decoraçon) i la ouriental (na monumentalidade). Ye quemun se dezir que Roma cunquistara la Grécia militarmente, fura por eilha cunquistada culturalmente. Ne l ampeço de l período amperial, çtacában-se ls romanos que dominában la léngua griega, bestian-se cumo ls griegos i conhecian las amboras subre Atenas i Corinto. An Roma, las casas de la eilite éran decoradas cun státuas i basos griegos, ouriginales ó réplicas. Roma tornara-se "a maior cidade griega de l mundo".

La arte romana zambolbiu-se principalmente a partir de l seclo II a.C. Para ls romanos, la arquitetura era ua arte prática por eiceléncia. Custruíran oubras amportantes, cumo puontes, biadutos, alcadutes, arcos i colunas triunfales, stradas, termas, triatos, anfitriatos i circos. Çtacában-se las técnicas de l arco pleno ó de meia circunferéncia, que permitian la custruçon de bóbedas i cúpulas, i de la coluneta ó cunjunto de colunas. Ambora se balessen de stilos griegos - jónico i coríntio -, ls romanos zambolbírun dous tipos de colunas: la toscano i l cumpósito (ua subreposiçon de l dous stilos griegos mencionados). Zambolbendo nuobas cuncepçones de spácio, ls arquitetos romanos soubiran solucionar porblemas de bentilaçon, eiluminaçon i circulaçon. Outilizórun lhargamente piedras i tijolos bien cozidos para eidificar i argamassas i mármore ne ls rebestimientos.

La arte cristiana primitiba naciu na fase de la perseguiçon, l que probablemiente splica ls poucos eisemplares restantes. Perseguidos i ampedidos de demunstrar sue fé antre ls seclos I i IB, ls crestianos zenhában i pintában simblos nas paredes de las catacumbas.

Angenharie i Arquitetura

La angenharie cebil romana merece un parágrafo a la parte. Para alhá de custruir estradas que lhigában to l ampério, ls romanos eidificórun alcadutes que lhebában auga lhimpa até las cidades i tamien zambolbírun cumplexos sistemas de sgoto para dar bazon a la auga serbida i als dejetos de las casas.

La arquitetura romana sofriu ua einorme anfluéncia de la arquitetura griega, porén, adquiriu alguas caratelísticas própias. Ls romanos, por eisemplo, modificórun la lhenguaige arquitetónica que recebírun de l griegos, ua beç que acrescentórun als stilos heirdados (dórico, jónico i coríntio) dues nuobas formas de custruçon: ls stilos toscano i cumpósito. Las caratelísticas que abrangian ls traços arquitetónicos griegos i romanos fúrun chamadas de Arquitetura Clássica por muitos scritores. Alguns eisemplos caratelísticos deste stilo spandiran-se por to la Ouropa, debido al spansionismo de l Ampério Romano, nomeadamente l alcadute, la basílica, la strada romana, l Domus, l Panteon, l arco de l triunfo, l anfitriato, termas i eidifícios comemoratibos.

La eiboluçon de la arquitetura romana reflete-se fundamentalmente an dous ámbitos percipales: l de las scuolas públicas i l de las particulares. Ne l ámbito de las scuolas públicas, las oubras (templos, basílicas, anfitriatos, etc) apersentában dimensones monumentales i quaije siempre formában un cunglomerado desordenado an torno de l fórun - ó praça pública - de las cidades.

Las oubras particulares, cumo ls palácios ourbanos i las bilas de beraneio de la classe patrícia, se zambolbírun an regiones pribilegiadas de las cidades i an sous alredores, cun ua decoraçon çlumbrante i çtribuídas an torno dun jardin.

La plebe bibia an custruçones de ansulae, mui parecidos cun nuossos atuales eidifícios, cun puortas que dában acesso la sacadas i terraços, mas sin dibisones de ambientes nesses recintos. Sous caratelísticos tetos de teilha de barro cozido inda susisten an pleno seclo XXI.

Stória Militar

Roma fui un stado totalmente militarista cuja stória i l zambolbimiento siempre fúrun mui relacionados a las grandes cunquistas militares, durante ls sous 12 seclos de eisisténcia. Anton, l tema central a ser falado quando se çcute la Stória Melitar de la Roma Antiga ye l sucesso cunseguido puls eisércitos romanos an batailhas campales que garantian sue heigemonia, zde la cunquista de la península Itálica a las batailhas finales contra ls bárbaros.

A maior proba de l sucesso melitar de l Ampério Romano fui sue surprendente spanson territorial, pula qual Roma passou dua simples cidade-stado para un berdadeiro ampério, que abrangie buona parte de la atual Ouropa Oucidental, buona parte de l norte de la África i ua parte de la Ásia. Essas grandes cunquistas militares de l Ampério Romano se dórun pul abanço de la ciéncia melitar que eilha zambolbiu, inobando cada beç más na andústria bélica. Eilhes criórun armas que ambolbian tática i fuorça, cumo l corbo, l gládio, l pilo i la catapulta; mas tamien debe-se ressaltar que las cunquistas romanas se dórun pula grande Ourganizaçon i ampenho de l eisércitos.

Podemos citar alguas guerras adonde ls Romanos tubírun grande éxito, cumo: Las Guerras Samnitas, las Guerras Púnicas, la Guerra Lhusitánica, las Guerras de la Macedónia, la Guerra Jugurtina, las Guerras Mitridáticas, las Guerras de la Gália, las Guerras Cantábricas, las Guerras Germánicas de Augusto, las ambasones romanas de las ilhas británicas, las Campanhas de Trajano na Dácia i las Campanhas de Trajano na Pártie. Mas ls romanos nun tubírun solo guerras spansionistas, esto ye, fura de sou território, tamien tubírun, assi cumo todos ls ampérios, reboltas i rebeliones anternas. Dentre las quales, podemos citar: las reboltas de l Anho de l quatro amperadores, las Guerras cebiles Romanas (bárias), La Guerra Social, ls Motines de Nika, la Rebolta Vatábica, las reboltas de l judius (bárias) i la Rebolta de l Scrabos. I ne l cuntesto de guerras spansionistas, reboltas i rebeliones romanas, nun poderiemos deixar de çtacar alguns de l grandes lhíderes militares de Roma, ls grandes generales: Júlio César; Pompeu, l Grande; Lúcio Cornélio Sula; Caio Mário; Cipion Africano i Quintus Fabius Maximus Berrucosus.